བཙན་ཞགས་ཀྱི་ཞར་བཀོད་བདུན།
ཕར་ཁའི་རི་དྭགས།
ད་ཚོད་ཅིག་ལ་རི་དྭགས་རྨིག་རྗེས་མཚོ་ལ་བཏབ།།
མཚོ་མཐའི་དྲན་པ་དགུ་ཚིགས་ཕག་ལ་བྲོས་པ་ནས།།
ཁྲག་དམར་ཁོལ་བའི་རྨི་ལམ་ཁོ་ན་གམ་དུ་ལས།།
དུས་ཚིགས་བཞི་ལ་དྲན་སྣང་འོག་འགྱུ་མེ་རུ་སྤར།།
མཐའ་དང་མཐའ་རུ་འུག་པའི་ཧབ་ཆ་རྒྱག་པ་ལ།།
གཉོམ་ཞིང་ཕྲ་བའི་སྙིང་གི་མེ་ཏོག་ལན་དུ་སྦྱིན།།
རིང་དུ་བཀྱེད་པའི་གོམ་གསུམ་ཕྲ་མོའི་གསང་བ་དེ།།
མི་འདོད་ལས་ཀྱི་ཡིག་ཆུང་གསེབ་ཏུ་བྲིས་ནས་བཞག།
ཕར་ལ་བལྟས་ན་ཁོར་ཡུག་སྔར་བཞིན་ཕྱིས་དེ་བཞིན།།
ནང་ལ་བཙལ་ན་སྐྱོ་སྣང་བན་བུན་དལ་བུར་རྒྱུ།།
དེ་ནས་མི་སེམས་འཁྱག་རོམ་གླིང་ཕྲན་ཆུང་ཆུང་ཞིག།
སྨྲ་བ་འགགས་ཏེ་ཚོར་བའི་གཞུང་ལ་ཁ་བ་འབབ།།
གཙང་བོར་བཏང་བའི་འཕྲིན་པ་རྒྱ་མཚོའི་གླིང་ལ་ཁྱེར།།
རླུང་ལ་བསྐུར་བའི་སྙན་ཚིག་དྲི་ཟའི་ཕྱག་ལ་བསྐྱལ།།
བྲག་ཆར་འཁྱུད་པའི་ཨ་ལན་སྟོང་བའི་ཁམས་ལ་བསྒུག།
ལོ་ཟླའི་གཙང་བོར་སྐྱོ་བའི་རླབས་ཞུད་བརྒྱབ་སྟེ་ཡོང་།།
དུས་དང་ཡུལ་གྱིས་ཕྱིར་སྐོར་ལན་གཅིག་བརྒྱབ་པ་ན།།
མཚོ་མཐའ་དེ་རུ་ཡང་ཡང་དགོད་པའི་སྐར་ཆུང་ཞིག།
བདག་གི་མཁའ་དབྱིངས་གོར་མོའི་འོག་ཏུ་ཡོད་ཡོད་འདྲ།།
མིག་འཁྲུལ་ལྟ་བུའི་འཇིག་རྟེན་འདི་རུ་ཅི་ཞིག་བདེན།།
རང་སེམས་སྤྲིན་པ་སྔར་བཞིན་དཀར་པོ་བོངས་སེ་ཡོད།།
ལས་ཀྱི་གསང་ལམ་ཕྲ་མོ་གར་ཡོད་མཐོང་གི་མེད།།
ཁྱེད་ཉིད་འཇའ་འོད་འཁྱིལ་བའི་ཀློང་དུ་བྲོས་སམ་ཅི།།
ཐུང་ཐུང་མི་ཚེའི་ཕ་རོལ་བར་དུ་རྙེད་པས་ཆོག།
2017/12/23
གླེན་པ།
སྤྲིན་དཀར་དབུ་ཞྭའི་འོག་ན།།
རི་རྩེ་རྣོན་པོ་དགུང་རེད།།
རི་དེའི་ཕ་རོལ་མཚོ་རེད།།
མཚོ་མོ་དར་ཁ་ཁྲིག་ཁྲིག།
རླངས་པའི་གསེབ་ལ་ཉལ་བ།།
ཉི་ཟླས་མ་གཏོགས་མི་མཐོང་།།
ཉི་ཟེར་གཤོག་པ་ཐང་རེད།།
