ཇོ་དར་གྱི་ཕན་ཡོན་ཕྱོགས་བསྡུས།
  ༄༅། །བཙན་པོའི་མགར་གྱི་དྲ་བས་ཁྱེད་ལ་དགའ་བསུ་ཞུ། དེ་རིང་ནི་སྤྱི་ལོ 2019 ལོའི་ཟླ 11 ཚེས 23 རེས་གཟའ་སྤེན་པ་ཡིན། དྲ་གནས་ཉར་ཚགས།  གཙོ་ངོས་སུ་འགོད་པ། ནང་འཇུག འདི་ནས་ང་དང་གླེང་མོལ་བྱ།
གཙོ་ངོས།
ཆོས་ལུགས།
རྩོམ་རིག
ལོ་རྒྱུས།
རུས་རྒྱུད།
དམངས་སྲོལ།
སྒྱུ་རྩལ།
དཔལ་འབྱོར།
མི་སྣ།
སློབ་གསོ།
ཕྱོགས་སྟོན་་་་ གཙོ་ངོས།» ཆོས་ལུགས།» རྒྱུན་ཤེས་ཆོས་སྤྱོད། »ཇོ་དར་གྱི་ཕན་ཡོན་ཕྱོགས་བསྡུས།
ཇོ་དར་གྱི་ཕན་ཡོན་ཕྱོགས་བསྡུས།
རྩོམ་སྒྲིག་པ།  དོ་དམ་པ། སྤེལ་དུས། 2019/4/11ལྟ་ཀློག (1718)རྩོམ་ཁུངས: ངེད་དྲ་བ།པར་འདེབ།

༄༅། །ཇོ་དར་གྱི་ཕན་ཡོན་ཕྱོགས་བསྡུས་ཀྱི་ཡི་གེ་ཀུན་གསལ་

ཕན་བདེའི་ཉིན་བྱེད་ཅེས་བྱ་བ་བཞུགས་སོ། །


འཕགས་པ་ཐུགས་རྗེ་ཆེན་པོ་ལ་ཕྱག་འཚལ་ལོ།

     ༈ ཇོ་དར་གྱི་ཕན་ཡོན་བརྗོད་ན། དུས་གསུམ་རྒྱལ་བ་ཐམས་ཅད་ཀྱི་འཕྲིན་ལས་གཅིག་བསྡུས་རྒྱལ་དབང་ཀརྨ་པ་སྐུ་རབས་བདུན་པ་ཆོས་གྲགས་རྒྱ་མཚོ་མཆོག་གི་ཞལ་སློབ་ཉག་རོང་ར་ལང་ནས་ཡིན་པ་ཉག་ཕྲུག་བྱང་ཆུབ་སེང་གེར་གཤིན་རྗེ་ཆོས་ཀྱི་རྒྱལ་པོས་གསུངས་པའི་ཐུགས་རྗེ་ཆེན་པོའི་ཇོ་དར་གྱི་ཕན་ཡོན་ལྟར་ན། ཐུགས་རྗེ་ཆེན་པོའི་རྟེན་བཀོད་ཚུལ་ཇི་ལྟར་ལགས་ཞུས་པས། འདི་སྐད་གསུངས།འོ་དེ་ལྟར་ན་ཐུགས་རྗེ་ཆེན་པོའི་སྐུ་གསུང་ཐུགས་ཀྱི་རྟེན་འབྱུང་བ་ལྔ་ལ་བཀོད་པར་བྱའོ། །

      དེ་ལ་སྐུ་རྟེན་བཀོད་པ་ནི། ཐུགས་རྗེ་ཆེན་པོའི་ལྷ་ཚོགས་བྲིས་པ་དང་། འབུར་དུ་གཏོད་པ། ལུགས་སུ་བླུག་པ། འབག་སྐུ་བཞེངས་པ་དང་། དེ་རྣམས་ལ་རབ་གནས་ལེགས་པར་བྱེད། 

