ལས་དབང་ཞིག་ཨེ་རེད།
གྱིན་འདའ་བ། ཁྲི་འདུ།
ཉི་མ་ནུབ་ཏུ་ཐེག་པའི་མཛེས་སྡུག་གི་ཀློང་ནས།།
མིག་ཟུང་ཡངས་པོར་བྱས་ཏེ་རྒྱང་རིང་ལ་ཀེར་ཡང་།།
གནམ་སའི་འདྲེས་མཚམས་དབར་གྱི་ཉི་ཟེར་གྱི་རྡུལ་ལས།།
ཁྱོད་ཉིད་མཐོང་དུ་མེད་པ་ལས་དབང་ཞིག་ཨེ་རེད།།
བལྟས་ན་སྣང་ཁམས་རི་མོ་གསལ་རྟོགས་ཀྱིས་མངོན་ནས།།
ཞེན་ཆགས་སེམས་ཀྱི་རྗེས་སུ་རྣམ་རྟོག་དེ་འཁྲི་ཡང་།།
སྲིད་པ་སྒྱུ་མའི་ཁམས་ཀྱི་འཁྲུལ་སྣང་གི་གཟུགས་ལས།།
ཁྱོད་ཉིད་རིག་ཏུ་མེད་པ་ལས་དབང་ཞིག་ཨེ་རེད།།
ལོ་ཟླའི་མཁར་རྫོང་བརྩེགས་པའི་མི་ཚེ་ཡི་ཀློང་ནས།།
མ་ངེས་དགའ་སྐྱོ་བསྣོལ་མའི་བརྙན་རིས་ལ་འཁྲུལ་ཡང་།།
མི་རྟག་འཁོར་བའི་ཚངས་ཀྱི་ངམ་གནག་གི་གདོང་ལས།།
ཁྱོད་ལ་འཕྲད་དུ་མེད་པ་ལས་དབང་ཞིག་ཨེ་རེད།།
ཀུན་ཀྱང་བྲེལ་བའི་འཁོར་བའི་འཕྲུལ་འཁོར་གྱི་ནང་ནས།།
སེམས་ཀྱི་ཕྱི་ནང་དབར་ནས་རིག་མ་བཞིན་སྒོམ་ཡང་།།
ཚོར་བའི་མངལ་ནས་བཙས་པའི་སྙན་ངག་གི་བུ་ལས།།
ཁྱོད་ཉིད་གམ་ན་མེད་པ་ལས་དབང་ཞིག་ཨེ་རེད།།
བཅོས་མའི་བཟོ་བལྟའི་རྣམ་འགྱུར་སྒྲོབ་ཉམས་ཀྱི་འོག་ནས།།
སེམས་ཀྱི་རྟ་མཆོག་རྒོད་པོ་དབེན་རི་ལ་སྙེགས་ཀྱང་།།
གསང་བའི་སྒྲོམ་ཆུང་བཙའ་བོའི་གས་སྲུབས་ཀྱི་དབར་ནས།།
ཁྱོད་ཉིད་བརྗེད་དུ་མེད་པ་ལས་དབང་ཞིག་ཨེ་རེད།།
ངམ་གནག་འཇིག་རྟེན་སྲིད་པའི་རླུང་ནག་གི་གསེབ་ནས།།
ལང་ཚོའི་གཡོར་གྲུ་མཚོ་མོའི་རླབས་རིས་སུ་སྐྱོམས་ཡང་།།
གཟུགས་མེད་བརྩེ་གདུང་ལས་ཀྱི་ལན་ཆགས་ཀྱི་མཐུ་ལས།།
ཁྱོད་ཉིད་སེམས་སུ་ལྕི་བ་ལས་དབང་ཞིག་ཨེ་རེད།།
ཡེ་ལོ་ 2018. 7. 26
|