རྒྱལ་རོང་བུ་མོའི་མཐའ་མཇུག་གི་ཚེ་སྲོག
  ༄༅། །བཙན་པོའི་མགར་གྱི་དྲ་བས་ཁྱེད་ལ་དགའ་བསུ་ཞུ། དེ་རིང་ནི་སྤྱི་ལོ 2020 ལོའི་ཟླ 12 ཚེས 5 རེས་གཟའ་སྤེན་པ་ཡིན། དྲ་གནས་ཉར་ཚགས།  གཙོ་ངོས་སུ་འགོད་པ། ནང་འཇུག འདི་ནས་ང་དང་གླེང་མོལ་བྱ།
གཙོ་ངོས།
ཆོས་ལུགས།
རྩོམ་རིག
ལོ་རྒྱུས།
རུས་རྒྱུད།
དམངས་སྲོལ།
སྒྱུ་རྩལ།
དཔལ་འབྱོར།
མི་སྣ།
སློབ་གསོ།
ཕྱོགས་སྟོན་་་་ གཙོ་ངོས།» རྩོམ་རིག» འབོལ་རྩོམ། »རྒྱལ་རོང་བུ་མོའི་མཐའ་མཇུག་གི་ཚེ་སྲོག
རྒྱལ་རོང་བུ་མོའི་མཐའ་མཇུག་གི་ཚེ་སྲོག
རྩོམ་སྒྲིག་པ།  ཁཱ་ཤེས་རབ་རྒྱ་མཚོ། སྤེལ་དུས། 2020/10/24ལྟ་ཀློག (1571)རྩོམ་ཁུངས: ངེད་དྲ་བ།པར་འདེབ།


རྒྱལ་རོང་བུ་མོའི་མཐའ་མཇུག་གི་ཚེ་སྲོག


     དངོས་མིང་ཨ་མཚོ།  དྲྭ་མིང་ལ་བུ་མོ་ནག་པོ་འམ་ལྷ་མོ།  མོ་ནི་1990ལོར་རྒྱལ་རོང་ཁྲོ་སྐྱབས་ཐུགས་རྗེ་ཆེན་པོའི་ཉེ་འགྲམ་དུ་(དུ་མུ་ཞེས་པའི་ས་ཆ་དེར་ཁྱིམ་ཚང་གི་མིང་ལ་དཀའ་ངལ་རེ་)ཞེས་པའི་དུད་ཚང་དཀྱུས་མ་ཞིག་གི་ནང་དུ་ཆེས་ཐོག་མར་གཉོམ་ཆུང་གཉོམ་ཆུང་ཞིག་གི་ངུ་སྐད་དང་ལྷན་དུ་ལྟེ་བའི་ཁྲག་ཐིགས་དྲོན་མོ་ས་ལ་འཕོས། འོན་ཀྱང་མོ་རང་ཆུང་དུས་ནས་ཕ་མ་གཉིས་བཟའ་འཐོར་བྱས་པས་རྐྱེན་གྱིས་མོ་ནི་རང་གི་ཨ་ཕའི་ཟུར་ནས་ནར་སོན་ཞིང་ཆུང་དུས་ནས་དཀའ་སྡུག་གང་མང་ཞིག་མྱང་། སྐྱོ་གདུང་གི་རླབས་ཕྲེང་ཡང་ཡང་གཡོས་པའི་ལོ་དང་ཟླ་བའི་རྒྱུད་རིམ་ཁྲོད་དུ་ག་ལེར་གཞོན་ནུའི་ལང་ཚོའི་གཉོམ་ལག་རྒྱས་ཏེ་སྐར་ཚོགས་ལྟ་བུའི་གཞོན་སྐྱེས་དུ་མའི་ཁྲོད་དུ་བཅོ་ལྔའི་དུང་ཟླ་ལྟར་སྒེག་ཉམས་ཀྱི་ལང་ཚོའི་ཡལ་འདབ་ཆ་ཡོངས་སུ་རྫོགས་ཏེ། མིག་ཆུ་དང་རྔུལ་ཆུ་དུ་མ་འདྲེས་པའི་འཚོ་བའི་ཁྲོད་དུ་བཤད་མི་འདོད་པའི་སྐད་ཆ་དང་ནང་སེམས་ཀྱི་མེ་ལོང་ངོས་སུ་གསལ་བའི་ཚོར་