མི་ཉག་འོད་ཟེར་གྱི་རང་མོས་སྙན་ངག་ཁག་བཞི།
  ༄༅། །བཙན་པོའི་མགར་གྱི་དྲ་བས་ཁྱེད་ལ་དགའ་བསུ་ཞུ། དེ་རིང་ནི་སྤྱི་ལོ 2021 ལོའི་ཟླ 12 ཚེས 6 རེས་གཟའ་ཟླ་བ་ཡིན། དྲ་གནས་ཉར་ཚགས།  གཙོ་ངོས་སུ་འགོད་པ། ནང་འཇུག འདི་ནས་ང་དང་གླེང་མོལ་བྱ།
གཙོ་ངོས།
ཆོས་ལུགས།
རྩོམ་རིག
ལོ་རྒྱུས།
རུས་རྒྱུད།
དམངས་སྲོལ།
སྒྱུ་རྩལ།
དཔལ་འབྱོར།
མི་སྣ།
སློབ་གསོ།
ཕྱོགས་སྟོན་་་་ གཙོ་ངོས།» རྩོམ་རིག» བདམས་བཀོད་རྩོམ་ཡིག »མི་ཉག་འོད་ཟེར་གྱི་རང་མོས་སྙན་ངག་ཁག་བཞི།
མི་ཉག་འོད་ཟེར་གྱི་རང་མོས་སྙན་ངག་ཁག་བཞི།
རྩོམ་སྒྲིག་པ།  དོ་དམ་པ། སྤེལ་དུས། 2021/11/13ལྟ་ཀློག (691)རྩོམ་ཁུངས: ངེད་དྲ་བ།པར་འདེབ།


    མི་ཉག་འོད་ཟེར། ཤེས་རམས་པའི་ཞིབ་འཇུག་སློབ་མ། ཁམས་མི་ཉག་མགར་ཐར་ས་ཆར་སྐུ་བཅར་ཞེས་པའི་ཁྱིམ་རྒྱུད་དུ་སྐྱེས། ཆེ་འབྲིང་གི་སློབ་གྲྭ་སོགས་འགྲིམས་ཏེ། བོད་ཀྱི་རིག་གནས་དང་། ལོ་རྒྱུས། རྩོམ་རིག། བོད་རྒྱ་རྩོམ་རིག་ལོ་ཙཱ་སོགས་ལ་སློབ་སྦྱོང་བྱས། སི་ཁྲོན་ཞིང་ཆེན་བོད་ཡིག་སློབ་གྲྭ་དང་དཀར་མཛེས་ཁུལ་རིག་གནས་ཁང་། སི་ཁྲོན་གངས་ལྗོངས་ཉི་གཞོན་འཕྲིན་སྦྱོར་ཀུན་འདུས་ལྟེ་གནས། སི་ཁྲོན་མི་རིགས་དཔེ་སྐྲུན་ཁང་བཅས་སུ་དགེ་རྒན་དང་རྩོམ་སྒྲིག་སོགས་ཀྱི་བྱ་བ་གཉེར། 2007ལོ་ནས་བཟུང་རྩོམ་རིག་གསར་རྩོམ་གྱི་ལམ་བུར་ཞུགས་ཤིང་། སྔ་རྗེས་སུ་སྙན་ངག་དང་ལྷུག་རྩོམ། ཡུལ་སྐོར་ཟིན་ཐོ་སོགས་རྩོམ་ལུས་མི་འདྲ་བའི་བརྩམས་ཆོས་མང་པོ་ཞིང་ཆེན་ཕྱི་ནང་གི་དུས་དེབ་དང་ཚགས་པར་སྣ་ཚོགས་སྟེང་བཀོད། གཞན་རྩོམ་སྒྲིག་དང་གཙོ་སྒྲུབ་བྱས་པའི་དཔེ་དེབ་དང་དཔེ་ཚོགས་སྣ་ཚོགས་ལ་རྒྱལ་ཁབ་དང་ཞིང་ཆེན་རིམ་པའི་བྱ་དགའ་མང་པོ་ཐོབ་མྱོང་། 


