སྐྱོ་བ།
ཐུབ་གཞོན།
དབེན་པའི་རི་ནས་ཡུན་རིང་འགོར་ཡང་།།
ངེས་འབྱུང་སྤུ་སུད་ཙམ་ཡང་མ་སྐྱེས།།
ཕྱི་ཚུལ་བརྗེ་བའི་ངང་ཚུལ་བསམ་ན།།
མི་ལུས་བརླག་པའི་ཚུལ་འདི་སྐྱོ་བ།།
མཚན་ལྡན་བླ་མ་བསྐལ་བར་བཙལ་ཡང་།།
འཕྲད་པར་དཀའ་བ་དག་དང་འཕྲད་ཅིང་།།
རང་སེམས་ཆོས་ལ་ཕྱོགས་པ་མ་དགོས།།
ཆོས་བརྒྱད་རླབས་བཞིན་འཕྱོ་འདི་སྐྱོ་བ།།
གང་ཤེས་རྒྱུད་ལ་སྦྱོར་བར་འབད་ཅིང་།།
དོན་དུ་འཁེལ་བ་རི་བོང་རྭ་རེད།།
ཁ་ཕོ་ཆེན་པོས་སྟོང་གསུམ་བསྐོར་ཏེ།།
འཚུལ་ཆོས་བྱས་པའི་རིགས་འདི་སྐྱོ་བ།།
བྱང་ཆུབ་སེམས་ལ་གོམས་པར་བརྩོན་ཡང་།།
ཆགས་སྡང་རླུང་འཚུབ་གཡུགས་པ་རྒོད་སོང་།།
མཁས་པའི་ལེགས་བཤད་བདག་གིར་རློམ་ནས།།
འུར་གྱིས་འགྱིང་བའི་ལས་འདི་སྐྱོ་བ།།
སྟོང་ཉིད་བུ་མོར་རོགས་གླུ་བླངས་ཀྱང་།།
ཚུར་ལ་ཕྱོགས་པའི་རྣམ་འགྱུར་མི་འདུག།
རོགས་ལ་བཀུག་པའི་འཕྲུལ་སྣང་བསྒོམས་ནས།།
རྨི་ལམ་འགྲིམ་པའི་གཟུགས་འདི་སྐྱོ་བ།།
ཚིག་འབྲུ་ཐར་ཐོར་ཤོག་བུར་ཕབ་སྟེ།།
སྙན་ངག་པ་ལ་རང་ཉིད་རློམ་ནས།།
འདྲ་འདྲའི་ནང་གི་མི་འདྲར་འདོད་དེ།།
སྣང་བ་རི་ལས་མཐོ་འདི་སྐྱོ་བ།།
ཤེས་བྱ་གང་མཁོ་སྦྱངས་བ་མཐར་ཐུག།
རང་གཞན་དོན་གྱི་སླད་དུ་མཆིས་མོད།།
རང་ཉིད་ངོམ་པའི་ལག་ཆར་སྤྱད་པས།།
ཤེས་བྱའི་ཉིང་ཁུ་བོར་འདི་སྐྱོ་བ།།
ཕྱི་ནང་རྟེན་འབྲེལ་ཆོས་ཀྱི་མ་ལག།
ཐལ་སྒྲའི་བར་ན་རྣོ་དབལ་ཆེ་ཡང་།།
དོན་གྱི་གནད་ལ་བསྣུན་དགོས་དུས་སུ།།
ཨུ་ཚུགས་སྒྲེན་མོར་ཧད་འདི་སྐྱོ་བ།།
དུས་ཀྱི་སེང་གེ་གདོང་ལྔའི་མདུན་དུ།།
ཨུ་ཚུགས་ཉམ་ཆུང་རི་བོང་རྔ་ཐུང་།།
གར་དུ་རྩེན་པའི་སྣང་བ་རྒོད་པོ།།
ཕམ་པའི་སྔ་ལྟས་ཡིན་འདི་སྐྱོ་བ།།
རང་ལམ་རང་ལ་ཧ་ཅང་གསལ་མོད།།
དབང་ཤུགས་གནམ་ལྕགས་ཐོག་མདའ་བཙན་པས།།
ཁུ་སིམ་བེམ་རོར་རྣམ་ཤེས་འཐིམ་ནས།།
རོ་ལངས་དབེན་པའི་སྐབས་འདི་སྐྱོ་བ།།
༡༨/༨/༣ཉིན།
ཁ་ཤས།
འབྲི་ན་འདོད་ཀྱང་མགོ་བརྩམས་དཀའ་བའི་ཡིག་འབྲུ་ཁ་ཤས།
བཤད་ན་འདོད་ཀྱང་ངག་འཁྲོལ་དཀའ་བའི་སྐད་ཆ་ཁ་ཤས།
ལེན་ན་འདོད་ཀྱང་འགྱུར་ཁུགས་དཀའ་བའི་གླུ་དབྱངས་ཁ་ཤས།
སེམས་པ་འདི་གཅུན་དཀའ།
འདོད་པ་འདི་བཅོམ་དཀའ།
ངུ་ན་འདོད་ཀྱང་མིག་ཆུ་མེད་པའི་ཉམས་སྣང་ཁ་ཤས།
བགད་ན་འདོད་ཀྱང་འཛུམ་མདངས་མེད་པའི་རྣམ་འགྱུར་ཁ་ཤས།
གཉིད་ན་འདོད་ཀྱང་མིག་མི་བཙུམ་པའི་བཟོ་ལྟ་ཁ་ཤས།
སྡུག་བསྔལ་འདི་འདོར་དཀའ།
བདེ་སྐྱིད་འདི་ཐེག་དཀའ།
ཐོབ་ན་འདོད་ཀྱང་ཤོར་བ་མང་བའི་སྟོང་བསམ་ཁ་ཤས།
འགྲོགས་ན་འདོད་ཀྱང་གྱེས་པ་མང་བའི་ན་ཟུག་ཁ་ཤས།
བདེ་ན་འདོད་ཀྱང་སུན་པ་མང་བའི་སྣང་བ་ཁ་ཤས།
ལང་ཚོ་འདི་རྟག་དཀའ།
དུས་ཚོད་འདི་འཛིན་དཀའ།
ཐར་ན་འདོད་ཀྱང་ཀྱོག་ཀྱོག་མང་བའི་བགྲོད་ལམ་ཁ་ཤས།
སད་ན་འདོད་ཀྱང་འཇབ་རྒོལ་མང་བའི་ཉལ་ཁྲི་ཁ་ཤས།
དྲང་ན་འདོད་ཀྱང་འཁྱོག་པོ་མང་བའི་ཁོར་ཡུག་ཁ་ཤས།
གཉིད་པ་འདི་སད་དཀའ།
བདེན་པ་འདི་ལེན་དཀའ།
༡༨/༧/༣༠ཉིན་གཟའ་ཉི་མ།
| 