བ་སྐྱུར་མོ་ཡོད་ཚད་སེམས་ཁོང་དུ་སྦས། གྲོང་ཚོ་དང་ཁྱིམ་མཚེས་གཉེན་ཉེ་ལ་སོགས་སུ་དང་གང་ལའང་དགའ་ལྷང་ལྷང་གི་ཉམས་དང་བཅས་ཏེ་ཐམས་ཅད་འཛུམ་གྱིས་བསུ་མཁན་ཞིག་ཡིན་པས། སྡེ་གྲོང་ཀུན་གྱིས་དགའ་མོས་བྱེད་ས་དང་ཡ་རབས་སྤྱོད་བཟང་ཅན་གྱི་བུ་མོ་ཞིག་ཡིན་པ་ཡོངས་སུ་གྲགས།

    གང་མཚམས་ཤིག་ནས་འཇིག་རྟེན་མིའི་འགྲོ་ལུགས་ཀྱི་ཁ་ཕྱོགས་དང་བསྟུན་ནས་དྲིན་ཆེན་ཕ་ལོས་ཀྱང་རང་གི་བུ་མོ་ལ་བྱམས་བརྩེ་ཞིག་གི་འོག་ནས་བུ་མོའི་འདོད་ཐོག་ཏུ་རྟ་རྒྱུག་པ་ལྟར་རྒྱབ་སྐྱོར་བྱས་ཏེ་མཐར་མོ་རང་གི་བསམ་བློའི་ཁ་ཕྱོགས་ལྟར་རྒྱ་རིགས་ཁྱིམ་ཚང་ཞིག་ལ་མནའ་མར་སོང་ནས་ལོ་འགའ་ཕྱིན་རྗེས་རང་གི་ཤ་དང་ཁྲག་ལས་ཆད་པའི་ཕྲུ་གུ་གཉིས་ཀྱི་ཨ་མ་རུ་གྱུར།  འོན་ཀྱང་འཇིག་རྟེན་གྱི་ཁ་དཔེ་ལ་མྱི་མི་ངན་ཞག་ངན་ཞེས་པ་ལྟར། ཧ་ཅང་གི་འགྲོགས་ཡུན་རིང་དུས་བསམ་བློའི་ཁ་ཕྱོགས་དང་མི་མཐུན་པའི་གནས་ཚུལ་རེ་རེ་རང་བཞིན་གྱི་ལྷང་ལ་བུད་དེ་ཁྱོ་ཤུག་གཉིས་ཀྱི་བར་ལ་འདོད་བློ་མ་ཁེངས་པའི་གནས་ཚུལ་ཡང་དགུན་གྱི་ལྷགས་རླུང་ལྟར་དྲན་རྟོག་ཕྲ་མོའི་རྒྱུ་བའི་ཀློང་ན་ཡང་ཡང་ལྡིང་ཞིང་། མཛའ་ཞིང་བརྩེ་བའི་མེ་ཏོག་གི་རང་མདངས་ཡང་རང་བཞིན་གྱིས་ཡལ་ཏེ་དུང་སེམས་ཀྱི་ལོ་འདབ་ཡང་གང་སར་རླུང་གིས་སྤུར་ཏེ་ཉིན་རེ་ནས་ཉིན་རེ་བཞིན་ས་ལ་ཇེ་མང་ནས་ཇེ་མང་དུ་འཐོར། ད་དུང་གསོན་ཉམས་དང་ལྡན་པའི་བརྩེ་དུང་གི་འོ་ཆུ་འདྲེས་མཚམས་དེར་ཁྲག་ཐིགས་ཀྱིས་རྒྱང་ཐག་བཅད་དེ་དབུགས་ཀྱི་རྒྱུན་ཐག་མ་འགག་གོང་ནས་བཙན་གྱིས་གསོན་པོ་དུར་སར་བསྐྱལ་བ་ལྟར་རིམ་བཞིན་གཏམ་ངན་དང་མི་ཁའི་འབགས་བཙོག་གི་རྙོག་ཆུ་ལྟ་བུ་དེ་ཡང་གཞི་ནས་བཞུར་བའི་མགོ་བརྩམས། དེ་འདྲའི་བརྒྱུད་རིམས་ཤིག་གི་ཁྲོད་དུ་སྟབས་མ་ལེགས་པ་ཞིག་ལ་མོ་རང་གི་ཁྱོ་གས་ཐེངས་འགར་ཚད་མེད་པའི་གཅར་རྡུང་བྱས་པས། དེ་སྔ་མཛའ་ཞིང་བརྩེ་བའི་ལྗང་མདོག་གི་ཞིང་ཁམས་དང་ལྟ་ན་སྡུག་པའི་ལྷིང་འཇགས་ཀྱི་འཇིག་རྟེན་དེ་གློ་བུར་དུ་ཡོད་ཚད་ནས་ཡོད་ཚད་བརླགས་པར་མ་ཟད་ལྟ་ན་མི་འདོད་པའི་ཐལ་མདོག་གི་གྲོག་རོང་ལྟ་བུ་ཞིག་ཏུ་གྱུར།  གང་ལྟར་དེ་ནས་བཟུང་སྐབས་རེར་གཉེན་འཐོར་ཞིང་སྐབས་རེར་ཁྱོ་ཤུགས་བསྐྱར་སྒྲིག་གི་གནས་ཚུལ་ཡང་ཐེངས་འགའ་རེ་བྱུང་མོད། ཡིན་ནའང་ཟོག་འདྲེས་གཡང་མྱི་འདྲེས་ཐན་ཟེར་བ་ལྟར་སེམས་ཀྱི་རྨ་ཁ་ནི་སུས་ཀྱང་གསོ་ཐབས་བྲལ་བའི་དཀར་ཡོར་ཆག་འཕྲོ་ལྟ་བུ་ཞིག་ཡིན་པས་ཡུན་རིང་མ་བརྟན་པར་མཐར་རྒྱལ་ཁབ་གྱི་རྩ་ཁྲིམས་དང་མཐུན་པའི་ཕྱོགས་གཉིས་ཀའི་མོས་མཐུན་འོག་བཟའ་འཐོར་བྱས་རྗེས་མོ་རང་ཡང་སླར་རང་ཁྱིམ་དུ་ལོག་ནས་ཟླ་བ་འགའ་ཕྱིན་པ་རེད།  སྐབས་དེར་མོའི་གཅེན་མོ་དང་ཨ་ཕ་གཉིས་ཀྱིས་མོ་ལ་འདི་ལྟར་བཤད་ཁྱེད་གཉིས་བཟའ་འཐོར་བྱས་ཚར་ཡོད་མོད་འོན་ཀྱང་ཁོང་ནི་ཧ་ཅང་གིས་གདུབ་རྩུབ་ཆེ་བས་ང་ཚོ་ལ་ཐུབ་ཚོད་གཏང་ངེས་ཡིན་པས་དེ་བས་ཁྱོད་རང་ལོ་འགའ་རེ་ཕྱི་ལོག་ས་མཐར་ཡིབ་ནས་བསྡད་ན་ལེགས་ཚུལ་གྱིས་ལམ་སྟོན་གནང་། འོན་ཀྱང་མོས་འདི་ལྟར་བཤད་དེ་ཨ་ཕའི་གཟུགས་པོ་ཡང་དེ་ཙམ་བདེ་བོ་མེད་པར་མ་ཟད་ལོ་ཚོད་ཀྱང་མཐོན་པོ་རེད། ད་དུང་ཕྲུ་གུ་གཉིས་ལ་ཡང་སྐབས་རེ་ཐུག་ན་འདོད་པས་ང་ཁྱེད་ཚོ་དང་རྦད་དུ་ཁ་བྲལ་ནས་ཆ་མེད་ཀྱི་ཡུལ་གྲུ་ཞིག་ཏུ་འགྲོ་བའི་འདོད་པ་མི་འདུག་ཅེས་ལན་བཏབ། སྐབས་དེར་མོས་ཐུགས་རྗེ་ཆེན་པོའི་ལྕགས་ཟམ་ཁར་མོ་རང་གིས་ཚོང་ཁང་ཆུང་ཆུང་ཞིག་ཕྱེས་ནས་ཚོང་ལས་ལ་གཉེར་བཞིན་ཡོད་ཅིང་ཞོར་དུ་དབྱར་ཁར་རི་འགོར་བུད་ནས་སྤྲུ་ནག་དང་ལྕུམ་རྩ་དབྱར་རྩྭ། ད་དུང་རྩྭ་སྨན་དང་སྔོ་སྨན་གྱི་རིགས་སོགས་འདྲ་མིན་བརྐོས་ནས་ཞོར་ལས་ལ་འབད་སའི་ཡུལ་དེར། ཁ་བ་དང་ཆར་རླུང་དྲག་ཏུ་འཚུབ་ཅིང་ལུས་ཀྱི་ཡན་ལག་གང་སར་རྨ་ཁ་དང་མཛུབ་མོའི་སོར་རྩེ་ཐམས་ཅད་རྣག་དང་ཁྲག་གིས་ཟིན་ཞིང་རྔུལ་ཆུའི་ཐིགས་པ་རེ་རེ་ས་ལ་ཟག་པའི་འཚོ་བའི་ཡུལ་དངོས་ཐམས་ཅད་དྲྭ་ལམ་དུ་ཐད་གཏོང་བྱས་ཏེ། དཀའ་སྡུག་བརྒྱ་ཕྲག་གིས་མནར་ནའང་ད་དུང་དགའ་བའི་འཛུམ་གྱིས་ཁེངས་ཤིང་ཐུན་མིན་གྱི་རྣམ་འགྱུར་རེ་རེས་ལྟད་མོ་བ་ཀུན་གྱི་སེམས་སུ་ཚོར་སྣང་དང་བག་ཆགས་ཟབ་མོར་རེ་རེར་གསར་དུ་བསྐྲུན། གླུ་གར་སྣ་ཚོགས་ཀྱི་འགྱུར་ཁུག་དང་ཚོར་བ་རྣོན་པོ་རེ་རེས་མོ་ལ་རྒྱབ་སྐྱོར་བ་དང་ལྟད་མོ་ལྟ་མཁན་གྱི་མི་གྲངས་ཀྱང་ 250000 ཁྲི་ཉི་ཤུ་རྩ་ལྔ་ལས་བརྒལ་ཏེ་དོ་ཁུར་བྱེད་མཁན་ཡང་ཇེ་མང་ནས་ཇེ་མང་དུ་གྱུར་ནས་མཐར་རྔ་བ་ཁུལ་གྱི་དྲ་དཔོན་ཞིག་ཏུ་གྱུར།

    འོན་ཀྱང་སྤྱི་ལོ་༢༠༢༠ ལོའི་ཟླ་༩ བའི་ཚེས་ ༡༤ དགུང་མོར་ཆུ་ཚོད་༩ ཡས་མར་ཞིག་ལ་སླར་ཡང་མོས་ཐད་གཏོང་བྱེད་བཞིན་པའི་སྐབས་དེར་གློ་བུར་དུ་ཕྱི་སྒོ་དྲག་ཏུ་སྤྲུག་ཅིང་ཡང་ཡང་བརྡུང་བས་སྒོ་ཡང་བཙན་པོས་ཐར་སེ་གཏོར་རྗེས་རྒྱ་སྟག་ཁྲ་མོ་མཆོང་ཐེངས་གཅིག་གིས་རི་བོང་གི་སྲོག་རྩ་སིག་སིག་ཏུ་འདར་བའམ་གླག་རྒོད་ཀྱི་ལྡིང་སྐོར་བྱེད་བཞིན་རྙབ་ཐེངས་གཅིག་གིས་ལུ་གུའི་ཚེ་སྲོག་སྡེར་ཁ་ནས་ཤོར་བ་ལྟ་བུའི་སྣང་བརྙན་གསོན་པོ་ཞིག་སྟེ། གང་ལྟར་མོའི་ཁྱོ་གས་སྒོ་བཙན་གྱིས་གཏོར་རྗེས་མོ་ལ་གྲི་ཐེངས་མ་བརྒྱད་བཙུགས་རྗེས་ལུས་ལ་རླངས་སྣུམ་བླུགས་ནས་མེར་སྤར་ཏེ་ལུས་ཀྱི་པགས་ཤུན་བརྒྱ་ཆ་དགུ་བཅུ་ཡོངས་རྫོགས་མེས་ཚིགས་ཤིང་། སྐབས་དེར་མོའི་ཐད་གཏོང་གི་དྲྭ་མིང་ལྟར་མིང་དོན་དང་མཚུངས་པའི་དངོས་སུ་བུ་མོ་ནག་པོ་ཞིག་ཏུ་གྱུར། སྤྱིར་མོས་ཐད་གཏོང་བྱེད་བཞིན་པའི་སྐབས་དེར་མོ་ལ་དོ་ཁུར་བྱེད་མཁན་གྱི་ལྟད་མོ་བ་དག་གིས་གོ་ཐོས་ལྟར་ན་མོ་ཡིས་སྐུ་མཁྱེན་ང་ལ་རླངས་སྣུམ་མ་