ཞི་བདེ་དང་ཕུགས་བསམ།
མཁར་སྤྲུལ་མིང་བ་བཀྲ་ཤིས་དོན་གོ
༡
སྤྱིར་འཛམ་གླིང་གི་འགྲོ་མི་སུ་ཡིན་ཡང་། འཛམ་གླིང་ཞི་བདེ་ཞེས་ངག་ནས་གླེང་གིན་ཡོད་པ་རེད། ཞི་བདེ་ཞེས་པ་འདི་ནི། ངག་ནས་གླེང་ཙམ་གྱིས་འཐོབ་འོང་བ་ཞིག་ཡེ་ནས་མིན་པར། ང་ཚོ་མི་སྒེར་སོ་སོའི་ཕན་ཚུན་བསམ་ཤེས་དང་བཟོད་པ། དཀྱེལ་ཡངས་དང་མཉམ་གནས། བྱམས་བརྩེ་དང་སྙིང་རྗེ། ལས་འབྲས་དང་བདེན་པ། འཚོ་གནས་དང་ཁེ་དབང་། རང་དབང་དང་འདྲ་མཉམ། དེ་ཡང་མི་དང་མིའི་བར། མི་དང་སྲོག་ཆགས་བར། མི་དང་ཁོར་ཡུག་བར། མདོར་ན་རང་གཞན་གཉིས་ཕན་གྱི་ལམ་ཡང་དག་པ་ཞིག་འཐོབ་ཆེད་ཧུར་བརྩོན་དང་ཉམས་ལེན་མཛད་རྒྱུ་ཧ་ཅང་ནས་གལ་ཆེ།
༢
མི་ཞིག་ལ་མཚོན་ན། སྤྱི་སེམས་རྒྱ་ཇི་ལྟར་ཆེ་ན་དེ་ལྟར་ཁྱེད་ལ་བདེ་སྐྱིད་དང་དགའ་སྤྲོ། ནུས་པ་དང་འཇོན་ཐང་། གཟི་བརྗིད་དང་དགེ་མཚན་སོགས་ཀྱིས་བརྒྱན་སྲིད་པས། འདས་མ་ད་གསུམ་གང་གི་སྐབས་ཡིན་ཡང་། རང་གཅིག་པུ་ལས་བསམ་རྒྱུ་མེད་མཁན་ཞིག་བཟོ་སྐྲུན་མི་བྱེད་པར། རང་ལས་གཞན་དག་གལ་ཆེན་ནམ་མཐོང་ཆེན་དུ་བརྩི་མཁན་གྱི་མི་ཞིག་ཏུ་འགྱུར་བར་བརྩོན་རྒྱུ་དང་ནུས་པ་བླ་ལྷག་གདོན་རྒྱུ་དེ་བས་ཀྱང་གཙིགས་ཆེན་དུ་མཐོང་།
༣
ང་ཚོ་སུ་ཡིན་ཡང་། དམིགས་ཡུལ་དང་ཕུགས་བསམ་རེ་ཡོད་པའང་གཤིས་སུ་གྲུབ། འོན་ཏང་། ཕུགས་བསམ་དེ་མངོན་དུ་འགྱུར་མིན་རང་ཉིད་ཀྱི་ཤེས་རབ་དང་ནུས་པ། འཇོན་ཐང་དང་བསམ་བློ་སོགས་ལ་ལྟོས་པ་ཤུགས་ཆེ་བས། ཐབས་ཤེས་ཟུང་གི་ལམ་ནས་ཇི་ལྟར་བགྲོད་ཚེ་ད་གཟོད་རེ་འབྲས་དོན་སྨིན་འབྱུང་བ་སོགས་ལ་ཞིབ་ཀྱང་ཕྲ་བའི་སྒོ་ནས་དཔྱད་རྒྱུ་དང་། མཁས་པ་དང་ཉམས་མྱོང་ཅན་དག་ལ་བློ་འདྲི་རྒྱུ་ཧ་ཅང་གལ། སྣ་གཅིག་ལ་མཁས་པ་ཙམ་གྱིས་ཐམས་ཅད་འཇོན་དཀའ་བས། ཉམས་མྱོང་དེ་བས་ཀྱང་འགང་ཆེན་ཡིན་སྟབས་ཉམས་མྱོང་བསག་རྒྱུ་གལ་ཆེན་འགང་ཆེན་ཡིན།
༤
མཁས་འཇོན་གཉིས་ལྡན་གྱི་སྐྱེས་བུ་དག་ལ་གུས་ཞབས་དང་། དམ་པ་ཁོང་ཚོའི་གཞན་ཕན་གྱི་ཕྱག་ལས་གནང་བ་དག་ལ་རྒྱབ་སྐྱོར་དང་རྗེས་སུ་ཡི་རང་བྱེད་རྒྱུ་འུ་ཅག་གི་འགན་ཁུར་ཡིན། རང་གིས་མ་འཇོན་པ་རྒྱུ་མཚན་དུ་བྱས་ནས་གཞན་དམ་པ་ཚོ་ལ་སྒྲོ་བཏགས་དང་དཀྲོག་གཏམ། ངན་སྨོད་དང་ཕྲག་དོག་སོག་སོགས་སྤེལ་བ་ནི་རྒྱུ་མཚན་མ་ཤེས་པའི་བྱིས་པ་བསམ་མེད་ཅིག་ལས་མ་འདས། ང་ཚོ་ལ་ཞི་བདེའི་ཁོར་ཡུག་ཅིག་འཐོབ་པའི་ཕུགས་བསམ་ཡོད་ན། སྒེར་ཕན་དོར་ནས་སྤྱི་ཕན་བསམ་རྒྱུ་དང་། གནས་སྐབས་ལས་མཐར་གཏུག་ལ་དམིགས་རྒྱུ། འདི་ནས་མ་འོངས་པར་དྲན་རྒྱུ་ཧ་ཅང་གལ་ཆེའོ།།
| 