༄། །འཕགས་པ་ཚེ་དང་ཡེ་ཤེས་དཔག་ཏུ་མེད་པ་ཞེས་བྱ་བ་ཐེག་པ་ཆེན་པོའི་མདོ་ལས་འཕྲོས་པའི་གོ་ཐོབ་ཀྱི་གཏམ་སྟོང་ཐུན་ཉི་ཟླའི་རོལ་རྩེད་ཅེས་བྱ་བ།
ལྡོང་ནོར་སྡེ།
ཕུལ་བྱུང་མཛད་པས་འགྲོ་ལ་མི་ཟད་དཔལ་སྟེར་ཞིང་།། ལན་ཅིག་དྲན་པས་འཆི་བདག་འཇིགས་པ་རིང་དུ་དོར།།རྟག་ཏུ་བརྩེ་བས་འགྲོ་ལ་བུ་བཞིན་དགོངས་གྱུར་པ།།ལྷ་མིའི་སྟོན་པ་ཚེ་དཔག་མེད་ལ་ཕྱག་འཚལ་ལོ།།
བསླུ་མེད་ཚད་མའི་སྟོན་པ་ཟས་གཙང་སྲས།།
གང་དེའི་བདེན་གསུང་འཁྲུལ་མེད་རྒྱལ་བའི་བཀའ།།
རྒྱ་གར་སྐད་ལས་བོད་དུ་འགྱུར་བའི་ཆོས།།
ཚེ་དང་ཡེ་ཤེས་དཔག་མེད་ཐེག་ཆེན་མདོ།།
ཆོས་ཚན་གཅིག་ལ་ལྡེབ་ཐུང་ཉི་ཤུ་ལྷག།
གཟུངས་ཚན་སུམ་ཅུ་ཕན་ཡོན་དང་བཅས་པ།།
རྒྱ་གར་པཎ་ཆེན་པུཎྱེ་སམྦྷ་ཝ།།
བོད་ཀྱི་ལོ་ཙཱ་ཉི་མ་གྲགས་པའི་འགྱུར།།
འདི་ཡི་ཁུངས་དང་འགྱུར་ལ་དཔྱད་ཅིང་བསྡུར།།
རྒྱ་བོད་མཁས་པའི་དྲུང་དུ་དོགས་གཅོད་ཞུས།།
མ་ནོར་མ་བསླད་ཡིད་རྟོན་ཆོག་པ་ཡི།།
རྒྱལ་གསུང་ཚད་མར་ངེས་ཤེས་གཏིང་ནས་རྙེད།།
དེ་ལ་ཐོས་བསམ་ཞིབ་འཇུག་བགྱིས་པ་ཡི།།
གོ་ཐོབ་གཏམ་གྱི་སྟོང་ཐུན་ཕྲ་མོ་ཙམ།།
སྐལ་མཉམ་གཞན་ལ་ཕན་འདོད་བསམ་པས་བརྗོད།།
བློ་གྲོས་མཐུན་དག་ཡུད་ཙམ་ཉན་པར་འཚལ།།
སྟེང་ཕྱོགས་ཡོན་ཏན་དཔག་མེད་ཞིང་ཁམས་ན།།
སངས་རྒྱས་ཚེ་དང་ཡེ་ཤེས་དཔག་མེད་བཞུགས།།
དེ་ཡིས་ཚེ་འཛིན་ཚེ་ནི་མཐར་ཕྱིན་ཕྱིར།།
འགྲོ་ལ་ཆོས་སྟོན་ཚེ་ཡི་དངོས་གྲུབ་སྩོལ།།
གང་དེའི་མཚན་གཟུངས་བརྒྱ་རྩ་བརྒྱད་པའི་མདོ།།
འཛམ་གླིང་མི་རྣམས་ཚེ་མཐར་ཕྱིན་པའི་ཆེད།།
རྒྱལ་བས་འཇམ་དཔལ་དབྱངས་ལ་བསྟན་མ་ཐག།
ཕྱོགས་བཅུའི་སངས་རྒྱས་དགོངས་དབྱངས་གཅིག་གིས་གསུངས།།
