དབུས་གཞུང་ཐར་ཤུལ་དགོན་བཤད་སྒྲུབ་རབ་བརྟན་གླིང་།
  ༄༅། །བཙན་པོའི་མགར་གྱི་དྲ་བས་ཁྱེད་ལ་དགའ་བསུ་ཞུ། དེ་རིང་ནི་སྤྱི་ལོ 2018 ལོའི་ཟླ 11 ཚེས 17 རེས་གཟའ་སྤེན་པ་ཡིན། དྲ་གནས་ཉར་ཚགས།  གཙོ་ངོས་སུ་འགོད་པ། ནང་འཇུག འདི་ནས་ང་དང་གླེང་མོལ་བྱ།
གཙོ་ངོས།
ཆོས་ལུགས།
རྩོམ་རིག
ལོ་རྒྱུས།
རུས་རྒྱུད།
དམངས་སྲོལ།
སྒྱུ་རྩལ།
དཔལ་འབྱོར།
མི་སྣ།
སློབ་གསོ།
ཕྱོགས་སྟོན་་་་ གཙོ་ངོས།» ཆོས་ལུགས།» དགོན་སྡེ་ངོ་སྤྲོད། »དབུས་གཞུང་ཐར་ཤུལ་དགོན་བཤད་སྒྲུབ་རབ་བརྟན་གླིང་།
དབུས་གཞུང་ཐར་ཤུལ་དགོན་བཤད་སྒྲུབ་རབ་བརྟན་གླིང་།
རྩོམ་སྒྲིག་པ།  དོ་དམ་པ། སྤེལ་དུས། 2018/11/1ལྟ་ཀློག (688)རྩོམ་ཁུངས: ངེད་དྲ་བ།པར་འདེབ།