ཐང་གཞོངས་མེ་ལོང་ཕྱིས་ན།།
ཐང་དཀྱིལ་སྔོན་མོ་ཆུ་རེད།།
ཆུ་བོ་གྱག་གྱོག་རྒྱང་རེད།།
རྒྱང་རིང་རྒྱ་མཚོ་མ་གཏོགས།།
ཆུ་སྣེ་ཟིན་མཁན་མི་འདུག།
མཚན་གཞུང་སྐར་མའི་མཛོད་རེད།།
སྐར་ཆུང་གཙང་བོའི་ནང་རེད།།
དྲན་པའི་ནང་གི་ཐིག་ལེ།།
རྡོ་ལ་བབས་པའི་རི་མོ།།
གསེར་མིག་ཉ་མོ་མ་གཏོགས།།
གློ་བ་ཉེ་མཁན་མེད་སོང་།།
མི་ཡུལ་ཉིན་སྲིབ་གཉིས་རེད།།
ཉིན་སྲིབ་སྐྱིད་སྡུག་ལས་རེད།།
ལས་དབང་ཁ་དཀར་གཏིང་ནག།
མགུལ་ལ་བཏགས་པའི་གཟི་རེད།།
གཟི་ཆུང་ཁྲ་ཁྲ་རིས་རིས།།
མགུལ་ལས་འབྲལ་ཐབས་མི་འདུག།
མི་སེམས་ཁྲ་ཁྲ་ནང་རེད།།
གློ་དང་མཆིན་པའི་བར་རེད།།
གཏན་ཚིགས་སྐུད་ལ་བགྱིས་པའི།།
ཚིག་རིས་བརྒྱ་དང་བརྒྱད་པོ།།
སྐུད་པ་ཆད་ན་མ་གཏོགས།།
ཆར་དང་སེར་བས་མི་གཞོམ།།
2017/12/2
དྲན་པའི་རིལ་བུ།
ཤར་མཐའི་སྐྱ་འོད་དེ་ལ་ཨེན་ཙམ་བལྟས།།
དེ་གར་སྨྲེང་བའི་མཚོ་མོ་བྲུགས་པའི་ངོགས།།
གཏམ་རྒྱུད་ཐེད་འཕྲོ་དགུ་སྐོར་སློག་པ་ན།།
དུང་ཞེན་ཁབ་སྐུད་འཁྱུག་སྟེ་ཅི་ཞིག་དྲུབས།།
སྤྲིན་པའི་ལྟེབ་གཉེར་བརྩེགས་ཏེ་ཕར་ཕར་སོང་།།
ཕྱིར་འདང་འཕར་མའི་བར་གྱི་དྲན་སྣང་དེ།།
ནུབ་རའི་ཕག་ལ་མ་སོང་བདག་སེམས་སྙེག།
སྐྱོ་བ་ལྗིད་སེ་བབས་དུས་མཚན་མོ་རེད།།
མཚན་གཞུང་སྐར་མ་ང་ལ་ཁྲེལ་ཞིང་དགོད།།
ང་ཡི་ལག་པ་འཁྱག་ནས་འདར་གྱིན་འདུག།
སྒེའུ་ཡོལ་ཕབ་སྟེ་མུན་པའི་དཀྱིལ་ཀྲུང་སྔོག།
རྨི་ལམ་མ་ཟིན་སྔོན་གྱི་འཆར་ཡན་ལས།།
ཁྱོད་ནི་ཕྱེ་ལེབ་ཚུལ་གྱིས་ཞིང་ཁ་དེར།།
ལྡིང་སྐོར་ལན་འགའ་བརྒྱབ་པ་ལྷག་ཏུ་གསལ།།
ལས་ཀྱི་མེ་ལོང་གས་པའི་དགུན་ཁ་དེ།།
དྲན་པའི་ངོས་ལས་ཕར་ཕར་དེད་ན་ཡང་།།
གཟུགས་མེད་ཚོར་བ་ཚུར་ལ་ཟུག་པ་ཚ།།
ཇི་ལྟར་བསམ་པ་ཆུ་ཡི་རི་མོ་བཞིན།།
རེ་བའི་གཞུང་ལ་བྲིས་པ་མི་ཉུང་མོད།།