གསུང་གི་རྟེན་ནི། ཇོ་དར་ལ་ཡིག་དྲུག་བྲིས་ནས་ཆུ་བོ་ཆེན་པོའི་འགྲམ་དུ་བཙུགས་པ་དང་། འདུ་བ་ཆེན་པོའི་མཁའ་ལ་བཙུགས་པ་དང་། རི་ཆེན་པོའི་ཁ་ལ་བཙུགས་པ་དང་། རླུང་ཆེན་པོའི་ཁ་ལ་བཙུགས་པ་དང་། དེ་ལྟ་བུ་བྱས་ན་འཁོར་བ་དོང་ནས་སྤྲུགས་པའི་གདམས་ངག་ཡིན། 

     ཐུགས་ཀྱི་རྟེན་ལ་མཆོད་རྟེན་བཞེངས་པ་ཡིན། སྐུ་གསུང་ཐུགས་ཀྱི་ནང་ནས་ཀྱང་ཇོ་དར་ལས་ཕན་ཡོན་དང་དགེ་སྟོབས་ཆེ་བ་མེད། ཅེས་དང་། དེ་ནས་བདག་གིས་ཇོ་དར་ལ་ཡིག་དྲུག་བཀོད་ཚུལ་ཇི་ལྟར་ལགས་ཞུས་པས། འདི་སྐད་གསུངས་སོ། །སྣང་སྲིད་ཐམས་ཅད་ཐུགས་རྗེ་ཆེན་པོའི་སྐུ་ཡིན། བར་སྣང་ཐུགས་རྗེ་ཆེན་པོའི་མགྲིན་པ་ཡིན། ཉི་ཟླ་ཐུགས་རྗེ་ཆེན་པོའི་སྤྱན་ཡིན། སྐར་མ་ཐུགས་རྗེ་ཆེན་པོའི་ཚེམས་ཡིན། ཇོ་དར་ཐུགས་རྗེ་ཆེན་པོའི་ལྗགས་ཡིན། རླུང་ཐུགས་རྗེ་ཆེན་པོའི་དབུགས་ཡིན། འཁོར་འདས་མཉམ་ཉིད་ཐུགས་རྗེ་ཆེན་པོའི་ཐུགས་ཡིན། དེའི་ཕྱིར་ཇོ་དར་ལས་ཕན་ཡོན་དང་དགེ་སྟོབས་ཆེ་བ་མེད། ཇོ་དར་རླུང་གིས་ལན་གཅིག་བསྐྱོད་པའི་ཚེ། ས་རླུང་སེར་པོའི་ཞིང་ཁམས་ནས། ཡིག་དྲུག་དུང་ཕྱུར་འབུམ་ཕྲག་ཚར། ཆུ་རླུང་སྔོན་མོའི་ཞིང་ཁམས་ནས། ཡིག་དྲུག་དུང་ཕྱུར་འབུམ་ཕྲག་ཚར། མེ་རླུང་དམར་པོའི་ཞིང་ཁམས་ནས། ཡིག་དྲུག་དུང་ཕྱུར་འབུམ་ཕྲག་ཚར། ནམ་མཁའི་རླུང་གི་ཞིང་ཁམས་ནས།ཡིག་དྲུག་དུང་ཕྱུར་འབུམ་ཕྲག་ཚར། ཡེ་ཤེས་རླུང་གི་ཞིང་ཁམས་ནས། ཡིག་དྲུག་དུང་ཕྱུར་འབུམ་ཕྲག་ཚར། དེ་ལྟར་ཇོ་དར་རླུང་གིས་ལན་གཅིག་བསྐྱོད་པའི་ཕན་ཡོན་ནི། བདག་ཉིད་ཆོས་ཀྱི་རྒྱལ་པོ་མ་གཏོགས་པ། གཞན་གང་གིས་ཀྱང་བགྲང་བར་མི་ནུས་སོ། །