གང་ཞིག་མདོ་འདི་ཡི་གེར་འབྲི་བའམ།།
འབྲིར་འཇུག་མིང་ཙམ་ཉན་ཏམ་ཀློག་པ་ནས།།
གླེགས་བམ་འཆང་དང་མཆོད་པར་གྱུར་བ་ན།།
ལོ་བརྒྱར་འཚོ་ཞིང་བདེ་བ་ཅན་དུ་འགྲོ།།
རྒྱལ་བའི་ཞལ་ནས་འཇམ་དཔལ་གཞོན་ནུ་ལ།།
ལན་དྲུག་བོས་ནས་མདོ་འདི་འཛིན་པའི་མི།།
ཚེ་ཟད་པ་ཡང་ཚེ་ལོ་བརྒྱ་ཐུབ་ཅིང་།།
ཚེ་འཕེལ་རིང་དུ་འཚོ་ཞེས་ཡང་ཡང་གསུངས།།
འཛམ་གླིང་མི་རྣམས་རིགས་རྒྱུད་ཤ་མདོག་དང་།།
དད་མོས་མི་ཚེའི་ལྟ་བ་ཐ་དད་ཀྱང་།།
བདེ་སྐྱིད་འདོད་དང་ཚེ་སྲོག་གཅེས་འཛིན་གྱི།།
བསམ་བློ་དེ་ནི་ཁྱད་མེད་གཅིག་མཐུན་ཡིན།།
དབང་ཆེན་འབྱོར་ལྡན་བླ་སྤྲུལ་པཎྚི་ཏ།།
ཕལ་བའི་མི་དང་བྲན་གཡོག་སྤྲང་འཁྱམས་སོགས།།
ཀུན་ཀྱང་རིང་དུ་འཚོ་བར་མི་འདོད་པའི།།
སྐྱེ་བོ་དེ་ནི་གང་དུའང་ཡོད་མ་ཡིན།།
རིང་འཚོའི་ཐབས་ཀྱང་རྣམ་པ་སྣ་ཚོགས་པ།།
སྔོན་བྱུང་གཏམ་དང་ད་ལྟའི་ཚན་རིག་གཞུང་།།
ཀུན་ཏུ་གྲགས་ཀྱང་ནམ་ཡང་མི་བསླུ་པའི།།
དཀར་པོ་ཆིག་ཐུབ་དྲང་སྲོང་ཆེན་པོའི་བཀའ།།
ལུས་ངག་དུབ་པའི་དཀའ་སྤྱད་མ་ནུས་ཤིང་།།
ལྷ་འབོད་འདྲེ་འདུལ་སྐྱབས་སུ་མ་རྙེད་ཀྱང་།།
རྒྱལ་བའི་གསུང་ལ་ཡིད་ཆེས་རྣམ་དག་གིས།།
ལུང་བཞིན་སྒྲུབ་པས་བསམ་དོན་མ་ལུས་འགྲུབ།།
གང་ཞིག་འདི་བདེ་ཕྱི་སྐྱིད་འདོད་པ་ན།།
འབད་རྩོལ་རི་བོ་ཙམ་ལས་བསོད་ནམས་ཆ།།
མེ་སྟག་ཙམ་ཞིག་མཆོག་ཅེས་དཔལ་སྤྲུལ་གསུངས།།
བསོད་ནམས་སྡུད་ལ་མདོ་འདི་ལས་ལྷག་ཅི།།
ནད་རིམས་གདོན་བགེགས་བྱད་ཕུར་རྒྱལ་པོའི་ཁྲིམས།།
མེ་ཆུ་དུག་མཚོན་མུ་གེ་གཡང་དུ་ལྷུང་།།
དུས་མིན་འཆི་བ་མ་ལུས་འཇོམས་པ་ལ།།