བླུག་རོགས། ང་ལ་རླངས་སྣུམ་མ་བླུག་རོགས་ཞེས་འབོད་སྐུལ་བྱས་པའི་སྐད་དེ་ཀུན་གྱིས་ཐོས་སོང་ཟེར། དེ་ནས་ཡུད་ཙམ་གྱི་རྗེས་སུ་ཐད་གཏོང་བྱེད་སའི་ཁ་པར་གྱི་མདུན་དུ་མེ་ལྕེ་དམར་པོ་ཡང་ཡང་དམར་ལེམ་ལེམ་དུ་འབར་བར་མཐོང་རྗེས་གང་ཡང་ཆ་མ་འཚལ་བར་ག་ལེར་ནག་ཐུམ་མེར་གྱུར་སོང་ཟེར། དེ་ལྟར་དབྱངས་རྟ་དང་དགོད་སྒྲས་ཁེངས་པའི་མཛེས་སྡུག་གི་མཚན་མོ་དེ་གློ་བུར་དུ་ཞེད་སྣང་དང་ངུ་སྐད་ཀྱིས་གང་སར་ཁྱབ་པའི་མུན་ནག་ཅིག་ཏུ་གྱུར། དེ་ནས་ཅང་མ་འགོར་བར་མོ་ལ་དོ་ཁུར་བྱེད་མཁན་གྱི་ལྟད་མོ་བ་དག་གིས་ཡར་མར་གང་སར་ཁ་པར་བརྒྱབ་ནས་རླང་འཁོར་ཞིག་གི་ནང་བཞག་སྟེ་འབར་ཁམས་སྨན་ཁང་དུ་ཁྲིད་དུས་ལམ་བར་ནས་ཨ་ཕ་དང་གཅེན་མོ་གཉིས་ལ་མིག་གིས་ཧྲིལ་ཧྲིལ་དུ་ལྟ་ཞོར་འདི་ནི་མོའི་མཐའ་མཇུག་གི་སྐད་ཆ་ཞིག་སྟེ། ཨ་ཕ་ལགས་ང་ཕལ་ཆེར་ཚར་སོང་འདུག་ཡར་གསོན་ཐུབ་པའི་རེ་བ་དང་ཚོར་སྣང་ང་ལ་གཏན་ནས་མི་འདུག གང་ལྟར་ཁྱེད་ཀྱི་མི་ཚེ་གཅིག་ལ་ངས་ཚེ་གཡོག་བྱ་ཐུབ་མ་སོང་བས་ཨ་ཕ་ཁྱེད་དགོངས་པ་ཁྱོན་ནས་མ་འཚོམས་རོགས་གནང་། ཨ་ཕ་ཁྱེད་ལ་དངོས་གནས་དགོངས་དག་ཞུ། ཨ་ཕའི་མི་ཚེ་ལྷག་མ་ཨ་ཅག་ཁྱེད་ཀྱིས་ལྟ་རྟོག་གནང་རོགས་ཞེས་མིག་མཐའ་མཆི་མས་གང་ཞིང་བཤད་མཚམས་བཞག་སོང་ཟེར། དེ་ནི་དྲིན་ཆེན་ཕ་ལོ་ལ་བཅང་བའི་བརྩེ་བ་དང་འཇིག་རྟེན་འདིར་མོས་བཞག་པའི་མཐའ་མཇུག་གི་སྐད་ཆའམ་འཆི་ཁའི་ཁ་ཆེམས་ཤིག་ཏུ་གྱུར་ཡོད། དེ་ནས་སྨན་ཁང་དུ་འབྱོར་ནས་མྱུར་སྐྱོབ་བྱེད་བཞིན་པའི་སྐབས་དེར་མོའི་ཐད་གཏོང་ལ་དགའ་མོས་བྱེད་མཁན་གྱི་མི་གྲངས 