རྨེའུ་ཞེས་པའི་རུས་མིང་བྱུང་ཚུལ་ཅུང་ཙམ་གླེང་བ།
རྨེའུ་རྐང་ཐང་བ།
༡སྔོན་འགྲོའི་གཏམ།
ས་གནས་སོ་སོའི་ལོ་རྒྱུས་ནི་བོད་ཀྱི་ལོ་རྒྱུས་ཀྱི་ཡན་ལག་ལྟ་བུ་ཡིན་སྟབས།
ས་གནས་ཤིག་གི་ལོ་རྒྱུས་ལ་རྨས་སྐྱོན་ཤོར་ཚེ།
དོན་གྱིས་བོད་ཀྱི་ལོ་རྒྱུས་ཀྱི་སྟོང་ཆ་བསྐང་མ་ཐུབ་པར་ཅི་ལ་མིན།
སྐྱེ་གཟུགས་མཛེས་པའི་བོད་ཀྱི་ལོ་རྒྱུས་ཀྱི་རྐང་ལག་གང་རུང་ཞིག་ལ་སྐྱོན་བྱུང་བ་དང་གཉིས་སུ་མ་མཆིས།
དེ་བས་རང་རང་སོ་སོའི་ས་གནས་ལོ་རྒྱུས་འབྲི་རྒྱུ་ནི་ས་གནས་དེའི་སྨྱུག་འཛིན་པ་ཀུན་གྱི་ཕྲག་ཏུ་བབས་པའི་གཡོལ་མེད་ཀྱི་འོས་འགན་ཞིག་ཏུ་གྱུར་ཡོད་སྟབས།
དེ་ལ་གཡོལ་ཐབས་བྱེད་པ་ནི་དོན་གྱིས་ཁྱོད་རང་འགན་ཁུར་གྱི་འདུ་ཤེས་བྲལ་བའི་མི་ཞིག་ལ་ངོས་བཟུང་ཡང་མི་ཆོག་པ་ཅི་ཡང་མེད་དོ།།
ལོ་འདི་དག་ལ་རྨེའུ་སྐོར་སྲིད་གཞུང་དང་རྨེའུ་སྐོར་སློབ་ཆུང་གཉིས་ཀྱི་བསྒྲགས་བྱང་སོགས་སུ་རྨེའུ་དང་དམེ་གཉིས་ཀྱི་ཐ་སྙད་འདི་གང་བྱུང་དུ་ལག་ལ་གང་ཐོན་ཐོན་འབྲི་མཁན་མང་བར་མ་ཟད།
༼དརྨེ་༽ཞེས་ཡི་གེ་འདི་ལྟར་གསར་བཏོད་བྱེད་མཁན་ཡང་ཡོད་སྟབས།
ཁོ་བོའི་སེམས་སུ་དོགས་མི་བདེ་བར་གྱུར།
རྒྱུ་མཚན་ས་ཆ་འདི་ནས་སྔོན་གྱི་བསྔོ་ཡིག་དང་བསང་ཡིག་སོགས་སུ་༼རྨེའུ་༽
ཞེས་པ་འདི་བྲིས་པ་མ་གཏོགས་ད་དམེ་འབྲི་སྲོལ་ཕ་ཆེར་མེད་པར་སྣང་།
ལྷག་ཏུ་ན་ནིང་དོ་ཚུགས་ཀྱི་སྲིད་གཞུང་གི་འགོ་ཁྲིད་གསར་བ་དང་སློབ་གླིང་གི་དགེ་རྒན་གསར་བ།
བསྒྲགས་བྱང་གསར་རྣམས་དང་འགྲོགས་ནས་༼དརྨེ༽ཞེས་པའི་ས་འདིར་ཆ་རྒྱུས་མེད་པའི་མིང་གསར་བ་ཞིག་ཀྱང་ཐོན་བྱུང་།
༼འདི་ལ་དོར་སྣང་བྱ་རིན་ཅུང་ཙམ་ཡང་མེད་དོ༽
རྨེའུ་ཞེས་པའི་མིང་འདི་ལ་རུས་ཀྱི་འབྲེལ་བ་མེད་ཚེ་གང་བྲིས་ཀྱང་མི་ཆོག་པ་མེད་མོད།
༼རྨེའུ་༽ཞེས་པ་ནི་རུས་རྒྱུད་ཀྱི་ཁུངས་དང་འབྲེལ་བའི་ཐ་སྙད་ཅིག་ཡིན་སྟབས་འདི་ལ་གང་བྱུང་བྱུང་དུ་བསྒྱུར་བཅོས་གཏོང་བར་མི་རིགས་སོ།།