       ལན་གཅིག་བསྐྱོད་པའི་ཕན་ཡོན་ནི། དུས་གསུམ་ན་བཞུགས་པའི་སངས་རྒྱས་རྣམས་ཀྱིས་ཀྱང་བགྲང་བར་མི་ནུས་སོ། ཇོ་དར་མང་ཉུང་ཚད་རྣམས་གྲངས་ནི། རབ་བརྒྱ་རྩ་བརྒྱད། འབྲིང་ཉི་ཤུ་རྩ་གཅིག་ཐ་མ་ཡང་བཅུ་གསུམ་བྱ། རབ་འབྲིང་ཐ་མ་གང་ཐུབ་ཀྱང་གསེར་དངུལ་གྱི་དུམ་བུ་དང་ཁྱད་པར་མེད། སྡིག་བཤགས་དང་སྒྲོབ་སྦྱོང་ལ་ཇོ་དར་ལས་ལྷག་པ་མེད། ཇོ་དར་སོ་སོར་གངས་རིའི་ངོས་གཅིག་ལ་བཙུགས་ན། རི་དེ་ལ་གནས་པའི་སྲོག་ཆགས་ཐམས་ཅད་བདེ་བ་ཅན་དུ་སྐྱེ་བར་འགྱུར་རོ། ཆུ་ཆེན་པོ་ལ་བཙུགས་ན་ཆུ་དེས་གར་ཁྱབ་པའི་སེམས་ཅན་ཐམས་ཅད་དང་། ཆུ་དེ་འཐུང་བའི་སྲོག་ཆགས་དང་། ཆུ་དེ་ལ་གནས་པའི་སེམས་ཅན་ཐམས་ཅད་བདེ་བ་ཅན་དུ་སྐྱེ་བར་འགྱུར་རོ། རིའི་རྩེ་དང་རླུང་ཆེན་པོ་ལ་འཕྱར་ན། རླུང་དེས་གར་ཁྱབ་པའི་སེམས་ཅན་ཐམས་ཅད་བདེ་བ་ཅན་དུ་སྐྱེ་བར་འགྱུར་རོ།མི་གཅིག་ལ་མི་རྟ་བརྒྱའི་སྡིག་པ་ཡོད་ཀྱང་། ཇོ་དར་བརྒྱ་རྩ་བརྒྱད་བཙུགས་ན་སྡིག་པ་བྱང་བ་ལ་ཐེ་ཚོམ་མེད་དོ། །


     ཡུལ་དགོན་སོ་སོའི་ཁང་པའི་ཕྱོགས་བཞི་མཚམས་བརྒྱད་དབུས་དང་དགུ་ལ་བཙུགས་ན། ཇོ་དར་བཙུགས་པའི་ཁང་པ་དེ་ལ་གང་འདུག་པ་དང་འགྲིམ་པའི་སེམས་ཅན་ཐམས་ཅད་དང་། ཐ་ན་འབུ་སྦྲང་གྲོག་སྦུར་ཡང་གང་ཤི་ཚད་ཐམས་ཅད་བདེ་བ་ཅན་དུ་སྐྱེ་བར་འགྱུར་རོ། །

     ཟམ་པ་ལ་བཙུགས་ན་ཟམ་པ་དེ་ལ་འགྲིམ་པའི་སེམས་ཅན་ཐམས་ཅད་བདེ་བ་ཅན་དུ་སྐྱེ་བར་འགྱུར་ར་རོ། །

     རྒྱ་ལམ་ལ་བཙུགས་ན་དེ་ལ་གང་འགྲིམ་པའི་སེམས་ཅན་ཐམས་ཅད་བདེ་བ་ཅན་དུ་སྐྱེ་བར་འགྱུར་རོ། ཞེས་གསུངས་སོ། །དེ་ནས་བདག་གིས་ཇོ་དར་འདི་ལ་འབྲི་གཞི་དང་། ཡུ་བ་དང་། སྒྲོག་གུ་དང་། དར་ལྕེ་དང་། འབྲི་རྫས་དང་། བྲི་ལུགས་དང་། འཛུགས་པའི་དུས་ཚེས་ཇི་ལྟར་དགོས་ཞུས་པར། ཆོས་ཀྱི་རྒྱལ་པོའི་ཞལ་ནས། འདི་བྲི་བའི་གཞི་མ་ནི། རབ་ཟ་འོག་དང་། གོས་ཆེན་དང་། འབྲིང་དར་རས་ཕྲུགས་གསུམ། ཐ་མ་ཡང་སྣམ་ཤོག་གང་འཛོམས་ལ་བྱའོ། །

