ཚིག དམེ་ཚང་རྟ་ཁོ།

དབྱངས། རྨ་གླིང་ལྷུན་གྲུབ།

ལེན་མཁན། མགོ་ལོག་རྒྱལ་མཚན།

སེམས་ཀྱི་སྒེའུ་ཁུང་ནང་ལ། །

བྱམས་བརྩེའི་ཉི་འོད་འཕྲོས་པའི། །

ང་ཡི་བགྲེས་པོ་ཚེ་རིང་། །

སྐྱེ་འགྲོ་ཀུན་གྱི་ཕ་ཡིན། །

འཆི་བདག་གཤིན་རྗེའི་མདུན་ནས། །

ཞེན་ཆགས་བུ་ལ་འཁོར་བའི། །

ང་ཡི་བགྲེས་པོ་ཚེ་རིང་། །

ཕལ་བའི་ཁྱིམ་གྱི་ཕ་ཡིན། །

སྦྲ་རྒན་གོ་འདབས་བར་ནས། །

བསྐལ་བའི་ཆགས་རིམ་འཆད་པའི། །

ང་ཡི་བགྲེས་པོ་ཚེ་རིང་། །

ཤེས་བྱ་རིག་པའི་མཛོད་ཡིན། །

གདོང་གི་གཉེར་རིས་བར་ལ། །

མི་ཚེའི་སྐྱིད་སྡུག་བྲིས་པའི། །

ང་ཡི་བགྲེས་པོ་ཚེ་རིང་། །

ཉམས་མྱོང་སྟོང་གི་མཛོད་ཡིན། །