མི་གཤིས།
གངས་བུ་དཔལ་འབར།
མི་ཚེ་ཁེར་རྐྱང་ལ་སྡོད་པ་ནི་ང་ལ་མཚོན་ན་བདེ་སྐྱིད་ལྡན་པ་ཞིག་ཡིན་ཡང་ཁྱོད་ལ་མཚོན་ན་ཅི་འདྲའི་སྡུག་བསྔལ་ཞིག་རེད་ཨང་།
དེ་ལས་ཀྱང་གྲུབ་འབྲས་མེད་པའི་མི་ཚེ་ནི་ཧ་ཅང་སྐྱོ་བོ་ཞིག་རེད། མི་རེ་རེ་ལ་ཁེར་རྐྱང་དུ་སྡོད་པའི་དུས་ཚོད་མང་ལ་དེ་ལས་ཀྱང་སྐྱོ་གདུང་གི་དུས་ཚོད་མང་པོ་ཡོད་པ་རེད། དེ་དུས་མཐའ་གཅིག་ཏུ་ཕ་མས་རོགས་སྐྱོར་བྱེད་མི་ནུས་ལ་གྲོགས་པོས་ཚེ་གང་བོར་འགྲམ་ནས་བསྐོར་མི་སྲིད། སྐབས་དེ་དུས་ཁྱོད་ལ་ལམ་སྟོན་གྱི་སྒྲོན་མེ་ནི་མི་གཞིའི་བསམ་བློ་ལས་འཁྲུངས་པའི་ཤེས་ཡོན་གྱི་མྱུ་གུ་དེ་རེད།
གལ་སྲིད་ཁོར་ཡུག་གིས་ཁྱོད་ལ་བསྐྲུན་པ་ནི་གད་སྙིགས་ཀྱི་རྫིང་བུ་ཞིག་ཡིན་ཡང་ཁྱོད་རང་རྫིང་བུ་དེ་ལས་བརྒལ་ཏེ་འཛམ་གླིང་གི་ཡང་རྩེ་རུ་བསྙེག་འདོད་ན། རང་གིས་རང་གི་བསམ་བློའི་དཔལ་ཡོན་ལ་འཕེལ་རྒྱས་གཏོང་དགོས། དེ་མིན་ན། ཁྱོད་ཀྱི་མདུན་ལམ་ལ་ཁག་ཐེག་དང་ཁས་ལེན་སུས་ཀྱང་བྱེད་མི་སྲིད། འཕེལ་རྒྱས་མེད་ན་སྤྱི་ཚོགས་ཀྱི་ཆེས་རྙིང་རུལ་དུ་གྱུར་བའི་འདམ་རྫབ་ལས་བརྒལ་མི་སྲིད།
གལ་ཏེ་དངོས་པོའི་དཔལ་ཡོན་དང་བསམ་བློའི་དཔལ་ཡོན། ཤེས་ཡོན་འཇོན་ཐང་གི་དཔལ་ཡོན་གང་ཡོད་ཀྱང་མི་གཞིའི་དཔལ་ཡོན་ཡོད་པའི་ངེས་པ་མེད། མི་ཞིག་ཡིན་བྱིན་མ་ལས་སྐྱེས་པའི་རྗེས་ནས་ཁྱོད་ལ་ཡན་ལག་མེད་ན་ཡང་ཆོག རྒྱུ་ནོར་མེད་ན་ཡང་ཆོག ཤེས་ཡོན་མེད་ན་ཡང་ཆོག བསམ་བློ་མེད་ན་ཡང་ཆོག འཇོན་ཐང་མེད་ན་ཡང་ཆོག འོན་ཀྱང་ཆེས་མེད་དུ་མི་རུང་བ་ནི་སེམས་པ་བཟང་པོ་ལས་འཁྲུངས་པའི་དྲང་བདེན་སྨྲ་བའི་མི་གཤིས་ཡག་པོ་དེ་རེད། ཡིན་ཡང་ཡིན་དེ་མི་ལ་མཁོ་བ་ནི་མི་གཤིས་རེད་ས་ལ་མཁོ་བ་ནི་རྩི་ཤིང་རེད་ཟེར་བ་མིན་ནམ།
