རླུང་རྟ་དང་རླུང་རྟའི་སྟག་སེང་ཁྱུང་འབྲུག་གི་སྐོར།
  ༄༅། །བཙན་པོའི་མགར་གྱི་དྲ་བས་ཁྱེད་ལ་དགའ་བསུ་ཞུ། དེ་རིང་ནི་སྤྱི་ལོ 2020 ལོའི་ཟླ 10 ཚེས 31 རེས་གཟའ་སྤེན་པ་ཡིན། དྲ་གནས་ཉར་ཚགས།  གཙོ་ངོས་སུ་འགོད་པ། ནང་འཇུག འདི་ནས་ང་དང་གླེང་མོལ་བྱ།
གཙོ་ངོས།
ཆོས་ལུགས།
རྩོམ་རིག
ལོ་རྒྱུས།
རུས་རྒྱུད།
དམངས་སྲོལ།
སྒྱུ་རྩལ།
དཔལ་འབྱོར།
མི་སྣ།
སློབ་གསོ།
ཕྱོགས་སྟོན་་་་ གཙོ་ངོས།» ཆོས་ལུགས།» རྒྱུན་ཤེས། ཆོས་སྤྱོད། »རླུང་རྟ་དང་རླུང་རྟའི་སྟག་སེང་ཁྱུང་འབྲུག་གི་སྐོར།
རླུང་རྟ་དང་རླུང་རྟའི་སྟག་སེང་ཁྱུང་འབྲུག་གི་སྐོར།
རྩོམ་སྒྲིག་པ།  དོ་དམ་པ། སྤེལ་དུས། 2020/1/9ལྟ་ཀློག (1474)རྩོམ་ཁུངས: ངེད་དྲ་བ།པར་འདེབ།

རླུང་རྟ་དང་རླུང་རྟའི་སྟག་སེང་ཁྱུང་འབྲུག་གི་སྐོར།


      ཆོས་ཀྱི་ལུགས་སུ་འབྱུང་བ་ལྔའི་ཁམས་བཤད་པའི་ཚེ་འབྱུང་བ་ལྔ་ཞེས་པ་ནི་ས་དང་ཆུ་དང་མེ་དང་རླུང་དང་ནམ་མཁའོ་ཞེས་ཡོངས་གྲགས་སུ་ཆགས་ཡོད་པ་ལ་འབྱུང་བའི་ཁམས་དང་དེ་འབྲེལ་འབྱུང་བའི་རྡུལ་ཕྲན་ཚོགས་པ་བཅས་ལ་༼འབྱུང་བ༽ཞེས་ཟེར།