       དེའི་བྲི་རྫས་ནི། རབ་གསེར་དངུལ། འབྲིང་མཚལ་དང་རྒྱ་སྣགཐ་མ་བཙག་སོགས་གང་འཛོམས་ལ་བྱའོ། །

       ནང་དུ་རིན་པོ་ཆེ་སྣ་ལྔ་སྨན་དང་དྲི་བཟང་བསྲེས་ན་བཟང་། དར་ལྕེ་ནི་དཀར་པོ་ལ་དམར་པོ། སེར་པོ་ལ་ལྗང་ཁུ། དམར་པོ་ལ་སྔོན་པོ། སྔོན་པོ་ལ་ལྗང་ཁུ་གང་འཛོམས་ཀྱིས་ཆོག སྒྲོག་གུ་ནི། སྡིག་བཤགས་ལ་གང་འཛོམས་དང་། ཚེ་དང་བསོད་ནམས་འཕེལ་བར་འདོད་ན། ལུག་གི་སོག་པ་གཡས་པའི་བལ་ལ་བུ་ཚའམ་བུ་མོ་གཙང་མས་སྔ་དྲོ་ཉི་མ་རྩེ་ཤར་ལ་བཀལ་རྨེལ་བྱས་ལ་སྒྲོག་གུ་བཏགས། སྒྲོག་གདན་དཀར་པོ། ཡུ་བ་ནི་ཡེར་ཤིང་ལ་རྩེ་མོ་ནོར་བུའི་དབྱིབས་སུ་བྱས་ལ་ཚོན་རྩིས་བཀུས་ལ་ལེགས་པར་བྱའོ།།

       བཟློག་པ་ལ། ཡུ་བ་དྲག་པོའི་ཤིང་། བྲི་གཞི་ནག་པོ། སྒྲོག་གུ་ནག་པོ་དང་དར་ལྕེ་ནག་པོ། མགོ་ལ་རྩང་འཛུག་གོ།

      བྲི་ལུགས་ནི། ཨོཾ་དར་ལྕེ་དང་། ཧྲཱིཿ་དར་ཤིང་ལ་གཏད། ཇོ་དར་ངོས་རིང་ལ་ཡིག་དྲུག་སོགས་གང་ཚུད་གྱིས་གསུངས། དེ་ལ་བླ་མ་མཚན་ཉིད་དང་ལྡན་པས་རབ་གནས་དང་བཀྲ་ཤིས་བརྗོད་ལ། ཡར་ཚེས་བརྒྱད་དང་བཅུ་བཞི་བཅོ་ལྔ་གསུམ་ལ་འཛུག་གོ། ཞེས་གསུངས་སོ། །

      ཡང་ཆོས་ཀྱི་རྒྱལ་པོའི་ཞལ་ནས། འོ་རིགས་ཀྱི་བུ་ཁྱོད་ཀྱིས་འཇིག་རྟེན་འབྲང་མའི་ཁམས་ཀྱི་མི་རྣམས་ལ་ལེགས་པར་ཟློས་ཤིགརང་གི་སྒྲིབ་སྦྱོང་དང་གསོན་ཤ་དང་བསྔོས་ཤ་ཟོས་པ་དང་། སེམས་ཅན་གྱི་སྲོག་བཅད་པའི་སྡིག་བཤགས་ལ་ཡང་འདི་ལས་ལྷག་པ་མེད་གསུངས། མཚམས་མེད་པ་ལྔའི་སྡིག་པའི་ལས་བྱས་པ་ཡང་། ཇོ་དར་མང་པོ་བཙུགས་ན་བྱང་བ་ལ་ཐེ་ཚོམ་མེད་གསུངས། ཚེ་འདས་ཀྱི་བདུན་ཚིགས་དང་དགུང་ཞག་ལ་ཡང་ཇོ་དར་བཙུགས་པས་དེ་ལས་ལྷག་པ་མེད་གསུངས་སོ། །