919000ཁྲི་དགུ་བཅུ་གོ་གཅིག་དང་སྟོང་དགུ་ལ་བུད་དེ་རྒྱ་བོད་ཧོར་སོགས་མི་རིགས་སྣ་ཚོགས་ཀྱི་བྱམས་བརྩེ་དང་ལྷག་བསམ་ཅན་གྱི་དྲྭ་རྩེད་མཁན་དག་གིས་ཆུ་ཚོད་ཉི་ཤུ་རྩ་བཞིའི་རིང་ལ་དམངས་སྒོར་ཁྲི་བརྒྱ་ལྷག་བསྡུ་རུབ་བྱས་ནས་རྒྱབ་སྐྱོར་གྱི་ཚུལ་དུ་མོ་ལ་ཞལ་འདེབས་གནང་། མཐར་ཁྲིན་ཏུའུ་སྨན་ཁང་དུ་ཁྲིད་ནས་ཉིན་འགར་སྨན་བཅོས་བྱས་ནའང་གསོན་པའི་རེ་ཐག་ཆད་དེ་ཐབས་ལམ་གཞན་གང་ཡང་མ་རྙེད་པར་སྤྱི་ཟླ་དགུ་བའི་དགུང་མོར་ཆུ་ཚོད་ ༡༢ ཡང་ན་ཟླ་བ་བཅུ་པའི་ཚེས་/༡/ གི་ཉིན་ལ་ག་ལེར་མགྲིན་པ་དང་གྲེ་བའི་མཚམས་སུ་ཉན་ན་མི་འདོད་པའི་་ཧུར་ཧུར་གྱི་སྒྲ་ཞིག་དང་བཅས་ཏེ་དབུགས་ཀྱི་རྒྱུ་བ་འགག་ཅིང་། ཁུ་སིམ་སིམ་གྱི་ལྷིང་འཇགས་ཀྱི་མཚན་མོ་དེར་གཅེས་སུ་འོས་པའི་ཕ་ཡུལ་ཁ་བ་གངས་ཅན་པའི་ཕ་ས་དང་གཏན་དུ་ཁ་བྲལ་སོང་ཟེར།   བྱམས་བརྩེ་འབུམ་གྱིས་ཕྱུག་པའི་ཀློག་པ་པོ་རྣམས་ལ་ཆེད་དུ་ཞུ་རྒྱུ། གནས་ཚུལ་འདི་ཐེངས་གཅིག་བཀླག་རྗེས་བསྔོ་སྨོན་ཚར་རེ་གནང་རོགས་ཞེས་རེ་བསྐུལ་དང་བཅས་སྙིང་ནས་བཀའ་དྲིན་ཆེ་ཞུ།


ཞེས་རྒྱལ་རོང་སྐལ་བཟང་གཡུང་དྲུང་དུ་འབོད་པ་དེས་སྤྱི་ཟླ་ཚེས་ཉིན་སྨན་རིའི་གླིང་ནས། 2020/10/ 23 /

དྲྭ་ཚིགས་གཙོ་སྐྱོང་བ་དང་དོ་དམ་པ། ཁཱ་ཤེས་རབ་རྒྱ་མཚོ། རྩོམ་སྒྲིག་པ། མགར་ཚེ་རིང་བཀྲ་ཤིས།
འདྲེན་བཀོལ:
61.4K

  དཔྱད་གཏམ ( 0 )ཡོད།
དཔྱད་གཏམ་སྤེལ་ས།
སྤེལ་མཁན།
བཤེར་གྲངས།
fc4i བཤེར་གྲངས་ཁ་སྐོང་བྱོས། ཡིག་འབྲི་བཞི་ལས་མང་མི་རུང་། ཡིག་འབྲི་བཞི་ལས་ཉུང་མི་རུང་།
ནང་དོན་བྲི་རོགས། ཡིག་འབྲི་གསུམ་ལས་ཉུང་བ་སྤེལ་མི་རུང་། ཡིག་འབྲི་སུམ་སྟོང་ལས་མང་བ་སྤེལ་མི་རུང་།
ནང་དོན་ཡིག་འབྲི་སུམ་སྟོང་ལས་བརྒལ་མི་རུང་། བྲིས་ཟིན་ཡིག་འབྲི།    
མིག་སྔར་འདི་རུ་དཔྱད་གཏམ་སྤེལ་མཁན་མ་བྱུང་།
ལྟ་ཀློག་གྲངས་ཀ
21567787
དྲ་ཚིགས་བཟོ་སྐྲུན།
 
འབྲེལ་གཏུག་བྱ་ཡུལ།   ཁ་པར།  15283703999    E-mail:tbmgar@163.com
པར་དབང་བཙན་པོའི་མགར་གྱི་དྲ་བ་ལས་གཞན་ལ་མེད།
蜀ICP备13002975号