ཆོས་ཀྱི་རྣམ་གྲངས་འདི་ལས་གཞན་གང་ཞིག།
ཚེ་ཟད་པ་ཡང་ཚེ་ལོ་བརྒྱ་ཐུབ་ཅིང་།།
དེ་ལས་ཤིན་ཏུ་རིང་པའང་འདི་ཡིས་འགྲུབ།།
ཨོ་རྒྱན་ཡབ་ཡུམ་འཆི་མེད་རྡོ་རྗེའི་སྐུ།།
བརྙེས་པའི་ཐབས་ཀྱང་འདི་ལ་བརྟེན་ནས་བྱུང་།།
ནམ་ཞིག་འཆི་བའི་དུས་སུ་གནད་གཅོད་ཀྱི།།
སྡུག་བསྔལ་འབྱུང་ལ་ཐམས་ཅད་ཞེད་མོད་ཀྱང་།།
མདོ་འདི་འཛིན་དག་སྲས་བཅས་རྒྱལ་བ་ཡི།།
མངོན་སུམ་བསུ་ལ་མ་དག་སྣང་བས་དབེན།།
བདེ་བ་ཅན་སོགས་སངས་རྒྱས་ཞིང་ཁམས་སུ།།
སྐྱེས་ནས་སངས་རྒྱས་བྱེ་བ་ཕྲག་དགུ་བཅུ།།
རྩ་དགུས་མངོན་སུམ་ལུང་སྟོན་ཕྱག་རྐྱོང་ཞིང་།།
རབ་འབྱམས་ཞིང་དུ་ཅི་དགར་རྩེན་པས་ཆོག།
དེ་ལ་ཐེ་ཚོམ་དང་ནི་སོམ་ཉི་དང་།།
ཡིད་གཉིས་མ་བྱེད་ཅེས་ནི་བཅོམ་ལྡན་འདས།།
ཤཱཀྱ་སེང་གེའི་ཞལ་ནས་གསུངས་པས་ན།།
འདི་ཕྱི་གཉིས་ཀྱི་དོན་ཆེན་འདི་ཡིས་འགྲུབ།།
གཞན་ཡང་མདོ་ལས་ལེགས་གསུངས་པའི།།
ཕན་ཡོན་ཆེན་པོ་བཅོ་བརྒྱད་དེ།།
གོ་རིམ་བཞིན་དུ་འདིར་སྡེབ་པས།།
བློ་གྲོས་ལྡན་དག་དགའ་བས་ཉོན།།
གང་ཞིག་མདོ་འདི་ཡི་གེ་རུ།།
འབྲིའམ་འབྲི་རུ་འཇུག་པ་ན།།
ཚེ་ཟད་པ་ཡང་ལོ་བརྒྱར་འཚོ།།
དེ་ལས་རིང་དུའང་འཕེལ་བར་འགྱུར།།
དེ་བཞིན་ངན་སོང་གསུམ་དང་ནི།།
མི་ཁོམ་པ་རུ་ནམ་དུ་ཡང་།།
སྐྱེ་བར་མི་འགྱུར་གང་དག་ཏུ།།
སྐྱེས་པའི་ཚེ་རབས་དྲན་པར་འགྱུར།།
ཆོས་ཕུང་བརྒྱད་ཁྲི་བཞི་སྟོང་དེ།།
འབྲི་རུ་བཅུག་དང་བྱེད་དུ་བཅུག།
རབ་ཏུ་གནས་པ་བྱས་པ་ཡི།།
བསོད་ནམས་དམ་པ་ཐོབ་པར་འགྱུར།།
གཞན་ཡང་གང་གིས་མཚམས་མེད་ལྔ།།
བྱས་པ་ཡོངས་སུ་བྱང་འགྱུར་ཞིང་།།
སྡིག་པའི་ཕུང་པོ་རི་རབ་ཙམ།།
མཆིས་ཀྱང་ཡོངས་སུ་བྱང་བར་འགྱུར།།