     དེ་ནས་བདག་གིས་ནད་གདོན་ཞི་བ་ལ་ཇི་ལྟར་ལགས་ཞུས་པས། ཆོས་ཀྱི་རྒྱལ་པོའི་ཞལ་ནས། ནད་གདོན་ཞི་བ་ལ་ཇོ་དར་ལས་ལྷག་པ་མེད། མི་ནད་ཕྱུགས་ནད་སོགས་ནད་རིགས་བཞི་བརྒྱ་རྩ་བཞི། བགེགས་རིགས་སྟོང་ཕྲག་བརྒྱད་ཅུ། གློ་བུར་ཉི་ཁྲི་ཆིག་སྟོང་། ཡེ་འབྲོག་སུམ་བརྒྱ་དྲུག་ཅུ། དེ་ལ་སོགས་པའི་ལྟས་ངན་པ་ཐམས་ཅད་བཟློག་པ་ལ་ཐེ་ཚོམ་མེད་དོ། །

     གདོན་ཞི་བ་ལ་ཡང་ཇོ་དར་ལས་ལྷག་པ་མེད། ཇོ་དར་རླུང་གིས་སྟེང་ཕྱོགས་སུ་བསྐྱོད་པའི་ཚེ། སྟེང་ཕྱོགས་གཟའ་དང་ལྷའི་གདོན་ཐམས་ཅད་བཟློག་པར་འགྱུར་རོ། །

     ཤར་དུ་བསྐྱོད་པའི་ཚེ། དྲི་ཟའི་གདོན་ཐམས་ཅད་བཟློག

      ལྷོ་ཕྱོགས་སུ་བསྐྱོད་པའི་ཚེ། གཤིན་རྗེའི་གདོན་ཐམས་ཅད་བཟློག

      ནུབ་ཏུ་བསྐྱོད་པའི་ཚེ། ཀླུའི་གདོན་ཐམས་ཅད་བཟློག་པར་འགྱུར་རོ། །

     བྱང་ཕྱོགས་སུ་བསྐྱོད་པའི་ཚེ། གནོད་སྦྱིན་གྱི་གནོད་པ་ཐམས་ཅད་བཟློག་ཤར་ལྷོར་བསྐྱོད་པའི་ཚེ། མེ་ལྷའི་གནོད་པ་ཐམས་ཅད་བཟློགལྷོ་ནུབ་ཏུ་བསྐྱོད་པའི་ཚེ། སྲིན་པོའི་གནོད་པ་ཐམས་ཅད་བཟློགནུབ་བྱང་དུ་བསྐྱོད་པའི་ཚེ། རླུང་ལྷའི་གནོད་པ་ཐམས་ཅད་བཟློགབྱང་ཤར་དུ་བསྐྱོད་པའི་ཚེ། དབང་ལྡན་གྱི་གནོད་པ་ཐམས་ཅད་ཟློགགཞན་ཡང་མ་མོ་དང་། བདུད། བཙན་དང་རྒྱལ་པོ་དང་། ཡུལ་འདྲེ་འཁྱམས་པོ་དང་། ཐེའུ་རང་དང་། ཕོ་འདྲེ་དང་། མོ་འདྲེ། ཆེ་སྲི་དང་། ཆུང་སྲི་དང་། བྱད་ཁ་དང་། ཕུར་ཁ་དང་། དབལ་ཟོར་དང་། གཏོར་ཟོར་དང་། དེ་ལ་སོགས་པའི་ལྷ་མ་སྲིན་སྡེ་བརྒྱད་ཀྱི་མཐུ་བྱད་གནོད་གསུམ། གོད་འདྲེ་དང་གོད་སྲི་ལ་སོགས་པ་ལོག་འདྲེན་བདུད་ཀྱི་གདུག་པ་ཐམས་ཅད་བཟློག་པར་ཐེ་ཚོམ་མེད་དོ། །