དབུས་གཞུང་ཐར་ཤུལ་དགོན་བཤད་སྒྲུབ་རབ་བརྟན་གླིང་།

     ཐར་ཤུལ་དགོན་བཤད་སྒྲུབ་རབ་བརྟན་གླིང་ནི་གསེར་ཆེན་རྫོང་ནས་ལྷོ་ནུབ་ཏུ་སྤྱི་ལེ་བརྒྱ་དང་སུམ་ཅུའི་མཚམས་སུ་རི་བོ་བཀྲ་ཤིས་འོད་དཀར་གྱི་ཉེ་འདབས་བྲག་དམར་བཀྲ་ཤིས་ཐང་རིང་ཞེས་པའི་ས་ཆར་ཆགས་ཡོད། གྲུབ་མཐའ་ནི་གསེར་མདོག་ཅོད་པན་འཆང་བའི་རིང་ལུགས་དཔལ་མཉམ་མེད་རི་བོ་དགེ་ལུགས་པ་ཡིན།
      དགོན་འདི་ཐོག་མར་ཕྱག་འདེབས་པ་བོ་རྭ་རྒྱའི་དགེ་རྒན་རྗེ་བཙུན་བྱམས་པ་བཟང་བོ་ཡིན་ལ་ཁོང་༼ཆུང་དུས་སུ་རྭ་རྒྱ་དགོན་པའི་ཆོས་སྒོར་ཞུགས།  དགུང་ལོ་བཅུ་དྲུག་ནས་དབུས་ཀྱི་སེ་ར་ཐེག་ཆེན་གླིང་དང་གསང་སྔགས་སྨད་རྒྱུད་གྲྭ་ཚང་དུ་མདོ་སྔགས་གཉིས་ལ་གཤིས་ཕྱིན་པར་སྦྱངས།བླ་མའི་ལུང་བསྟན་བཞིན་མདོ་སྨད་རྭ་རྒྱ་དགོན་དུ་ཆིབས་ཁ་བསྒྱུར།རྙེ་བློ་བཟང་ཆོས་ཀྱི་ཉི་མས་ཤིང་བཟའ་རིན་པོ་ཆེ་ལ་ངེས་པ་དོན་གྱི་དགེ་བཤེས་ཤིག་དགེ་རྒན་དུ་དགོས་ཚུལ་ཞུས་ངོར་རྗེ་འདི་བ་ཀླུ་ཚང་དགོན་པའི་དགེ་རྒན་དུ་མངགས།
       ཀླུ་ཚང་དགོན་དང་མང་རའི་ཐར་ཤུལ་དགོན་ཨ་ཚོགས་དགོན་ལྷག་པར་ཀླུ་ཚང་དགོན་པར་གཞུང་དང་ལམ་རིམ་གྱི་ཁྲིད་མང་བོ་བཏབ། ༽་སྤྱི་ལོ་1923སྟེ་རབ་ཚེས་ཆུ་ཕག་ལོར་ས་ཆ་འདི་སྔོན་ཁོང་གི་གྲྭ་སའི་དགེ་རྒན་སེ་རའི་དགེ་བཤེས་རྒྱལ་མཚན་ཐོགས་མེད་བཟང་བོའི་ལུང་བསྟན་དང་མཐུན་པར་གཟིགས་ཏེ་ཐར་ཤུལ་ཆོས་སྐྱོང་རྒྱ་མཆོ་མཆོག་གི་འབལ་མདོར་གུར་སྒར་བཏབ་པ་ཕྱོགས་གཉིས་སུ་གྱེས་པ་འདི་ཕྱོགས་སུ་ཆད་པ་དེ་ལ་གཞི་བྱས་ཏེ་ཕྱག་བཏབ་གནང་ཞིང་མ་དགོན་རྭ་རྒྱ་བཀྲ་ཤིས་འབྱུང་གནས་ཀྱི་རྒྱུད་གྲྭའི་ཕྱག་བཞེས་ངོས་གཙང་བ་ཇི་ལྟ་བ་བཞིན་ཆོ་ག་རེ་རེའི་འདོན་རྟ་དབྱངས་ཐིག་རྡུལ་ཚོན་གར་ཕྱག་རྒྱ་འབུལ་དཀྲོལ་སོགས་གྲྭ་མ་ཉམས་ཤིང་ཟུར་མ་ཆག་པར་དགོན་པ་རང་གི་ཕྱག་ལེན་ལ་ཐེབས་པ་ནས་ད་ལྟ་བའི་བར་དུ་དམ་པ་ཁོང་གི་འཕྲིན་ལས་ཀྱིས་ཁྱབ་ཅིང་གནས་ལ་ཁོང་གིས་ཞལ་ཆེམས་ལ་དགོན་འདིའི་རྩ་བའི་བདག་པོ་པཎ་ཆེན་ཐམས་ཅད་མཁྱེན་པ།ཤིང་བཟའ་རྡོ་རྗེ་འཆང་། འགྲོ་མགོན་ཐར་ཤུལ་རིན་པོ་མཆོག་གིས་མཛད་དགོས་ཞེས་བཀའ་ཕབས་པ་བཞིན་སྐུ་ཕྱོགས་ཐར་ཤུལ་ཚང་སྐུ་འཕྲེང་སྔ་ཕྱི་མང་བོས་འཛིན་སྐྱོང་ཁུར་བཞེས་གནང་ལ་ཆོས་ཐོག་ལ་རྒྱལ་ལོའི་སྨོན་ལམ་ཉིན་ལྔ།  གསུམ་པའི་སྒྲུབ་མཆོད་དངོས་གཞི་ལ་ཉིན་བདུན། མཆོད་པ་ཉིན་གསུམ། བཞི་བའི་བཅུ་བཞི་དང་བཅུ་ལྔ་གཉིས་ལ་སྨྱུང་གནས། དྲུག་པའི་བཅོ་ལྔ་ནས་དབྱར་གནས་བདུན་པའི་བཅོ་ལྔ་ནས་བརྒྱད་པའི་ཚེས་གཅིག་བར་མཆོད་པ་དང་སྒྲུབ་ཆེན་ཆོས་ཐོག་གཉིས། བཅུ་བའི་ཉེར་ལྔ་ནས་ཉེར་དགུའི་བར་དགའ་ལྡན་ལྔ་མཆོད་ཆེན་མོ།  བཅུ་གཅིག་པའི་ཚེས་གཅིག་ནས་གསུམ་བར་བཅའ་ཡིག བོད་ལོའི་ཉེར་གཉིས་ནས་ཉེར་དགུའི་བར་ཆོས་རྒྱལ་ལྕགས་མཁར་ཆེན་མོའི་ཆོས་ཐོག་སོགས་ཚུགས་ཡོད།

     སྐུ་འཕྲེང་གཉིས་པ་ཀླུ་ཚང་དགོན་དུ་སློབ་གཉེར་ལ་བྱོན་ནས་ཕྱིར་རང་དགོན་དུ་སྒོ་མང་ཡིག་ཆའི་སྟེང་འཆད་ཉན་བཙུགས། སྐུ་འཕྲེང་གསུམ་པ་མཆོག་ཀྱང་ཀླུ་ཚང་དགོན་ཆེན་དུ་སློབ་གཉེར་ལ་བྱོན་ནས་སྨིན་བྱེད་དབང་དང་གྲོལ་བྱེད་ཁྲིད་རྒྱབ་བརྟེན་ཚད་མ་ལ་སོགས་ལ་ཐུགས་གཞོལ་ཏེ་བཞུགས་པ་འདི་བཞིན་སྐུ་འཕྲེང་རིམ་བྱོན་གྱིས་ཐོས་བསམ་ཚེ་ལ་དྲིལ་ཏེ་དགོན་པ་རང་གི་བཅའ་ཡིག་ཇི་ལྟ་བཞིན་ཆོས་སྡེ་འདི་ཉིད་ལེགས་པར་བསྐྱངས་དང་སྐྱོང་བཞིན་པ་ལ་དགོན་པའི་ལྷ་སྡེ་གཙོ་བོ་ཐར་ཤུལ་སྡེ་དང་།སྟོང་འཁོར་སྡེ། མཆོད་རྟེན་སྡེ། བདུད་ཤུལ་སྡེ། སྒོ་མེ་ཆོས་རྗེ་མ་དང་སྒོ་མེ་ཉིན་ཆུ་མ། དཔལ་ཁ་ཕྱི་ནང་གི་སྒོ་མེ་དང་ཤ་སྦྲང་ཆུ་ཆ་ཧྲོང་བོ་ལྔ་རྒྱ་མ་སོགས་ཀྱིས་རྒྱབ་སྐྱོར་མཐུན་སྦྱོར་ལ་བརྟེན་འདུ་ཁང་ཀྭ་བརྒྱ་མ་དང་།  མཆོད་ཁང་ཉིས་ཐོག་གྱན་ཉི་ཤུ་ཅན་གཅིག མགོན་ཁང་ཉིས་ཐོག་ཅན་གྱན་ཉི་ཤུ།  ཐར་ཤུལ་བྱམས་ཁང་ཆེན་མོ།  དགེ་རྒན་ནང་ཆེན།  སྐུ་ཕྱོགས་ཐར་ཤུལ་ནང་ཆེན། ཨ་ལགས་སོ་མའི་ནང་ཆེན། ཐར་ཤུལ་ཁྲི་རྒན་ནང་ཆེན། ཐར་ཤུལ་ཞབས་དྲུང་ནང་ཆེན་བཅས་བླ་བྲང་ལྔ་དང་གྲྭ་ཤག་བཞི་བཅུ་ལྷག་ཡོད།