དོན་དམ་ལག་པའི་མཐིལ་ཏུ་ག་ཚོད་བཞད།།
2017/10/30
ཚིག་མདུད།
ཟླ་འོད་གྱེར་བའི་ངག་གི་གླིང་བུ་དེས།།
ལྕུག་མའི་ཕོན་པོ་བརྒྱུད་དེ་ག་ལེ་ལེར།།
མཚོ་འགྲམ་ངང་བ་དཀྲོག་པའི་གཤོག་སྒྲའམ།།
རི་ཚོགས་ཤུལ་དུ་ལུས་པའི་འབོད་པ་ཅི།།
ཡིད་ལ་ཟུག་པའི་མདའ་རྩེ་རྣོན་པོ་ཞིག།
ཕྱིར་འདང་གཞུང་ནས་ཡང་ཡང་གསལ་དེ་ཐོན།།
འཁར་བ་མེད་པའི་ལོ་ཟླ་བགྲེས་པོ་དེས།།
རྨི་ལམ་ཐམས་ཅད་འཚོ་བའི་མཐའ་ལ་དེད།།
ལན་བུ་ཆུ་ལ་བཤན་པའི་སྐད་ཅིག་དེར།།
མི་སེམས་བརྒྱ་སྟོང་མང་པོའི་ཕ་རོལ་འགྲོ།།
ངག་སྒོ་ཕྱེས་པའི་ཡིད་ཙམ་དེ་དག་ལ།།
སིམ་གདུང་མཐའ་དག་ཚིག་གི་མདུད་པར་འཁུ།།
2017/10/14
ང་དང་གེ་སར་སྒྲུང་།
ང་ཡི་རྐང་ཆུང་གཡང་དཀར་རྗེས་ན་ཡོད།།
སློག་ཧྲིལ་སྐྱ་བོ་ཙག་སེར་ལེན་ན་ཡོད།།
དབེན་ཐང་རི་ལུང་ང་དང་ཞང་བོར་དབང་།།
དགུན་ཟླ་ཧྲིལ་བོ་སྒྲུང་རིང་མཇུག་ལ་བཏགས།།
ཐབ་ཁུང་མེ་ལྕེ་ལམ་ལམ་གཟིམ་ནས་འགྲོ།།
གྲང་ངར་ཤུལ་ཤུལ་སྦྲ་གུར་སྲིབ་ནས་ཐོན།།
མཚན་གཞུང་སྐར་ཚོགས་གཡང་དཀར་ཁྱུ་ལ་འདྲེས།
ཞང་མཚན་ངེད་གཉིས་གེ་སར་སྒྲུང་ལ་གཡེང་།།
གླིང་དཀར་དཔའ་རྟགས་བཤད་དུས་སྣང་བ་སྤྲོ།།
དགྲ་བོའི་སྡར་སྐད་ཤོར་དུས་ཧབ་ཆ་ཤོར།།
སྦྲ་ཆུང་སྒོ་ཁྱིམ་མཚམས་ནས་ཀི་རིང་བཏབ།།
རི་སྤྱང་ཟུག་རྔུ་མདུན་རིའི་རྒྱབ་ལ་བྲོས།།
འདན་མའི་མདའ་རྩལ་ངོམ་དུས་ང་ཡིན་སྙམ།།
ལྷག་པར་གཟེངས་སུ་བཏེགས་ཏེ་མགུར་དུ་བཅུག།
བྱིས་དུས་ཡིད་ལ་སིམ་པའི་མགུར་ཆུང་འགའ།།
ད་དུང་གྱེར་ན་གདངས་ལ་ལྷོད་ཆ་འཁོར།།
ཉི་འོད་བྲག་ལ་བརྒྱབ་པའི་ལྷས་ར་ནས།།
འབའ་སྒྲ་འུར་འུར་ལུག་ཁྱུ་རི་ལ་ཡན།།
ང་རང་སློག་ཧྲིལ་མཐུག་པོའི་དྲོད་ཁུག་ན།།
འདན་མའི་མདའ་རྩལ་ངོམ་པའི་རྨི་ལམ་རྙེད།།
རི་སྒང་ཉིན་སྲིབ་བདའ་བའི་གཡང་དཀར་རྗེས།།