     ཕྱུགས་ནད་བཟློག་པ་ལ་ཡང་ཇོ་དར་ལས་ལྷག་པ་མེད་དོ། །རྟ་ནད་འཚེར་རྩུབ་བཟློགནོར་ནད་གློ་གོར་ལྷོག་གསུམ་ཐམས་ཅད་བཟློགལུག་ནད་རེང་པ་དང་། རྟ་ནད་བཀོང་འབྲུམ་པ་དང་། ཁྱི་ནད་སྨྱོ་ནད། ཕག་ནད་འགག་པ་དང་། དེ་ལ་སོགས་པའི་མི་ནད་ཕྱུགས་ནད་ཐམས་ཅད་བཟློག་པར་འགྱུར་རོ། །

      སྲུང་འཁོར་ལའང་ཇོ་དར་ལས་ལྷག་པ་མེད། ཇོ་དར་འཁོར་ལོའི་གུར་ཁང་ཡིན། ཇོ་དར་རྡོ་རྗེའི་གུར་ཁང་ཡིན། ཇོ་དར་རིན་པོ་ཆེའི་གུར་ཁང་ཡིན། ཇོ་དར་པདྨའི་གུར་ཁང་ཡིན། ཇོ་དར་རྒྱ་གྲམ་གྱི་གུར་ཁང་ཡིན། ཇོ་དར་རལ་གྲིའི་གུར་ཁང་ཡིན། ཇོ་དར་ཐོ་བའི་གུར་ཁང་ཡིན། ཇོ་དར་མེའི་གུར་ཁང་ཡིན། ཇོ་དར་ཆུ་ཡི་གུར་ཁང་ཡིན། ཇོ་དར་རླུང་ལྷའི་གུར་ཁང་ཡིན། དེ་བས་ན་ལྷ་སྲིན་གང་གིས་ཀྱང་གནོད་པར་མི་ནུས་སོ། །


      སྔོན་གྱི་ལན་ཆགས་ཡིན་ན་མ་གཏོགས་པ་གནས་སྐབས་ཀྱི་རྐྱེན་ངན་ཐམས་ཅད་མི་བཟློག་པ་མི་སྲིད་གསུངས། དེ་ནས་བདག་གིས་ཚེ་དང་བསོད་ནམས་འཕེལ་བ་ལ་ཇི་ལྟར་ལགས་ཞུས་པས། ཆོས་ཀྱི་རྒྱལ་པོའི་ཞལ་ནས། ཚེ་དང་བསོད་ནམས་འཕེལ་བ་ལ་ཡང་ཇོ་དར་ལས་ལྷག་པ་མེད་གསུངས། རིགས་རྒྱུད་འཕེལ་བར་འདོད་ན་ཡང་འགྲུབ། རྟ་ནོར་ལུག་གསུམ་འདོད་ན་ཡང་འགྲུབ། གསེར་དངུལ་གཡུ་གསུམ་འདོད་ན་ཡང་འགྲུབ། ཁྲབ་རྟ་བེར་གསུམ་འདོད་ན་ཡང་འགྲུབ། དར་རས་ཕྲུགས་གསུམ་འདོད་ན་ཡང་འགྲུབ། གོས་ནོར་རྫས་གསུམ་འདོད་ན་ཡང་འགྲུབ། འབྲུ་དཀར་ནག་འདོད་ན་ཡང་འགྲུབ། གཞན་ཡང་དམན་པོ་རྣམས་ཀྱང་དྲགས་སུ་འགྲོ་བར་འགྱུར། དམངས་པོ་རྣམས་སྲིད་འཕེལ་བར་འགྱུར། སྡུག་བསྔལ་བ་ཐམས་ཅད་ཞི་ཞིང་སྐྱིད་པར་འགྱུར་རོ། །