མདོ་འདི་འཛིན་པའི་སྐྱེ་བོ་ལ།།
བདུད་དང་བདུད་ཀྱི་རིས་ཀྱི་ལྷ།།
གནོད་སྦྱིན་དང་ནི་སྲིན་པོ་ཡིས།།
གླགས་བཙལ་གླགས་ནི་རྙེད་མི་ནུས།།
དེ་བཞིན་གང་ཞིག་འཆི་བའི་དུས།།
སངས་རྒྱས་བྱེ་བ་ཕྲག་ཁྲིག་གི།
ཞལ་མཐོང་དངོས་སུ་ལུང་སྟོན་ཅིང་།།
དབང་བསྐུར་ཞིང་མཆོག་དག་ཏུ་འཁྲིད།།
གང་དག་མདོ་འདི་འཛིན་པ་ལ།།
རྒྱལ་བོ་ཆེན་པོ་བཞི་དག་ཀྱང་།།
དེ་ཡི་ཕྱི་བཞིན་འབྲང་ཞིང་སྲུང་།།
བསྐྱབ་དང་སྦ་བ་བྱེད་པར་འགྱུར།།
གང་ཞིག་འདི་ནས་འཕོས་མ་ཐག།
སྐྱེ་གཞན་བར་མ་ཆོད་པ་རུ།།
བདེ་གཤེགས་འོད་དཔག་མེད་པའི་ཞིང་།།
བདེ་བ་ཅན་དུ་ངེས་པར་སྐྱེ།།
ས་ཕྱོགས་གང་དུ་མདོ་སྡེ་འདི།།
བཞུགས་ལ་མཆོད་རྟེན་དུ་འགྱུར་ཞིང་།།
བྱོལ་སོང་བྱ་དང་རི་དྭགས་སོགས།།
གཟུངས་འདི་ཐོས་པས་འཚང་རྒྱ་འགྱུར།།
དེ་བཞིན་མདོ་སྡེ་དམ་པ་འདི།།
ཡི་གེར་འབྲི་འམ་འབྲིར་འཇུག་ན།།
དེ་ནི་སྐྱེ་བ་ཐམས་ཅད་དུ།།
བུད་མེད་ལུས་སུ་སྐྱེ་མི་འགྱུར།།
གང་ཞིག་མདོ་སྡེ་འདི་ཡི་ཕྱིར།།
ཀར་ཤ་པ་ན་གཅིག་བྱིན་ན།།
སྟོང་གསུམ་ཁམས་འདི་རིན་ཆེན་རིགས།།
བདུན་གྱིས་བཀང་སྟེ་སྦྱིན་དང་མཚུངས།།
གང་དག་ཆོས་ཀྱི་རྣམ་གྲངས་འདིར།།
མཆོད་པ་བྱེད་པར་འགྱུར་བ་དེས།།
དམ་པའི་ཆོས་ནི་མཐའ་དག་ལ།།
མཆོད་པ་བྱས་པར་འགྱུར་ཞེས་གསུངས།།
དཔེར་ན་སངས་རྒྱས་རབས་བདུན་ལ།།
རིན་ཆེན་བདུན་གྱིས་མཆོད་བྱས་པའི།།
བསོད་ནམས་ཚད་ནི་བགྲང་ནུས་ཀྱི།།
མདོ་འདིའི་བསོད་ནམས་བགྲང་མི་ནུས།།
དཔེར་ན་རིན་པོ་ཆེའི་ཕུང་པོ།།
ལྷུན་པོ་ཙམ་ཞིག་སྦྱིན་པ་ཡི།།
བསོད་ནམས་ཚད་ནི་བགྲང་ནུས་ཀྱི།།
མདོ་འདིའི་བསོད་ནམས་བགྲང་མི་ནུས།།