   གནའ་བོའི་སྐབས་སུ་འབྱུང་ཁམས་ལྔའི་བྱེད་ལས་ཁྱད་པར་ཅན་གྱི་ནུས་པ་དེ་དག་ནི་སེང་འབྲུག་ཁྱུང་སྟག་རྟ་བཅས་སེམས་ཅན་གྱི་གཟུགས་རིས་ལྔས་མཚོན་པ་སྟེ་ནམ་རྒྱུན་དུ་བོད་ལ་དར་སྲོལ་ཆེ་བའི་རླུང་རྟའི་ངོས་རིས་སུ་ཡོད་པའི་སྲོག་ཆགས་ཀྱི་གཟུགས་རིས་ལྔ་པོ་དེ་དག་རེད། རླུང་རྟ་ནི་མགོན་ཤེས་ལྷ་བོན་གྱིས་བྱེ་བྲག་སྐྱེ་བོ་ཕོ་མོ་སུའང་རུང་བ་དེ་དག་ནི་འབྱུང་ཁམས་ཀྱི་ནུས་པ་གུད་ཡོད་ན་གསོ་བ་དང་། ཉམས་ཡོད་ན་བསྐྱེད་པ། ཆད་པ་ཡོད་ན་བསྲིང་བ། འཁྲུགས་པ་ཡོད་ན་མཐུན་པར་བསྡེབས་པ་སོགས་ཀྱི་ཆ་རྐྱེན་ཤིན་ཏུ་གལ་གནད་ཆེ་བ་ཞིག་ཏུ་བརྩི་སྲོལ་ཡོད། དེའི་ཚུལ་ཇི་ལྟར་ཡིན་པའང་སའི་ཁམས་ལས་གྲུབ་པའི་རྡུལ་གྱི་ཕུང་པོ་ནི་རི་བོ་ཡིན། སའི་རྡུལ་གྱི་ཕུང་པོའི་སྙིང་པོ་གངས་ཅན་གྱི་རི་བོར་གཡོ་འགུལ་གྱི་ནུས་ཤུགས་ཡོད་པ་དེ་ནི་སེང་གེ་ཡིན་སྟབས་རླུང་རྟའི་ནུས་པའི་ནང་གི་སའི་ཁམས་ཀྱི་ནུས་ཤུགས་མཚོན་བྱེད་དུ་སེང་གེ་བྱུང་བ་ཡིན། གངས་རིར་སེང་གེ་ཡོད་མེད་ཀྱི་དཔྱད་པའི་ལུགས་དེ་ནི་དེང་དུས་ཀྱི་བསམ་ཕྱོགས་དང་ལྟ་ཕྱོགས་ཤིག་ཡིན་ལ་འབྱུང་བའི་ནུས་ཤུགས་ཀྱི་མཚོན་བྱེད་སྲོག་ཆགས་ཀྱི་གཟུགས་བཀོད་པའི་ལུགས་དེ་ནི་ལོ་གྲངས་བཞི་སྟོང་སྔོན་གྱི་མི་ཚོའི་བསམ་ཕྱོགས་དང་ལྟ་ཕྱོགས་ཤིག་ཡིན། དེ་དང་འདྲ་བ་ཆུའི་ཁམས་ཀྱི་ནུས་ཤུགས་མཚོན་བྱེད་དུ་འབྲུག་གི་གཟུགས་བྱུང་ཞིག་དེ་ནི་ཆུ་ལ་གནས་ཆགས་པའི་སྲོག་ཆགས་གཡོ་འགུལ་ཅན་གྱི་ནུས་པ་ལྡན་པ་ཞིག་ཡིན། མེའི་ཁམས་ཀྱི་ནུས་པ་མཚོན་བྱེད་དུ་ཁྱུང་གི་གཟུགས་བྱུང་བ་སྟེ། ཁྱུང་ནི་བོན་ཡ་ཐོག་གི་དུས་སྐབས་སུ་ཆེས་གྲགས་ཆེ་བའི་ལྷ་མཐུ་བོ་ཆེ་ཞིག་ཡིན་ཞིང་། དེ་ནི་ཚ་བ་དང་དྲོད་དང་འབར་བའི་མེ་སོགས་དབར་གྱི་ནུས་ཤུགས་ཐམས་ཅད་ཀྱི་འབྱུང་གཞིའི་ལྟེ་བ་ཞིག་ཏུ་ངོས་འཛིན་སྲོལ་ཡོད། དེ་འདྲ་ཡིན་སྟབས་ཁྱུང་གིས་ཚ་བ་དབལ་གྱི་མཐུ་སྟོབས་དང་ནུས་ཤུགས་མ་ལུས་པ་མཚོན་ཡོད་སྟབས་ཁྱུང་ཆེན་འབར་བ་མེའི་ནུས་ཤུགས་ལ་གོ་དགོས། རླུང་ནི་གཡོ་བ་དང་བསྐྱེད་པའི་བྱེད་ལས་ཁྱད་པར་ཅན་ཞིག་ཡིན་སྟབས་འབྱུང་རྩིས་ནང་དུ་རླུང་གི་ཁམས་ལ་འབྱུང་བ་ཤིང་ཞེས་གྲགས་ཤིང་། ལྗོན་ཤིང་མང་པོ་ཚོགས་པ་ནགས་ཚལ་ཞེས་བྱ་བ་ནགས་ཚལ་གྱི་ཁྲོད་དུ་གཡོ་འགུལ་གྱི་ནུས་ཤུགས་ལྡན་པ་ནི་སྟག་ཡིན་སྟབས་སྟག་གི་གཟུགས་དེ་འབྱུང་བ་རླུང་ཁམས་ཀྱི་ནུས་ཤུགས་མཚོན་རྟགས་སུ་བཀོད་སྲོལ་བྱུང་། ད་དུང་རླུང་རྟའི་དབུས་སུ་རྟ་མཆོག་རྒྱན་ལྡན་ཞིག་འགོད་སྲོལ་ཡོད་པ་དེས་ནི་སྐྱེ་བོ་ཕོ་མོ་སུའང་རུང་གི་འབྱུང་ཁམས་ཀྱི་ནུས་པའི་རྒྱུན་དེ་མཚོན་ཅིང་། འབྱུང་ཁམས་ཀྱི་ནུས་རྒྱུན་དེ་ནམ་མཁའི་ཁམས་ཀྱི་གཞི་ལ་རྟེན་ནས་རྒྱུན་བསྲིང་དགོས་པ་ཡིན་སྟབས་དེ་ནི་ནམ་མཁའི་ཁམས་ཀྱི་ནུས་ཤུགས་ཀྱང་མཚོན་ཐུབ་ཀྱི་ཡོད།