བོད་ཀྱི་ས་གནས་སོ་སོ་ནི་གནའ་བོའི་ལོ་རྒྱུས་ཀྱི་གཏེར་མཛོད་རེ་རེ་ཡིན་པ་དང་།
ས་གནས་དེ་དང་འབྲེལ་བའི་གནའ་བོའི་མིང་ཚིག་རེ་རེ་ནི་ལོ་རྒྱུས་ཀྱི་གླེགས་བམ་རེ་ཅི་ལ་མིན།
དེ་བས་གྲོགས་རིགས་པ་སྨྲ་བ་རྣསམ་ལ་གྲོས་མོལ་གྱི་ཚུལ་དུ་རང་ས་གནས་ཀྱི་༼རྨེའུ༽
ཞེས་པའི་སྐོར་ནས་གླེང་གཞི་ཞིག་གི་དོད་དུ་ཅུང་ཟད་ཙམ་བགྲོ་བར་འདོད་དོ།།
༢རྨེའུ་ཞེས་པའི་མིང་བྱུང་ཚུལ།
བོད་ཀྱི་རྩ་བའི་རུས་ཆེན་བཞིའམ་དྲུག་སྟེ།
མིའུ་གདུང་དྲུག་ཅེས་སྤྲེའུ་དང་བྲག་སྲིན་གཉིས་ཀྱི་ཕྲུ་གུ་གོང་དུ་འཕེལ་ཚུལ་དང་བསྟུན་ནས་རུས་ཀྱི་རྣམ་བཞག་བཤད་པ་ལྟར་ལགས་ལ།
དེ་ལས་ཨ་སྤོ་ལྡོང་ལ་ཤུལ་ཆེན་བཅོ་བརྒྱད་དང་ཚ་ཆེན་བཅོ་བརྒྱད་དང་དེ་བཞིན་བསེ་དང་རྨུ་སོགས་ལ་ཡང་བགྲང་ཚུལ་མང་དུ་ཡོད་ཚུལ་བོད་ཀྱི་རུས་མཛོད་དག་ལས་ཤེས་སླ།
དེ་དག་ལ་ནང་གསེས་ཀྱི་དབྱེ་བ་མང་དུ་ཡོད་པས། དྲུང་ཡིག་ཆོས་འཕེལ་ལགས་ཀྱིས།
རུས་ཕྲན་བོད་ཀྱི་དེབ་ཐེར་རུས་སོགས་ལས་མཐོང་བ། མོང་། མར་བ། མི་ལ། མི་ཉག
རྨེའུ། རྨེ་འདོར་བདུན་ཅུ་དོན་ལྔ་ཙམ། ཞེས་གསུངས་པ་དང་།
ཡང་བོན་གྱི་ཡིག་རྙིང་ལས། བྲུ་ཞུ་སྤ་རྨེའུ་སྤྱི་ཕུད་གཤེན་དང་ལྔ།
ཞེས་པའི་ཡ་གྱལ་མཁས་པ་རྨེའུ་དང་།
དེ་བཞིན་དུ་བོད་ཀྱི་ལོ་རྒྱུས་དེབ་ཐེར་ཀུན་གྱི་རྒྱལ་བོ་ལྟ་བུར་བསྔགས་པའི་༼
ཆོས་འབྱུང་མཁས་པའི་དགའ་སྟོན་༽དུའང་།
སྣུབས་ཡུལ་གླིང་དགུ་ན་སྣུབས་རྗེ་དམིགས་པ་བློན་པོ་རྨེའུ་དང་འབྲོ།
ཞེས་བློན་པོ་རྨེའུ་ཞེས་པ་དང་།
མདོ་སྨད་ལོ་རྒྱུས་ཆེན་མོ་སོགས་ན་ཡང་རྨེེའུ་ཞེས་པའི་རུས་མིང་མང་དུ་སྣང་བའི་ལོ་རྒྱུས་ཡིག་རྙིང་རྒན་པོ་རྣམས་ལ་ཕར་འདྲི་མ་དགོས་པར་ཚུལ་ང་ཚོ་ལ་རང་བཞིན་གྱིས་ལོ་རྒྱུས་དངོས་ཡོད་ཀྱི་ཐ་སྙད་འདི་འབྲི་སྲོལ་དང་བཅས་པ་ཡོད་ཚུལ་ཁ་ཚུར་གྲགས་པ་མ་ཡིན་ནམ།
ལྷག་ཏུ་རྨེའུ་སྐོར་སྡེ་བའི་བསང་ཡིག་དང་ལོ་རྒྱུས་ས་བོན་སོགས་སུའང་༼རྨེའུ་༽