མདའ་གཞིའི་རྩེད་ཆས་ཐོགས་ཏེ་སྣང་བ་ཡན།།
སྔ་ནུབ་ཕྱི་ནུབ་བར་གྱི་རེ་སྒུག་ལས།།
སྒྲུང་དེབ་ཚི་དྲེག་ཅན་དེར་འཁྲེང་ནས་བསྡད།།
ད་ལྟ་བསམ་ན་དེ་ཡང་སྒྲུང་ཞིག་རེད།།
གནས་དེ་མཐོང་ན་སྐྱོ་བའི་སྣོན་ཞིག་རེད།།
ཐོག་མའི་སྒྲུང་གཏམ་ཡིད་ཀྱི་གཏིང་ན་ལུས།།
ད་དུང་ཕྱི་མར་བག་ཆགས་མཐུག་ཚོད་རེད།།
2017/8/11
ཏག་ཏག་པོ།
ཁོ་བོའི་ལག་པས་ཁྱོད་རང་མི་ཟིན་ལ།།
ཁྱོད་ཀྱི་རྐང་བས་གཞན་རྗེས་མི་ཆོད་ཅིང་།།
ཕན་ཚུན་སེམས་པས་གང་ཡང་མི་རྙེད་པ།།
ཞེན་ཆགས་མུ་གེའི་ཐན་པ་ཐོན་རྟགས་སོ།།
ཁོ་བོའི་འདོད་ཞེན་ཁྱོད་ལ་མི་མཁོ་ལ།།
ཁྱོད་ཀྱི་ང་རྒྱལ་གཞན་གྱིས་མི་ཐེགས་པ།།
འགལ་འདུའི་ཁ་རླངས་ཀུན་ལ་མི་ཞིམ་པ།།
དུག་ལྔའི་བྲན་ལ་མཐུན་སྒྲིལ་ཆད་རྟགས་སོ།།
ཁོ་བོའི་གཤིས་སྤྱོད་ཁྱོད་ལ་མི་འཚམ་པ།།
ཁྱོད་ཀྱི་འགྲོ་འདུག་གཞན་ལ་མི་འཕྲོད་པ།།
ཕན་ཚུན་འགལ་བའི་ལས་ཀྱི་རི་མོ་དེ།།
འཚོ་བ་མངར་མོའི་དྲོད་ཁོལ་ཡལ་རྟགས་སོ།།
ཁོ་བོའི་གྲིབ་མས་ཁེར་ལམ་མ་བོར་ལ།།
ཁྱོད་ཀྱི་དགོད་སྒྲས་གཞན་ཉིད་མ་བཏང་བས།།
ཁ་སེམས་བར་གྱི་མཐུན་པའི་འཇལ་ཚོན་དེ།།
སྐད་ཅིག་བར་ནས་དབྱིངས་ལ་ཡལ་རྟགས་སོ།།
ཁོ་བོའི་རེ་བས་ཁྱོད་ཉིད་མ་བསྐུམ་ལ།།
ཁྱོད་ཀྱི་ཁ་ལྕེས་གཞན་ཉིད་རྒྱང་ལ་འཕེན།།
ཕན་ཚུན་བར་གྱི་འཇིག་རྟེན་ཆུང་ཆུང་དེ།།
གོ་འཛོལ་བར་ནས་རྡུལ་དུ་བཏང་རྟགས་སོ།།
ཁོ་བོའི་ཚོར་བས་སྔར་རྗེས་མ་བོར་ལ།།
ཁྱོད་ཀྱི་ལས་ཀྱིས་གདམས་ཀ་མ་རྙེད་འདྲ།།
རྨི་ལམ་འདྲ་བའི་གཏམ་རྒྱུད་ཆད་པོ་དེ།།
འཁོས་ཆུང་ལག་པའི་ཕྱི་ནང་ནོར་རྟགས་སོ།།
2017/78/14
མྱི་སྐྱིད་ང་།
ཕྱི་ན་འཁོར་བ་ཟེར་བའི་སྒོར་སྒོར་དེ་མེད་ཀྱང་།།
ནང་བ་བརྩེ་དུང་ཟེར་བའི་ཁྲ་ཁྲ་དེ་མེད་མོད།།
རང་སེམས་རང་ལ་དབང་བའི་མྱི་སྐྱིད་ངའི་གམ་ན།།