      དགོན་པའི་མཐའ་སྐོར་དུ་མཆོད་རྟེན་བརྒྱད་པ། མ་ཎི་འཁོར་ལོ་བརྒྱ་ལྷག་བཅས་ལོ་སྔ་ཕྱི་མང་བོ་ལ་ལེགས་འགྲུབ་བྱུང་ཡོད།

      ད་ལྟ་བླ་གྲྭ་བརྒྱ་ལྷག་རྒྱུན་བཞུགས་གནང་ཡོད་ལ་ཀླུ་ཚང་དགོན་ཆེན་གྱི་དགེ་བའི་བཤེས་གཉེན་ཤེས་རབ་བསྟན་དར་མཆོག་ཞུས་ཏེ་ལམ་ཁྲིད་བློ་སྦྱོང་རིག་གནས་སོགས་ཀྱི་འཆད་ཉན་གྱི་རྒྱུན་སྤེལ་དང་། དགོན་པ་རང་གི་གྲྭ་རྒན་གཞོན་བར་མ་མཐའ་དག་གིས་རང་ནུས་ཅི་ལྕོགས་ཀྱིས་གཏོར་མ་བཅའ་བཟོ་དཀྱིལ་འཁོར་བྲི་སྒྲུབ་ཆོས་ཐོག་དུས་མཆོད་སོགས་དང་བརྡ་སྤྲོད་རིག་གནས་བློ་སྦྱོང་ལམ་སྔགས་སོགས་ལ་ཐོས་བསམ་སྒོམ་པ་སོགས་ཀྱིས་འཇམ་མགོན་བླ་མ་ཙོང་ཁ་བ་ཆེན་པོ་ཐུགས་དགྱེས་པའི་མཆོད་པའི་སྤྲིན་ཕུང་འབུལ་བ་འདི་བཞིན་ལགས་སོ།།


དྲྭ་ཚིགས་གཙོ་སྐྱོང་བ། ཁཱ་ཤེས་རབ་རྒྱ་མཚོ། རྩོམ་སྒྲིག་པ། མགར་ཨ་སངས། མགར་ཚེ་རིང་བཀྲ་ཤིས། གླིང་དུག་སྦྲང་།
འདྲེན་བཀོལ:

  དཔྱད་གཏམ ( 0 )ཡོད།
དཔྱད་གཏམ་སྤེལ་ས།
སྤེལ་མཁན།
བཤེར་གྲངས།
yvo2 བཤེར་གྲངས་ཁ་སྐོང་བྱོས། ཡིག་འབྲི་བཞི་ལས་མང་མི་རུང་། ཡིག་འབྲི་བཞི་ལས་ཉུང་མི་རུང་།
ནང་དོན་བྲི་རོགས། ཡིག་འབྲི་གསུམ་ལས་ཉུང་བ་སྤེལ་མི་རུང་། ཡིག་འབྲི་སུམ་སྟོང་ལས་མང་བ་སྤེལ་མི་རུང་།
ནང་དོན་ཡིག་འབྲི་སུམ་སྟོང་ལས་བརྒལ་མི་རུང་། བྲིས་ཟིན་ཡིག་འབྲི།    
མིག་སྔར་འདི་རུ་དཔྱད་གཏམ་སྤེལ་མཁན་མ་བྱུང་།
ལྟ་ཀློག་གྲངས་ཀ
12609639
དྲ་ཚིགས་བཟོ་སྐྲུན།
 
འབྲེལ་གཏུག་བྱ་ཡུལ།   ཁ་པར།  15283703999 13909418876 QQ:516617821    E-mail:tbmgar@163.com
པར་དབང་བཙན་པོའི་མགར་གྱི་དྲ་བ་ལས་གཞན་ལ་མེད།
网站备案号:蜀ICP备13002975号