| 草原梦想欢迎你！ |
དེ་རིང་ནི་སྤྱི་ལོ
2024
ལོའི་ཟླ
4
ཚེས
26
རེས་གཟའ་པ་སངས་ཡིན། |
དྲ་གནས་ཉར་ཚགས། གཙོ་ངོས་སུ་འགོད་པ། ནང་འཇུག
|
 |
|
|
|
| མེ་ལོང་། | | རྩོམ་སྒྲིག་པ། དོ་དམ་པ། | སྤེལ་དུས། 2019/12/27 | ལྟ་ཀློག (21203) | རྩོམ་ཁུངས: ངེད་དྲ་བ། | པར་འདེབ། |
|
མེ་ལོང་།
གྱང་ཆག (རྫ་སྟོད།)
མེ་ལོང་ལས་དུས་ཚོད་བཞུར་འགྲོ། མེ་ལོང་ལས་ལོ་ཟླ་རྒས་འགྲོ།
མེ་ལོང་ལས་བྱ་ཁྱུ་གནམ་ལ་འཕུར་འགྲོ། མེ་ལོང་ལས་མེ་ཏོག་གི་ནམ་ཟླ་ཡལ་འགྲོ། མེ་ལོང་ལས་ཡོད་ཚད་རྒས་སུ་བཅུག་འགྲོ།
ཉི་མ་འཆར་ཐེངས་རེ་ལ་འཛམ་གླིང་ཕྱེད་ཀ་བཟུང་མྱོང་བའི་མེས་པོའི་ལག་རྗེས་དྲན་འོངས། ཟླ་བའི་ཕྱོགས་སུ་མིག་ཟུང་ཅེར་ཐེངས་རེ་ལ་ཁྱེད་ཀྱི་བཞིན་རས་སྨུག་པོ་དེ་དྲན་འོངས།
ཚེ་སྲོག་རླུང་ལ་བརྡར་བའི་དར་ལྕོག་རྙིངས་རལ་དག་མཐོང་ཐེངས་རེར་བདག་དང་བདག་གི་སྙན་ངག་དྲན་འོངས།
རྫ་ཆུའི་རླབས་རིས་ཀྱི་གཉེར་མ་རུ་འོད་ཟེར་ཆམ་ཆམ་འཕྲོ་ཐེངས་རེར་སྙན་ངག་པ་སྐྲ་ལོ་རིང་པོ་ཅན་ཞིག་དྲན་ཡོང་ཨང་།
མཚན་མོ་འདིར། ངས་བོད་གླུ་སྙན་མོ་ཞིག་ལ་རྣ་བ་བླགས་ཏེ།
རྫ་ཆུ་སྔོན་མོའི་འགྲམ་ངོགས་ལ་འགྲེང་དུས།
སྟོང་བསམ་གྱི་མེ་ལོང་ངོས་སུ། རབ་རིབ་ཏུ་གྱུར་བའི་ངའི་མེས་པོའི་ལོར་རྒྱུས་ཀྱི་གསང་བ་རེ་རེ་དང་བདེན་ལུགས་ཀྱི་ལྟ་བ་རེ་རེར་འོད་དུ་འཚེར་གྱིན་འདུག་ནའང་། པོ་ཏ་ལའི་རྒྱ་ཕིབས་ཀྱི་གསེར་འོད་དང་ས་ཡ་དྲུག་གི་མིག་ཀོང་ན་འཁྱིལ་བའི་སྙན་ངག་གི་མཆོད་པ་འཐོང་ཐུབ་མི་འདུག་པས། ཁོ་བོའི་སེམས་ལ་དགུན་ཁའི་གྲང་རླུང་ཁུར་བའི་ཕུག་རོན་ཞིག་བབས་འོངས་པ་དང་ཅི་འདྲའི་མཚུངས་ཨང་།
ཟླ་འོད་མོག་པའི་མཚན་ལྗོངས་འདིར། མེ་ལོང་གི་ངོས་སུ།
སྒྱུ་འཕྲུལ་དང་སྐར་མདའ་ཡིས་བཏེགས་པའི་གངས་རིའི་རྣམ་ཤེས་དང་བརྩེ་དུང་གི་རྒྱ་མཚོ། ད་དུང་། རེ་སྒུག་གི་བྱ་ཁྱུ།