དཔེར་ན་རྒྱ་མཚོ་ཆེན་པོ་བཞི།།
ཆུ་ཡིས་ཡོངས་སུ་གང་པ་ཡི།།
ཐིགས་པ་རེ་ནས་བགྲང་ནུས་ཀྱི།།
མདོ་འདིའི་བསོད་ནམས་བགྲང་མི་ནུས།།
གང་ཞིག་མདོ་འདི་བྲིས་སམ་མཆོད།།
དེས་ནི་ཕྱོགས་བཅུའི་ཞིང་ཀུན་གྱི།།
དེ་བཞིན་གཤེགས་པ་ཐམས་ཅད་ལ།།
ཕྱག་དང་མཆོད་པ་བྱས་པ་ཡིན།།
གཞན་ཡང་གཟུངས་འདིའི་ངོ་བོ་ཕར་ཕྱིན་དྲུག།
ཡེ་ཤེས་རང་བཞིན་རྒྱུ་ནི་སྙིང་རྗེའི་སྟོབས།།
འབྲས་བུ་མི་གནས་མྱང་འདས་བྱེད་ལས་སམ།།
འཕྲིན་ལས་མཁའ་ཁྱབ་འགྲོ་བའི་དོན་དུའོ།།
ཨེ་མ་མཚུངས་མེད་སྟོན་པ་མཆོག།
ཨེ་མ་ལེགས་གསུང་བསླུ་མེད་བཀའ།།
ཁོ་བོ་རྐང་གི་ཁོང་ནས་ནི།།
ཁྱོད་ཀྱི་གསུང་ལ་ཡིད་ཆེས་ཐོབ།།
ཁྱོད་གསུང་དུ་མ་ཅི་ཞིག་སྨོས།།
ཆ་ཤས་རེ་ཡི་དོན་ཙམ་ལའང་།།
འོལ་སྤྱི་ཙམ་གྱི་ངེས་རྙེད་པ།།
དེ་ལའང་མཆོག་གི་བདེ་བ་སྟེར།།
འཇིག་རྟེན་ལྟ་བ་སངས་རྒྱས་ལུགས་ལ་དད།།
མི་ཚེའི་ལྟ་བ་འདི་ཕྱི་གཉིས་དོན་འཚོལ།།
རིན་ཐང་ལྟ་བ་རང་བདེ་གཞན་སྐྱིད་འཛིན།།
སྐྱེས་བུ་དེ་ལ་དམ་ཆོས་འདི་ཉིད་མཁོ།།
ཆོས་ལ་ཐེ་ཚོམ་མི་བྱེད་ཡིད་ཆེས་བརྟན།།
གཞན་ལ་འཚེ་བ་མི་བྱེད་སྲོག་གཅོད་སྤོང་།།
བསམ་པ་བཟང་པོས་མི་ཚེའི་ལམ་རིང་སྲུང་།།
དེ་འདྲ་སུ་ཡོད་ཆོས་འདིའི་དངོས་གྲུབ་ཐོབ།།
གྲོགས་དག་ཡང་ཅིག་གསན་མཛོད་དང་།།
དོན་ཆེན་ཚིག་ལ་སྐྱར་ཟློས་བྱེད།།
ད་ལྟའི་འཚོ་བ་དངོས་ཀྱི་ཁྲོད།།
མདོ་འདིའི་དགོས་མཁོ་མང་དུ་སྣང་།།
སྣོད་ཀྱི་རྒུད་པ་སེལ་བ་དང་།།
བཅུད་ཀྱི་ཉམས་པ་གསོ་བ་དང་།།
ཆོས་སྲིད་ལུགས་གཉིས་སྤེལ་བ་ལ།།
མདོ་འདིའི་ཕན་རླབས་རབ་ཏུ་ཆེ།།
སྔོན་བྱོན་དམ་པའི་དགོངས་རྫོགས་དང་།།
ཚེ་ལྡན་རྣམས་ཀྱི་རིམ་གྲོ་དང་།།