     ཇོ་དར་འཛུག་པའི་མི་རྣམས་ལ། ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱིས་མགོན་སྐྱབས་དང་སྡོང་གྲོགས་མཛད་པ་ལ་ཐེ་ཚོམ་མེད་དོ་གསུངས་སོ། །

     དེ་ནས་ཡང་བདག་གིས་དྲག་པོའི་ལས་ལ་ཅི་ལྟར་ལགས་ཞུས་པས། ཆོས་ཀྱི་རྒྱལ་པོའི་ཞལ་ནས་འདི་སྐད་གསུངས། དགྲ་འདྲེ་བྱུར་གསུམ་འཇོམས་པ་ལ་ཡང་ཇོ་དར་ལས་ལྷག་པ་མེད། བདག་གཡུལ་ལས་རྒྱལ་བ་ལ་ཇོ་དར་ལས་ལྷག་པ་མེད་གསུངས། དགྲ་ཕྱོགས་ཐམས་ཅད་ཕམ་པར་འགྱུར། དཔེར་ན་མགོན་པོ་ལེགས་ལྡན་ནག་པོ་དང་མཚུངས། དགྲ་འདྲེ་ཐམས་ཅད་བྲག་རུལ་པ་ལ་ཐོག་ཕོག་པ་ལྟར་རྡུལ་དུ་བརླག་པར་འགྱུར་རོ། །

     ཇོ་དར་གྱི་ཕན་ཡོན་འདི་ནི་ཡི་གེ་འབྲི་ཀློག་སྤེལ་གསུམ་བྱེད་པའི་མི་རྣམས་ལུས་སེམས་བྲལ་མ་ཐག་ཏུ། སྤྱན་རས་གཟིགས་ཀྱི་མདུན་དུ་སྐྱེ་བར་ཐེ་ཚོམ་མེད། ཁྱེད་ཀྱིས་འཇིག་རྟེན་གྲོང་ཁྱེར་གང་གི་མི་རྣམས་ལ་ཇོ་དར་གྱི་བསྟན་པ་སྤེལ་ཅི་ཐུབ་བྱེད་པ་གལ་ཆེ་གསུངས། ཇོ་དར་འདི་སྤེལ་བ་ལ་རོགས་ལྡན་སྙིང་རུས་བྱེད་ཅིང་། གཞན་འཇིག་རྟེན་གྱི་བྱ་བ་བཏང་མ་ནུས་ཀྱང་། ཇོ་དར་འདི་སྤེལ་བའི་མི་དེ་རྣམས་ནི། ཁ་ལག་ཟས་ནོར་ཆོས་གསུམ་གྱི་འབྲེལ་བ་གང་ཡོད་དང་བཅས་པ། སྤྱན་རས་གཟིགས་ཀྱི་ཞིང་ཁམས་སུ་སྐྱེ་བར་ཐེ་ཚོམ་མེད། ཅེས་གསུངས་སོ། །