མི་སོ་སོའི་ཁེ་དབང་ནི་གནད་འགག་ལ་ཐུག་དུས་རང་འགུལ་དུ་འདོར་ཐུབ་པ་ཞིག་ག་ལ་ཡིན། དེ་ལས་ཀྱང་སྤྱི་ཡི་ལྷག་བསམ་ཁ་རུ་བཟུང་ནས་རང་གི་ཁེ་དབང་ཁོག་ཏུ་འཛིན་པ་ནི། མི་གཤིས་བསམ་བློའི་རིན་ཐང་གིས་བཤད་ན་ཅི་འདྲའི་སྐྱི་གཡའ་བ་ཞིག་དང་གདུག་རྩུབ་ཆེ་བ་ཞིག་རེད། དེ་དུས་རང་གི་ཁེ་དབང་གི་ཆེད་དུ་ཚོགས་པ་དེ་དང་ལུང་པ་དེ་དང་མི་རིགས་དེ་དང་རྒྱལ་ཁབ་དེ་ཡི་ཁེ་དབང་ལ་བརྩི་མཐོང་བྱེད་ཤེས་པ་ནི་མི་གཤིས་བསམ་བློའི་རིན་ཐང་གིས་བཤད་ན་ཧ་ཅང་གནད་འགག་ཆེ་བ་ཞིག་རེད།
དེ་ནི་ཁྱོད་ཀྱི་མི་ཚེའི་ཁྲོད་དུ་འདོར་མི་རུང་པའི་འཚོ་བའི་གོམས་གཤིས་ཞིག་ཏུ་ཆགས་དགོས། དེ་ནི་ཁྱོད་ཀྱི་འཁོར་ཡུག་ཁྲོད་ཞི་བདེ་དང་ལྷིང་འཇགས་ཤིག་ཡིན་པར་མ་ཟད་གོ་མཚོན་མེད་པའི་དམག་འཁྲུག་གི་རྒྱལ་ཁ་ཆེན་པོ་ཞིག་རེད།
དུས་ཀྱི་སྒྲོན་མེ་ལྟ་བུའི་བཀའ་དྲིན་ཅན་དག་གིས་ང་ཚོ་ལ་ལམ་སྟོན་བྱས་པ་ནི་འདི་འདྲའི་ཐབས་ལམ་བཟང་བོ་ཞིག་དང་འོད་སྟོང་ལྡན་པ་ཞིག་རེད། ང་ཚོས་སེམས་ལ་འཛིན་དགོས་པ་ནི། འདི་འདྲའི་མི་གཤིས་ནི་ཆུང་བ་བྱིས་པའི་རྩེད་རྡོ་རྩེ་བ་ནས་བར་དུ་ཆོས་ལུགས་པའི་རྙོག་འཛིང་ཆེན་པོ་རྒྱལ་ཁབ་ཀྱི་སྲིད་དོན་རྩོད་པ་ལ་ཡང་ཧ་ཅང་མཁོ་བ་ཞིག་མ་རེད་དམ།
རང་རང་སོ་སོའི་ཉིན་རེ་རེའི་འཚོ་པའི་ཁྲོད་དུ་སྤྱི་ཡི་ལྷག་བསམ་ཁ་རུ་བཟུང་ནས་རང་གི་ཁེ་དབང་ཁོག་ཏུ་འཛིན་པ་ནི་ཧ་ཅང་མང་པོ་ཡོད།
ཡང་གཅིག་བཤད་ན་མི་སོ་སོས་སྲིད་འབྱོར་རིག་གསུམ་གྱི་རྩོད་པ་གང་བྱས་ཀྱང་ཁེ་ཕན་ཡོད་པ་རེད། འོན་ཀྱང་། གཞན་གྱི་ཁེ་དབང་རྡོག་བརྫིས་བྱེད་པ་ནི་ཤེས་ཡོན་གྱི་རྩོད་གླེང་དང་མི་གཤིས་ལྟ་གྲུབ་ཀྱི་རིན་ཐང་མ་ཤེས་པ་རེད་ལགས། དངུལ་ལ་བརྟེན་ནས་མི་གཤིས་བཟོ་བ་ནི་བཅོས་མ་ཞིག་ཡིན་པ་རེད།
དེར་མ་ཟད་གཞན་གྱི་དཔལ་ཡོན་ལ་ཧམ་སེམས་སྐྱེས་པ་ལ་བརྟེན་ནས་ཕྲག་དོག་དང་ཐོབ་ཐང་ལ་བརྩི་བཀུར་མི་ཤེས་པ་ནི། མི་གཤིས་ཡག་པོ་མེད་པའི་འབྲས་རྟགས་རེད། སྤྱི་ཡི་ལྷག་བསམ་ཁ་རུ་བཟུང་ནས་རང་གི་ཁེ་དབང་ཁོག་ཏུ་འཛིན་པ། ཀུན་སྤྱོད་བོར་བའི་ཤེས་ཡོན། འབད་པ་མ་བྱས་བར་ཐོབ་པའི་འབྱོར་ཕྱུག་སོགས་ནི་མི་ཚེ་གཅིག་གི་ནག་ཉེས་ཡིན།
|