༣. ཚོམ་བུར་ཚོམ་བུར་བཞད་དེ་ཁ་དོག་རྣམ་པར་བཀྲ་བའི་མེ་ཏོག་གི་མགོ་ལྕོག་ལྡེམ་པ་ནི།  མཆོར་སྒེག་གིས་དཀྲིས་པའི་གཞོན་ནུ་མ་ཞིག་གི་གར་སྟབས་ལ་འཁྲུལ་བའི་སྐྱེ་ཁམས་ཀྱི་ཁོར་ཡུག་ཉམས་དགའ་བ་དེར། སུ་དང་གང་གིས་སྦགས་བཙོག་གི་སྣ་གཉེར་བའི་རྣམ་འགྱུར་མདོག་ཉེས་པ་དག་སྟོན་འོས་སམ།   སྐབས་དུ་མར་མིག་མདུན་གྱི་མཐོང་རྒྱར་ཚུད་པའི་ཕྱོགས་སོ་སོར།  ནག་ནོག་གིས་ཟིན་པའི་རྫས་དུད་སྟུག་པོའི་རུལ་སུངས་སམ།  བཙའ་རོ་ཆགས་པའི་ལྕགས་རིགས་ཀྱི་གཡའ་བག་གིས་ལུས་ཕུང་གི་ཕྱིའི་ཐོགས་རེག་ནས་ནང་སེམས་ཀྱི་མྱོང་བྱར་ཡི་མུག་སྐྱེ་ཞིང་དྲི་མས་གོས་པར་འགྱུར་སྟབས།  དེ་མ་ཁད་དུ་ས་གང་དེར་འབྲལ་སྙིང་འདོད་ཀྱང་གནས་སྐབས་ཀྱི་ཟུར་བྱོལ་ཐེངས་གཅིག་བྱས་པ་ཙམ་ལས་ཡུན་རིང་གི་བར་དུ་ཐར་མེད་པ་འདྲ།  དེའི་ཕྱིར་ན།  ང་ཚོས་ངེས་པར་དུ་ད་ལྟའི་མིག་ལམ་དུ་བརྒྱུད་ཀྱིན་པའི་ཁོར་ཡུག་གི་ཁ་ངོར་མི་གཙང་བས་བསྒོས་པའི་ཞད་ལྷད་འདི་དག་ལ་གཙང་སྦྲའི་བྱབས་ཁྲུས་ཆེན་མོ་ཞིག་གི་ཆོ་ག་སྤེལ་བར་བབས་འདུག་ཨང་།

      ༤.དེ་མུར་མ་གཞི་ནས་དག་ཞིང་གི་གནས་མཆོག་གཅིག་ཏུ་གྱུར་བའི་རང་རེ་ཁ་བ་ཅན་གྱི་ཡུལ་གྲུ།   འདི་དང་འབྲེལ་བའི་འཛམ་གླིང་ས་ཕྱོགས་ཀུན་ཏུའང་། ས་གཞི་དང་ཆུ་བོའི་སྙིང་ཁ་ནས་འཕྱུར་དེ་རང་བྱུང་ཁོར་ཡུག་གི་ཡ་ཁོག་ལ་ཐེབས་པའི་འཇིགས་སུ་རུང་བའི་གནོད་སྐྱོན་གྱི་རྒས་པས། ས་ཡི་གོ་ལ་ཟླུམ་པོས་ཚེ་མཇུག་གི་ཟློས་གར་འཁྲབ་ལ་ཉེ་བ་ན། ཁ་ཚ་དགོས་གཏུགས་སྒོས་མི་རེ་རེའི་ཀུན་སློང་ནང་རང་རྟོགས་ཀྱིས་འོས་འགན་འཁུར་བ་ནས་ལམ་ལ་ཆས་ཏེ།    ཕྱིའི་ལུས་ཀྱི་སྦྱོར་བ་རང་གྲུབ་ངང་གད་བདར་བྱེད་པའི་ལམ་བར་གྱི་ལས་ཀ་མུ་མཐུད་དུ་འབད་པ་བྱེད་བཞིན། ཕྱི་རོལ་མ་ལུས་དྭངས་གཙང་དུ་དག་ཅིང་ནང་རོལ་མ་ལུས་རྟོགས་སད་དུ་སངས་བའི་ངོ་བོར།    ཡི་གར་འོང་བའི་འཇིག་རྟེན་གྱི་ལམ་སྣེར་མཛེས་བྱད་ཀྱིས་ཟིན་པར་ཕུགས་བསམ་དང་བཅས་མངོན་འགྱུར་བྱའོ།།