སྡུག་བསྔལ་ཨ་ཐང་ཆད་པའི་སྐྱོ་གཞས་ནི་མེད་དོ།།
གཞན་གྱི་མགོ་འདྲེན་ཟེར་བའི་རྫིག་རྫིག་དེ་མི་འཇོན།།
ཀུན་ལ་ངན་སྨད་བྱེད་པའི་སྤོབས་པ་རང་མེད་མོད།།
བག་ཡངས་འཚོ་བ་ལྷོད་པོའི་དཀྱུལ་དཀྲུང་ལ་བསྡད་དེ།།
རང་ནུས་ཕྲན་བུས་སློབ་སྦྱོང་ལྷོད་པ་རང་མེད་དོ།།
གོང་ན་མཁས་པ་ཞུ་བའི་མིང་ཆེན་ནི་མེད་ཀྱང་།།
འོག་ན་སློབ་མ་ཟེར་བའི་བཀུར་མཁན་ཡང་མེད་མོད།།
གྲྭ་རྐྱང་ཕལ་བ་ཞིག་གི་མིང་བྱིང་ལ་འཇུས་ནས།།
མངོན་ལྐོག་ཐུབ་པའི་བྱ་སྤྱོད་འདོར་བ་རང་མེད་དོ།།
ངག་ན་གདམས་ངག་ཟེར་བའི་རྩ་ཆེན་དེ་མེད་ཀྱང་།།
སེམས་ན་མཉམ་ལེན་ཟེར་བའི་རྟོག་པ་རང་མེད་མོད།།
ལས་འབྲས་བླང་དོར་གསེར་གྱི་ཞུན་མ་རང་བརྡལ་བའི།།
དགོས་མེད་ལས་ལ་དོན་མེད་འཇུག་འདོད་རང་མེད་དོ།།
གདོང་ན་ལངས་ཚོ་ཟེར་བའི་མཛེས་སྡུག་ནི་མེད་ཀྱང་།།
ཁོག་ན་ཤེས་ཡོན་ཟེར་བའི་རིན་ཐང་ནི་མེད་མོད།།
ན་བཟའ་དམར་པོའི་དྲོད་ཁོལ་ལུས་སེམས་ལ་གཅར་དེ།།
མི་ཚེའི་རྨི་ལམ་འདོར་བའི་ལྟ་གོན་ནི་མེད་དོ།།
ཁོག་ན་སྙན་ངག་ཟེར་བའི་གྲུབ་མཐའ་རང་མེད་ཀྱང་།།
ཁ་ན་སྙན་རྩོམ་ཟེར་བའི་ཐོབ་ཆེན་རང་མེད་མོད།།
རང་སེམས་འཁོར་འདས་བར་ལ་བག་ཡངས་སུ་རྒྱུ་ན།།
དགའ་སྐྱོའི་སྣང་བ་མ་མགུར་རང་དབང་ནི་མེད་དོ།།
ཕྱི་ན་ཡུལ་སྡེ་ཟེར་བའི་སྲ་བརྟན་ཞིག་མེད་ཀྱང་།།
ནང་ན་གྲོགས་པོ་ཟེར་བའི་གཏད་སོ་ཞིག་མེད་མོད།།
ས་མཐའ་སྡེ་མཐའ་ཉུལ་བའི་འཁྱམས་པོ་ཡི་སེམས་ན།།
རང་ཚུགས་རླུང་ལ་བསྐུར་བའི་མྱ་ངན་ནི་མེད་དོ།།
རྒྱང་ན་སྙིང་གྲོགས་ཟེར་བའི་ལོག་ལོག་ཅིག་མེད་ཀྱང་།།
ཟུར་ན་བྱམས་པ་ཟེར་བའི་དམར་དམར་དེ་མེད་མོད།།
རང་སེམས་བརྩེ་བ་དག་མའི་གུར་ཁང་ལ་བཞུགས་ན།།
འཇིག་རྟེན་ཧྲིལ་གྱི་མི་མཐུན་གང་ཡང་ནི་མེད་དོ།།
2017/8/1