ཕྱག་དེབ་གསར་བ་འགྲེམ་བརྡ།
དེ་རིང་ངས་ཁྱེད་རྣམས་ལ་ཕྱག་དེབ་གསར་པ་ཞིག་ངོ་སྤྲོད་བྱ།
ཕྱག་དེབ་དེ་ནི་ཁམས་སྟོང་སྐོར་དགོན་གྱི་རྐང་འཛིན་དགེ་རྒན་སེར་སྨད་དགེ་བཤེས་ཉི་མ་མཆོག་གིས་མཛད་པའི་༼གཅིག་ཏུ་བསྡུས་པའི་ཚོམས།༽ཞེས་པ་ཡིན་ལ།
གསུང་རྩོམ་འདིའི་ནང་དུ་བཅོམ་ལྡན་འདས་ཀྱིས་རང་ཅག་ལ་ཕ་མ་རྣམས་བཀའ་དྲིན་བླ་ལྷག་ཏུ་ཆེ་བར་གསུངས་པ་ཕ་མའི་མདོ་ལ་འགྲེལ་བ་གནང་བའི་(ཕ་མའི་མདོའི་འགྲེལ་པ་གཞན་ཕན་འོད་སྣང་།)ཞེས་པ་དང་། (འགྲེལ་པ་ག་ལས་འཇིགས་མེད་རྩོམ་པ་པོ་ཀླུ་སྒྲུབ་ཡིན་མིན་ལ་དཔྱད་པ། )(ཞི་ལྷག་གི་སྐོར་ལ་དཔྱད་པ།)(གཤིས་ལུགས་སུ་གྲུབ་པ་ཡོད་མེད་ལ་དཔྱད་པ།)སོགས་དབུ་མའི་བགྲོ་གླེང་ཐེངས་དུ་མ་ལ་ཕུལ་བའི་དཔྱད་རྩོམ་ཁག་དང་། ཁོང་གི་ཉམས་མྱོང་དང་འབྲེལ་ནས་བརྩམས་པའི་(བསླབ་བྱ་ཚིགས་བརྒྱད་མ།)དང་། (བསླབ་བྱ་གནད་ལ་རེག་པ།)སོགས་བསླབ་བྱ་ཁག་དང་། (མི་རྟག་དྲན་སྐུལ་)སོགས་སྐྱོ་འགུར་གྱི་སྐོར། ཐུབ་དབང་དང་རྗེ་བླ་མའི་བསྟོད་པ་སོགས་བསྟོད་པའི་སྐོར།
ལྷག་པར་དུ་དེང་གི་དུས་ལ་དགེ་འདུན་པས་དད་རྫས་སམ་དཀོར་ལ་ཅིས་ཀྱང་གཟབ་དགོས་པར་གསུངས་པ་(དགེ་འདུན་གྱི་དད་རྫས་སྐོར།)ཞེས་པ་དང་། (དགེ་འདུན་གྱི་ཁ་ཟས་གཙང་མ་བཟོ་དགོས་པའི་སྐོར།)སོགས་ཚིགས་བཅད་ལྷུག་གི་གསར་རྩོམ་མང་པོའི་སྟེང་དུ་སྔར་བརྩམས་ཟིན་པའི་ཚིགས་བཅད་ཐོར་བུའི་རིགས་ལག་སོན་གང་བྱུང་རྣམས་བསྣན་ཏེ་ཕྱོགས་གཅིག་ཏུ་བསྡུས་ནས་དེབ་གཟུགས་སུ་བསྐྲུན་པ་ལ་རྩོམ་སྒྲིག་པས་"གཅིག་ཏུ་བསྡུས་པའི་ཚོམས་"ཞེས་བཏགས་པ་ཡིན་ནོ། །
སྤྱིར་དགེ་བཤེས་ཁོང་གི་གསུང་རྩོམ་རྣམས་ཧ་ཅང་གོ་བདེ་ཞིང་འགྲོས་གཙང་ལ། མི་སེར་དཀྱུས་མ་ཞིག་གིས་བཀླགས་པས་ཀྱང་བརྗོད་བྱ་ལམ་མེར་རྟོགས་ནུས་པ་དེ་ནི་ཁོང་གི་རྩོམ་རྩལ་ཡིན་སྲིད་ལ། མ་ཟད་ཁོང་གི་རྩོམ་ལ་བསྔགས་བརྗོད་མཛད་མཁན་ཡང་མི་ཉུང་བ་མཆིས་མོད་འདིར་བརྗོད་མི་སྤྲོ་ལ། ཚིགས་བཅད་རྣམས་སྙན་ངག་གི་ལམ་ནས་བརྗོད་ན་རིགས་རང་བཞིན་བརྗོད་པ་རྐྱང་རྐྱང་ལས་རབ་བཏགས་སོགས་ཀྱིས་བརྒྱན་པ་ཧ་ཅང་ཉུང་བས། ལས་དང་པོ་བ་རྣམས་རྩོམ་ལ་འཇུག་པར་འདོད་ན་ནི། འདིའི་སྟེང་ནས་རྩོམ་ལ་འཇུག་ན་འཇུག་བདེ་ཞེས་སྨྲ་སྤོབས་སོ། །
ཞེས་པ་འདི་ནི་ཧོར་ཞོགས་སྤྲིན་གྱིས་ཁམས་སྟོང་སྐོར་དགོན་སློབ་གཉེར་ཁང་ནས་ཟླ་ཚེས་བཟང་པོར་བྲིས།
| 