ཁྱད་པར་བསྟན་འཛིན་སྐྱེས་བུ་རྣམས།།
སྐུ་ཚེ་བརྟན་ཕྱིར་འདིར་འབད་གལ།།
ནད་གདོན་བར་ཆད་ཞི་བ་དང་།།
ཚེ་བསོད་རིགས་རྒྱུད་དར་བ་དང་།།
ཤེས་རབ་སྟོབས་འབྱོར་རྒྱས་པ་སོགས།།
སྲིད་ཞིའི་ལེགས་ཚོགས་འདི་ཡིས་འཕེལ།།
ཆོས་སྟོན་དུས་སྟོན་ཁྲི་སྟོན་དང་།།
འཁྲུངས་སྟོན་གྱ་སྟོན་བག་སྟོན་དང་།།
ཁང་སྟོན་སྐྲ་སྟོན་ནོས་སྟོན་སོགས།།
དགའ་སྟོན་ཀུན་ལ་འདི་ཉིད་བསྔགས།།
དེ་ཕྱིར་མདོ་སྡེ་དམ་པ་འདི།།
འབྲི་ཀློག་འཆང་དང་མཆོད་པ་ན།།
ཡིད་བཞིན་ནོར་དང་བུམ་བཟང་ལྟར།།
འདོད་པའི་དོན་ཀུན་འགྲུབ་པར་འགྱུར།།
དུས་མིན་འཆི་བའི་མཚན་མ་མཐོང་བ་ན།།
དེ་ཡི་མོད་ལ་ཚེ་དཔག་མེད་མགོན་སྐུ།།
གསལ་བར་མཐོང་ནས་འཆི་བདག་དཔའ་བཅོམ་སྟེ།།
འཆི་མེད་རིག་འཛིན་མྱུར་དུ་ཐོབ་པར་ཤོག།
སེམས་ཅན་ཡལ་བར་དོར་ནས་རང་དོན་ལ།།
རེ་བའི་བློ་ནི་ནམ་ཡང་མི་སྐྱེ་ཞིང་།།
གཞན་དོན་སྒྲུབ་པའི་ཚུལ་ལ་མ་རྨོངས་པའི།།
ཐབས་ལ་མཁས་པས་གཞན་དོན་ལྷུར་ལེན་ཤོག།
རྡོ་རྗེ་ཉི་མ་སྣང་བ་ཆེན་པོའི་དཔལ།།
རྡོ་རྗེ་ཟླ་བ་དྲི་མ་མེད་པའི་འོད།།
རྡོ་རྗེ་གསུམ་བདག་པདྨ་ས་རའི་གར།།
འགྱུར་མེད་རྡོ་རྗེའི་ངོ་བོར་རྟག་བརྟན་ཤོག།
དེ་སྐད་སྨྲ་ལ་སྤོབས་པའི་ལང་ཚོ་ཅན།།
མདོ་སྔགས་སེང་གེའི་འོ་མས་གསོས་པའི་བུ།།
ལྡོང་རིགས་ནོར་སྡེར་འབོད་པ་གང་དེ་ཡིས།།
རབ་རྒྱན་ལྕགས་བྱི་ས་ཟླའི་ཡར་ཚེས་ལ།།
ཕྱི་ནང་རྟེན་འབྲེལ་བཟང་པོས་ཉེར་བསྐུལ་ནས།།
གང་དྲན་སོར་མོའི་འདུ་བྱེད་བགྱིས་པ་ལ།།
འཁྲུལ་བ་གང་མཆིས་ལྷ་དང་མཁས་ལ་འཆགས།།
ལེགས་བྱས་ཆ་དག་བསྟན་འགྲོའི་གསོས་སུ་ཤོག།
སརྦ་མངྒ་ལཾ།། །།
| 