རྩོམ་པ་པོ། རྫོགས་ཆེན་རིན་པོ་ཆེ།
རྒྱལ་བ་ཀུན་གྱི་གསང་གསུམ་སྒྱུ་མའི་འཕྲུལ། །
འགྲོ་བའི་མོས་ངོར་འདྲེན་པའི་བསྐུར་བཞེངས་པ། །
རྩ་བརྒྱུད་བླ་མས་བྱིན་རླབས་དངོས་གྲུབ་ཆར། །
མོས་ཁམས་དགེ་བའི་ཞིང་སར་རྟག་འཇོ་ཤོག །
སྔོན་བསགས་མ་དམན་དལ་འབྱོར་ལུས་རྟེན་རྙེད། །
སྔོན་ལས་མ་དམན་ལས་འཕྲོ་ཆོས་ལ་སད། །
ལས་སྨོན་མ་དམན་མཚན་ལྡན་བླ་མ་མཇལ། །
ཚེ་འདི་དོན་ལྡན་མཛོད་ཅིག་སྒྲུབ་བརྩོན་མ། །
ཚེ་སྲོག་མི་རྟག་ནམ་མཁའི་གློག་དང་འདྲ། །
འཇིག་རྟེན་སྣང་ཤེས་འཇའ་ཚོན་རི་མོ་བཞིན། །
གང་ལ་བསམ་ཡང་སྙིང་པོ་མེད་པའི་ཚུལ། །
ཤེས་ནས་ངེས་འབྱུང་བསྐྱེད་ཅིག་སྒྲུབ་བརྩོན་མ། །
སྲིད་པ་ལས་ཀྱིས་བཀོད་པའི་འཁོར་བ་འདིར། །
སྡུག་བསྔལ་ཁུར་གྱིས་ནོན་པའི་འགྲོ་བ་ཀུན། །
འདྲེན་པའི་དཔལ་དུ་འདུན་པ་བྱང་ཆུབ་སེམས། །
སྨོན་འཇུག་སེམས་མཆོག་བསྐྱེད་ཅིག་སྒྲུབ་བརྩོན་མ། །
འཁྲུལ་བའི་སྣང་ཞེན་བདེན་པ་མ་བཟློག་ན། །
འཁོར་བའི་གནས་ལས་གྲོལ་བའི་ཐབས་མེད་པས། །
ཟབ་མོ་དབུ་ཕྱག་མཉམ་ཉིད་རྫོགས་པ་ཆེའི། །
ལྟ་བའི་གནད་ལ་གཞོལ་ཞིག་སྒྲུབ་བརྩོན་མ། །
དེ་ཡང་སྔོན་འགྲོ་གནད་དུ་མ་ཕྱིན་ན། །
རྨང་མེད་མཁར་དང་གྱང་མེད་རི་མོ་བཞིན། །
དངོས་གཞི་ཆོས་ཀྱི་གོལ་ས་མི་ཆོད་པས། །
ལམ་གྱི་རིམ་པ་མ་ནོར་སྒྲུབ་བརྩོན་མ། །
མདོར་ན་ཅིར་སྣང་སྣང་གྲགས་དྲན་བསམ་ཀུན། །
ཡེ་ཤེས་སྒྱུ་འཕྲུལ་དྲྭ་བའི་རོལ་བ་རུ། །
ཤེས་ཤིང་དག་མཉམ་ལྟ་བའི་གདེངས་ལྡན་ན། །
བསྐྱེད་རྫོགས་རྫོགས་ཆེན་ལམ་གནད་ཀུན་ཚང་བས། །
ལྟ་སྒོམ་མཐོན་པོར་སྙེགས་ཤིག་སྒྲུབ་བརྩོན་མ། །
གང་སྣང་ལྷ་དང་བླ་མའི་རོལ་བ་རུ། །
འཆར་བའི་ཉམས་དང་ཐུགས་ཡིད་བསྲེ་ཤེས་ན། །
འདི་ཕྱི་བར་དོའི་གདམས་པ་དེས་ཆོག་པས། །
མན་ངག་གནད་དུ་དྲིལ་ཞིག་སྒྲུབ་བརྩོན་མ། །
ད་རེས་ཆོས་མིན་ལོག་ལམ་མ་འཕྱན་པར། །
ཆོས་ལ་སེམས་ཤིང་ཉིན་མཚན་ཆོས་ཀྱིས་འཚོ། །
ཆོས་བཞིན་སྤྱོད་པ་འདི་བདེ་ཕྱི་སྐྱིད་ཕྱིར། །
མི་ཚེ་ཆོས་ལ་དྲིལ་ཤིག་སྒྲུབ་བརྩོན་མ། །
ཆོས་ལ་བསྐུལ་ཞིང་སྒྲུབ་ལ་བརྩོན་པར་བསྐྱེད་པའི་གཏམ་བསྟན་འཛིན་ལུང་རྟོགས་ཉི་མས་སྨྲས་པ་དོན་དང་ལྡན་པ་གྱུར་ཅིག་གུ། །།
| 