རེ་སྨོན་གྱི་ཕུགས་བསམ། ཡོད་ཚད་ལ་སྲ་ཞིང་མཁྲེགས་པའི་ལྕགས་ཀྱི་སྒོ་ཟྭ་བརྒྱབ་པས། ཁོ་བོའི་མགོ་བོ་དགྱེ་ཐུབ་བྲལ་ལ་སྙན་ངག་གི་གཤོག་པ་ཡང་གང་སར་བརྐྱངས་བར་དཀའ།
དོ་ནུབ། དགུན་གཞུང་གི་མཚན་ངོགས་སུ་རྫ་ཆུ་སྔོན་མོ་ངའི་མིག་མདུན་ནས་ཤག་ཤག་ཏུ་བཞུར་བའི་འབབ་རྒྱུན་ལས་ཙག་རླུང་གིས་བཅོས་པས་ཆབ་རོམ་དུ་གྱུར་སོང་།
དགུན་རླུང་འདི་ཧམ་སེམས་དང་གདུག་རྩུབ་བཅས་ཏེ་རྒྱུ་ཡོང་ཞིང་།མཚམས་མཚམས་སུ། ད་གཟོད་དགུན་རླུང་དེས་ང་རང་རྒྱ་མཚོ་ཆེན་པོ་ཞིག་གི་ནང་དུ་དེད་སོང་བའི་སྣང་བ་ཤར་ཞིང་།
སྐབས་སྐབས་སུ།ཞི་མོ་སྐྲ་རིང་མ་ཞིག་གིས་ང་ལ་འགྲམ་ལྕག་ཡང་ཡང་བཞུས་ཀྱིན་འདུག་པའི་ཚོར་བ་ཞིག་སྐྱེས་ནའང་།
ངའི་སྟོང་བསམ་གྱི་མེ་ལོང་ལས་བར་སྐོར་གླིང་གི་སྤུན་ཟླ་ཚོའི་རྣམ་ཤེས་ཀྱི་གསོལ་འདེབས་དྲོད་མོས་ངའི་སེམས་ལ་མཆོད་མེ་སྦར་ཞིང་རེ་སྨོན་གྱི་རླུང་རྟ་སྤུར་གྱིན་འདུག་པ་ངས་གློ་བར་དུ་རྟོགས་སོང་།
མེ་ལོང་དུ། འཇའ་ཚོན་གྱོན་པའི་ཕྱེ་ལེབ་ཅིག་འཕུར་གྱིན་འདུག
མེ་ལོང་དུ། ངའི་སྙན་ངག་གི་སྙིང་ཁ་རུ་རྣག་ཁྲག་ཐིགས་ཀྱིན་འདུག
མེ་ལོང་དུ། གངས་རི་དང་རྩྭ་ཐང་ལ་མུན་ནག་འཐིབ་ཀྱིན་འདུག
མེ་ལོང་དུ། ངའི་རྣམ་ཤེས་རྒྱང་རིང་ལ་གཡེང་གིན་འདུག
2019.12.25ཉིན་གྱི་དགོང་མོར་རྫ་ཆུའི་འགྲམ་ནས་བྲིས་པའོ། །
|
| |
གཙོ་སྐྱོང་བ་དང་དོ་དམ་པ། ཁཱ་ཤེས་རབ་རྒྱ་མཚོ།
རྩོམ་སྒྲིག་པ། མགར་ཚེ་རིང་བཀྲ་ཤིས།
|
|
|
འདྲེན་བཀོལ: |
|
| |
དཔྱད་གཏམ (
0
)ཡོད། |
 |
|
|
|
| མིག་སྔར་འདི་རུ་དཔྱད་གཏམ་སྤེལ་མཁན་མ་བྱུང་། |
|
|
|
|
|
|
|
འབྲེལ་གཏུག་བྱ་ཡུལ། ཁ་པར། 草原梦想15283703999 E-mail:tbmgar@163.com |
| པར་དབང་བཙན་པོའི་མགར་གྱི་དྲ་བ་ལས་གཞན་ལ་མེད། |
| 蜀ICP备13002975号-1 |
|
|
|