ཞེས་ར་རྨེའུ་འདི་བྲིས་པ་མང་བ་རྗེ་ཀུན་མཁྱེན་སྐུ་ཕྲེང་བཞི་བ་བསྐལ་བཟང་ཐུབ་བསྟན་དབང་ཕྱུག་ཚང་གིས་གསུངས་པའི་བུ་ཆུང་བསང་ཡིག་གི་མཇུག་བྱང་དུ།
ཅེས་པ་འདི་ནི་རྨེའུ་སྐོར་འདུས་མང་ནས་ཡང་ཡང་ནན་གྱིས་བསྐུལ་ངོར་ཀུ་ས་ལི་བསྐལ་བཟང་ཐུབ་བསྟན་དབང་ཕྱུག་གིས་སྦྱར་བ་ཡི་གེ་བ་ནི་དྲུང་ཆུང་བློ་བཟང་དོན་ལྡན།
ཞེས་གསུངས་པ་སོགས་ལྟར་ལགས་ན།
ས་གནས་ཀྱི་ལོ་རྒྱུས་ཀྱི་ལོ་རྒྱུས་གླེང་ཚེ་བསང་ཡིག་ནི་ལོ་རྒྱུས་ཀྱི་རྒྱུ་ཆ་གལ་ཆེན་ཞིག་གོ།།
ད་རུང་དེ་དང་མཚུངས་པའི་རྨེའུ་དངོས་སུ་བྲིས་པའི་ལོ་རྒྱུས་རང་བཞིན་གྱི་མི་སྣ་མང་དུ་ཡོད་ཚུལ་གཤམས་ཀྱི་དོན་ཚན་གཞན་གྱི་ནང་དུ་ཡོད་པས་ཤེས་ནུས་ལ།
འདི་ནི་རྨེའུ་ཞེས་པའི་རུས་མིང་གང་དུ་བྱུང་བའི་ཁུངས་བཙུན་གྱི་ལོ་རྒྱུས་དེབ་ཐེར་དང་རྨེའུ་ཞེས་པའི་རྩ་བའི་བྱུང་བ་ལགས་ལ།
འདིར་མང་དུ་དོགས་ཏེ་མ་བྲིས་སོ།།
༣རྔ་བ་དང་མངའ་རིས་ཀྱི་འབྲེལ་བ།
མངའ་རིས་དང་རྔ་བའི་བར་གྱི་འབྲེལ་བ་ནི་འབྱུང་ཁུངས་དང་བྱུང་དངོས་ཀྱི་འབྲེལ་བ་ཡིན་ཚུལ་གནའ་མི་རྒན་པོའི་ངག་རྒྱུན་དུའང་།
རྔ་བ་མ་རེད་མངའ་བ་རེད།། སྟོད་མངའ་རིས་ཆད་ཀི་དུམ་བུ་རེད།
ཤ་སོག་པ་བགོས་པའི་ཚལ་བ་རེད།
ཅེས་རྒན་གཞོན་ཀུན་གྱི་ཁ་ལ་རླུང་ལྟར་གྲགས་པ་དེས་ཀྱང་གསལ་བཤད་བྱས་ཡོད་ལ།
དཔའ་བོ་གཙུག་ལག་ཕྲེང་བས།
རྗེ་དམིགས་པ་དང་རུས་མིང་རྨེའུ་དང་འབྲོ་བྱ་བའི་བློན་པོ་སུམ་གྱིས་སྣུབས་ཡུལ་གླིང་དགུ་ན་སྣུབས་རྗེ་དམིགས་པ་བློན་པོ་རྨེའུ་དང་འབྲོ།
སྣུབས་ཡུལ་གླིང་དགུ་དབང་དུ་བྱས་ཚུལ་གསུངས།
སྟོད་མངའ་རིས་ནས་རྨེའུ་ངམ་ཆེན་སྐྱོལ་པོ།
དེའི་སྲས་འདུལ་བ་བརྩོན་དང་གཡུ་གཤིན་གཉིས་བྱུང་བ་དང་།
དེའི་སྲས་རྨེའུ་རྒྱལ་གྱི་ལྷུན་པོ་དབུས་སུ་ཡོང་སྟེ་གཡས་རུ་ཤངས་ཀྱི་སར་གཞིས་བཟུང་ཞིང་རིགས་རྒྱུད་བསྐྱེད།
དེ་བཞིན་དུ་སྟོང་ཚབ་དང་རྨེའུ་ཡེ་ཤེས་གཡུང་དྲུང་སོགས་ཀྱིས་སྙེ་བཟང་རིར་གནས་བཅས།