      སྤྱིར་བཏང་འབྱུང་བའི་ཁམས་དང་ཁམས་ཀྱི་ནུས་པའི་བྱེད་ལས་དམིགས་སུ་བཀར་བའི་མཚོན་བྱེད་གཡོ་འགུལ་གྱི་སྲོག་ཆགས་གང་རུང་གི་གཟུགས་བཀོད་པའི་གནད་དོན་འདི་རྩ་གཞིའི་སྟེང་ནས་མི་འདྲ་བའི་ཁྱད་ཆེ་ཙམ་ཞིག་ཡོད་ལ། ལྟ་ཚུལ་དེ་དང་འབྲེལ་བ་དབང་ཡུལ་གྱི་འབྲེལ་བའི་ཁྱད་པར་དང་། དབང་ཡུལ་གྱི་འབྲེལ་བའི་ནུས་པ། ཡུལ་གྱི་ནུས་པ་དང་ཡུལ་ཅན་གྱི་ནུས་ཤུགས་བར་གྱི་འབྲེལ་བ་འགྲུབ་སྟངས་སོགས་བོན་ལུགས་རྣལ་མི་ལྟ་སྟངས་ཐུན་མོང་མ་ཡིན་པ་མང་པོ་ཞིག་ཡོད་པ་འདི་རིགས་ལ་ཤེས་རྟོགས་དང་ཞིབ་འཇུག་བྱ་ཐུབ་པ་ཡིན་ན་བོད་ཀྱི་གནའ་བོའི་ཤེས་རིག་དང་གོམས་སྲོལ་ཧ་གོ་དོན་རྟོགས་ཡོང་བར་ཕན་པ་ཆེན་པོ་ཡོད་ངེས་ལགས།
   
   གཞན་ཡང་གསལ་བཤད་ཞུ་རྒྱུར་རླུང་རྟའི་ངོས་ཀྱི་གཟུགས་རིས་དེ་དག་བཀོད་པའི་གོམས་སྲོལ་འདི་ནི་གཉའ་ཁྲི་བཙན་པོའི་སྐབས་ལ་བོན་ཤེས་པ་ཅན་བཅུ་གཉིས་དར་བ་སྟེ་མགོན་ཤེས་ལྷ་བོན་གཡང་ཤེས་ཕྱ་འདོད་འགྲོ་ཤེས་གླུད་གཏོང་སོགས་བཅུ་གཉིས་ཀྱི་ཡ་གྱལ་མགོན་ཤེས་ལྷ་བོན་གྱིས་སྲོལ་གཏོད་གནང་བ་ཞིག་ལགས།


དྲྭ་ཚིགས་གཙོ་སྐྱོང་བ་དང་དོ་དམ་པ། ཁཱ་ཤེས་རབ་རྒྱ་མཚོ། རྩོམ་སྒྲིག་པ། མགར་ཚེ་རིང་བཀྲ་ཤིས།
འདྲེན་བཀོལ:
61.4K

  དཔྱད་གཏམ ( 0 )ཡོད།
དཔྱད་གཏམ་སྤེལ་ས།
སྤེལ་མཁན།
བཤེར་གྲངས།
oldr བཤེར་གྲངས་ཁ་སྐོང་བྱོས། ཡིག་འབྲི་བཞི་ལས་མང་མི་རུང་། ཡིག་འབྲི་བཞི་ལས་ཉུང་མི་རུང་།
ནང་དོན་བྲི་རོགས། ཡིག་འབྲི་གསུམ་ལས་ཉུང་བ་སྤེལ་མི་རུང་། ཡིག་འབྲི་སུམ་སྟོང་ལས་མང་བ་སྤེལ་མི་རུང་།
ནང་དོན་ཡིག་འབྲི་སུམ་སྟོང་ལས་བརྒལ་མི་རུང་། བྲིས་ཟིན་ཡིག་འབྲི།    
མིག་སྔར་འདི་རུ་དཔྱད་གཏམ་སྤེལ་མཁན་མ་བྱུང་།
ལྟ་ཀློག་གྲངས་ཀ
20922662
དྲ་ཚིགས་བཟོ་སྐྲུན།
 
འབྲེལ་གཏུག་བྱ་ཡུལ།   ཁ་པར།  15283703999    E-mail:tbmgar@163.com
པར་དབང་བཙན་པོའི་མགར་གྱི་དྲ་བ་ལས་གཞན་ལ་མེད།
蜀ICP备13002975号