     གཞན་ཡང་། རྟ་སྟོང་ཕྲུགསྟོང་ཕྱེད་ལྔ་བརྒྱ་བས། ཇོ་དར་གཅིག་གིས་དགའ་ངེས་གྱིས། ལུག་གཡང་དཀར་སྟོང་ཕྱེད་ལྔ་བརྒྱ་བས། ཇོ་དར་གཅིག་གིས་དགའ་ངེས་གྱིས། ར་ཨག་ཚོམ་ཅན་སྟོང་ཕྱེད་ལྔ་བརྒྱ་བས། ཇོ་དར་གཅིག་གིས་དགའ་དུ་གྱིས། འབྲི་ཐེས་ལོ་སྟོང་ཕྱེད་ལྔ་བརྒྱ་བས། ཇོ་དར་གཅིག་གིས་དགའ་དུ་གྱིས། ཞིང་ཆུ་མ་སྟོང་ཕྱེད་ལྔ་བརྒྱ་བས། ཇོ་དར་གཅིག་གིས་དགའ་དུ་གྱིས། །མཁར་ཞིང་སྟོང་ཕྱེད་ལྔ་བརྒྱ་བས། ཇོ་དར་གཅིག་གིས་དགའ་དུ་གྱིས། བུ་ཚ་བོ་སྟོང་ཕྱེད་ལྔ་བརྒྱ་བས། ཇོ་དར་གཅིག་གིས་དགའ་ངེས་གྱིས། མཛོ་ཕོ་མཛོ་མོ་སྟོང་ཕྱེད་ལྔ་བརྒྱ་བས། ཇོ་དར་གཅིག་གིས་དགའ་ངེས་གྱིས། འཛམ་བུ་གླིང་དུ་སྲིད་ཚད་ཀྱི་ཟོག་ནོར་ཐམས་ཅད་བས་ངའི་མདུན་དུ་འོང་དུས་སུ་ཇོ་དར་གཅིག་གིས་དགའ་ངེས། དེ་གྱིས་ཤིག་ཕན་ཡོན་གང་ཡོད་བརྗོད་ན། ཕྱོགས་བཅུའི་སངས་རྒྱས་ཐམས་ཅད་ཀྱིས་ཀྱང་བརྗོད་པར་དཀའོ་གསུངས། ཞེས་པ་འདི་ནི་འདས་ལོག་བྱང་ཆུབ་སེང་གེ་ལ། གཤིན་རྗེ་ཆོས་ཀྱི་རྒྱལ་པོས་གདམས་པའོ། །

     དེ་ལ་སོགས་པའི་ཡོན་ཏན་ཚད་མེད་པ་གསུངས་ཀྱང་མདོར་བསྡུས་ཙམ་ཞིག་ལས་ཡི་གེའི་འཇིགས་ནས་མ་བྲིས་སོ། །ཞེས་སོགས་མང་དུ་གསལ་ལོ། །དེ་ལྟར་ཇོ་དར་ཕན་ཡོན་གྱི། ཡིག་དེབ་འདི་ཡང་དགེ་བསྐུལ་ཆེད། འབྲོང་པ་ཨ་དཀར་ཞེས་བྱིའི་ངོར། བྱ་བྲལ་སངས་རྒྱས་རྡོ་རྗེས་སྨྲས། དགེ་ལེགས་འཕེལ། །


དྲྭ་ཚིགས་གཙོ་སྐྱོང་བ་དང་དོ་དམ་པ། ཁཱ་ཤེས་རབ་རྒྱ་མཚོ།
འདྲེན་བཀོལ:
61.4K

  དཔྱད་གཏམ ( 0 )ཡོད།
དཔྱད་གཏམ་སྤེལ་ས།
སྤེལ་མཁན།
བཤེར་གྲངས།
0wp4 བཤེར་གྲངས་ཁ་སྐོང་བྱོས། ཡིག་འབྲི་བཞི་ལས་མང་མི་རུང་། ཡིག་འབྲི་བཞི་ལས་ཉུང་མི་རུང་།
ནང་དོན་བྲི་རོགས། ཡིག་འབྲི་གསུམ་ལས་ཉུང་བ་སྤེལ་མི་རུང་། ཡིག་འབྲི་སུམ་སྟོང་ལས་མང་བ་སྤེལ་མི་རུང་།
ནང་དོན་ཡིག་འབྲི་སུམ་སྟོང་ལས་བརྒལ་མི་རུང་། བྲིས་ཟིན་ཡིག་འབྲི།    
མིག་སྔར་འདི་རུ་དཔྱད་གཏམ་སྤེལ་མཁན་མ་བྱུང་།
ལྟ་ཀློག་གྲངས་ཀ
15646768
དྲ་ཚིགས་བཟོ་སྐྲུན།
 
འབྲེལ་གཏུག་བྱ་ཡུལ།   ཁ་པར།  15283703999 13909418876 QQ:516617821    E-mail:tbmgar@163.com
པར་དབང་བཙན་པོའི་མགར་གྱི་དྲ་བ་ལས་གཞན་ལ་མེད།
网站备案号:蜀ICP备13002975号