དེ་ལས་སྙེ་མོ་འཕགས་ཕུའི་རྨེའུ་ཚང་སོགས་ཀྱིས་ཆོས་བོན་རིས་མེད་ཀྱི་དྲང་སྲོང་རིག་འཛིན་མང་དུ་འཁྲུངས་པར་གྲགས།
སྙེ་མོ་ཟངས་ཀྱི་ས་ནི་དེང་སང་སྙེ་མོ་རྫོང་བྱ་བའི་ཡུལ་ཡིན། བོད་ཀྱི་རྒྱལ་བོ་ཁྲི་སྲོང་ལྡེ་བཙན་གྱི་དུས་སུ་སྟོད་མངའ་རིས་སོགས་ནས་མདོ་སྨད་དུ་རུས་མིང་རྨེའུ་ཅན་གྱི་ཡུལ་སྡེ་ཁག་ཅིག་རི་སྤོར་བའི་འགོ་བརྩམ་ཏེ་རྨེའུ་པད་སྡོང་སྤྲུགས།
རྨེའུ་མ་ར་སྙ་སོགས་ལ་རྫ་དམར་རྨེའུ་ཚང་ཞེས་པ་ནི་ནག་ཆུ་ཁར་རྫ་མ་ཟེར་བའི་ས་མིང་ཞིག་ཡོད་པར་གྲགས།
ས་དེ་ལ་དེང་སང་ཡང་རྫ་མར་ཟེར་ཞིང་། རྫ་མར་ཡུལ་ཤོག་ཡོད་ས་དེ་ཡིན་པར་བཤད།
དུས་དེ་ནས་ནས་རིམ་གྱིས་ས་གླང་ལོ༨༦༩ཡས་མས་སུ་མདོ་ཁམས་རྔ་བའི་ཡུལ་དུ་ཡོང་སྟེ་གཞིས་ཆགས་པར་གྲགས་སོ།།
རྔ་ཡུལ་དུ་ཡོང་དུས་རྨེའུ་ཚང་དང་། བུ་ནང་འོན་པོ་ཚང་།
དབོན་པའི་སྒར་བ་ཚང་། མཁར་གྱི་རྨེའུ་ཕྱུག་ཚང་། གྱོང་མང་མོ་བ་ཚང་།
རྨེའུ་སྒང་ཚང་། རྨེའུ་མགར་ཚང་བཅས་བྱུང་།
དེའི་ཡར་སྔོན་དུ་ནས་རྔ་བའི་ཡུལ་འདིར་གནའ་བོའི་རུས་མིང་གཉན་མཁར་བ་གསུམ་གྱིས་མཚོན་པའི་ཡུལ་གཞན་གྱི་རིགས་རྒྱུད་ཅིང་མང་བོ་ཡོད་ཚུལ་ཡང་ཞོར་དུ་ཤེས་དགོས་ལ་དག་གིས་ས་འདིར་གཞི་བཟུང་བར་གྲགས།
ཨ་ཁུ་ཆོས་འཕེལ་གྱིས་ཁྱིམ་ཁག་བཅོ་བརྒྱད་ཙམ་བྱུང་བར་གཞིགས་ན།
རྗེས་སུ་རྨེའུ་ཚང་གིས་རྔ་བའི་ས་ཆར་དབང་བསྒྱུར་བའི་སྟོབས་ཤུགས་ཆེ་རུ་བྱིན་ནས་ཁོ་རང་རང་གི་ཕ་ཡུལ་གྱི་མིང་བརྗེས་པའི་སླད་དུ་རྨེའུ་ཚང་གི་མིང་ཅན་ཡོད་སར་མངའ་བ་ཞེས་པའི་བཏགས་ཤིང་།
དེའི་རྗེས་སུ་ཡུན་གྱིས་རྔ་བར་བསྒྱུར་བ་ཨེ་ཡིན་སྙམ་མོ།།
༤ རྨེའུ་དང་དམེ་གཉིས་ཀྱི་ཁྱད་པར།
དེང་སྐབས་མང་བོ་ཞིག་གིས་མིང་འདི་གཉིས་ལག་ལ་གང་ཐོན་བྱེད་མཁན་མང་དུ་སྣང་བ་ལ།
འདི་གཉིས་ཀྱི་ཁྱད་པར་དང་འབྱུང་ཁུངས་མི་འདྲ་སྟེ།
ར་རྨེའུ་ཞེས་པ་ནི་གོང་དུ་བརྗོད་པ་ལྟར་མངའ་རིས་ནས་མར་ཆད་པའི་བོད་ཀྱི་རུས་ཕྲན་ཅིག་གི་མིང་དུ་ཐོགས་ཚུལ་ལྟར་ལགས་ལ།
ད་དམེ་ནི་མགོ་ལོག་རུས་མཛོད་རྒྱས་པ་ལས།
དེ་རྗེས་མགོ་ལོག་ནག་ཐར་གྱི་གསའ་བཟའི་བུ་ཀླུ་འབུམ་རྒྱལ་གྱི་བུ་རྟ་ཐར་རྒྱལ་ཞེས་ཀུན་གྱིས་འབོད།
འདིའི་བུ་དམེ་ཚེ་རྒྱལ་བྱམས་ཀྱིས་ཀྱང་སོག་དམག་ལ་ཡུན་རིང་འཁྲུགས་ཤིང་སོག་དམག་གིས་མ་ཐུབ་པར་དམེ་བུ་ར་ཧ་ཤི་ཧ་ཞེས་འབོད།
རྗེས་སུ་སོག་དམག་གི་སྐུང་དམག་ཏུ་ཚུད་ནས་སྐུ་བཀྲོངས་པ་རེད།
འདི་དག་ནི་མགོ་ལོག་ནག་ཐར་གྱི་མི་རྒྱུད་ཡིན་མོད།
སོག་དམག་ལ་མགོ་མ་སྒུར་བར་དམེ་བྱས་ནས་འཁྲུགས་པས་རྗེས་སུ་འདི་དག་གི་མི་རྒྱུད་ལ་དམེ་ཚང་ཞེས་གྲགས།
འདི་གཉིས་ཀྱི་རྩ་བའི་ཁྱད་པར་འདི་ལྟར་སྣང་ངོ་།།
༥མཇུག་གཏམ།
དེང་སང་བར་མ་དམེ་སང་གི་དམེ་ལ་ད་དམེ་འབྲི་བ་ནི་ཨ་ཁུ་དམུ་དགེ་ཚང་གི་ཀུན་དགའི་མེ་ལོང་དུ་བྲིས་པས་རྗེས་སུ་མང་ཆེ་བས་དེ་ལྟར་འབྲི་མོད།
བར་མ་དམེ་སང་གི་རྨེའུ་ནི་ར་རྨེའུ་ཡིན་ཞེས་དྲུང་ཡིག་པ་ཨ་ཁུ་ཆོས་འཕེལ་ཁོང་གིས་འདོད་དོ།།
རྨེའུ་སྐོར་གྱི་རྨེའུ་སྔོན་གྱི་བསང་ཡིག་སོགས་སུ་ར་རྨེའུ་བྲིས་ཏེ་རྔ་བ་སྤྱི་དང་མཐུན་པར་རུས་ཁུངས་མངའ་རིས་ལ་གཏུགས་པར་དོན་གྱིས་གོ་ནུས་མོད།
དེང་སང་ར་རྨེའུ་དང་ད་དམེ་གཉིས་གང་བྱུང་དུ་འབྲི་མཁན་རྣམས་ལ་གླེང་གཞི་ཙམ་བཏོན་པ་ལགས་པས།
ང་ལྟ་བུའི་ཤེས་རིག་དང་ལོ་རྒྱུས་ཀྱི་གང་ཕྱོགས་ནས་དབུལ་བ་དབུལ་རྐྱང་ཞིག་གིས།
འདི་ནི་བདེན་གྱི་གཞན་ནི་གཏི་མུག་གོ།། ཞེས་ཟེར་བ་ནི་དུས་གཏན་དུ་མི་སྤོབས་ལ།
ལྷག་ཏུ་རྔ་བའི་ལོ་རྒྱུས་ལ་རྒྱུས་ལོན་དང་ཞིབ་འཇུག་བྱེད་མཁན་མང་བ་རྣམས་ལ་ཡང་ཞོར་དུ་འདི་ལ་ལེགས་ཆ་ཅུང་ཙམ་རེ་བྱུང་ན་ལེགས་སྐྱེས་ཤིག་གི་དོད་དང་ནོར་འཁྲུལ་གང་བྱུང་གད་སྙིགས་བཞིན་འདོར་རོགས་ཞེས་ཞུ་རྒྱུ་ལས་ཅི་ཡང་མེད།
སྨྲས་པ།
མི་རྟག་སྒྱུ་མའི་གུར་ཁང་ན།།
དར་རྒུད་གཡོན་མའི་རྩེ་དགའ་རྒོད།།
ལས་ཉོན་འཁོར་བའི་རྐང་རྗེས་ལ།།
ང་དང་ཁྱོད་ཀྱི་བདེ་སྡུག་མང་།།
༢༠༢༠-༣-༡༤ཉིན།
| 