ཤར་གྱི་རྒྱལ་མོ་ཚ་བ་རོང་།  

འོད་ཀྱི་དམུ་ཐག་ཅིག།

རིགས་ཀྱི་བླ་སྲོག་ལ་བརྒྱུས་ཏེ།

བསྐལ་པ་ནས་བསྐལ་པའི་བར་ཏུ།

མེས་པོའི་གདོང་གི་རྒས་གཉེར་གྱི་རི་མོ་བགྲངས།


གནམ་སའི་གའུ་ཁ་ཕྱེས་པ་ནས།

ཁྱེད་ནི་ཉི་ཟླ་དང་ལྷན་སྐྱེས་སུ།

སྲིད་པའི་སྒོ་ངའི་སྦུབས་ལས་གྲོལ་ཏེ།

ས་སྒང་རིལ་མོ་འདིའི་གདོད་མའི་གཏམ་རྒྱུད་བསྐྲུན།


ཞང་ཞུང་ཕུག་གི་འོལ་མོ་ནས། 

མེས་པོ་ཚོ་དཀའ་སྡུག་གི་འཕྲང་ལམ་བརྒྱུད་དེ།

ཁྱུང་ཆེན་སྒྲོ་ཐུལ་བརྐྱངས་འདྲའི་གཡང་གཞིས་འདི་ནས།

མི་རབས་ནས་མི་རབས་སུ་འཚོ།


ཤར་གྱི་རྒྱལ་མོ་དམུ་རྡོ།

གནམ་འདེགས་ཀྱི་ཀ་ཆེན་ཇི་བཞིན།

གངས་རིའི་ཤར་གྱི་རོང་ཆེན་ན།

གཡོ་མེད་དུ་བརྟན་ཞིང་བརྗིད།


རྒྱལ་མོའི་མཉེན་འཇམ་གྱི་སྐུ་ལུས་ལས།

ས་ལ་ཟགས་པའི་རྔུལ་ཆུའི་ཐིགས་པ་ཞིག་སྟེ།

ཆུ་བོ་རྒྱལ་མོ་རྔུལ་ཆུ།

ལོ་ཟླའི་རླབས་རྒྱུན་དང་བསྡོངས་ཏེ་རྒྱང་རིང་དུ་བཞུར།

༢༠༢༡ལོའི་ཟླ༡༠པའི་ཚེས༢༠ཉིན་པེ་ཅིན་ནས་

ཁྲི་འདུའི་བར་གྱི་མཁའ་ལམ་དུ་བྲིས།


ལི་ཐང་། ན་ཆུང་མའི་མཆུ་སྒྲོས་སུ་བཞད་པའི་

མེ་ཏོག་རྐང་གཅིག


གངས་རིའི་ཁོང་གསེང་གི

གནམ་སའི་འདྲེས་མཚམས་ན་འགྱིང་བའི་ལི་ཐང་ནི། 

ན་ཆུང་མའི་མཆུ་སྒྲོས་སུ་བཞད་པའི་མེ་ཏོག་རྐང་གཅིག་སྟེ།

སྙིང་དུ་སྡུག་ཅིང་དུངས་བས་བཟི།


ལི་ཐང་ནི།

ཁྲུང་ཁྲུང་དཀར་མོ་ཞིག་གི་གཤོག་ཟུང་སྟེ།

ཁྱེད་ཀྱི་ཁོག་ཡངས་པའི་བྲང་གཞུང་ནས།

འཁྲེང་ཞེན་དང་ཕྱི་མིག་གི་ཀློང་ན།

ནམ་འཕང་གཅོད་ཅིང་གཤོག་རྩལ་ངོམས།


ལི་ཐང་། གྲྭ་རྐྱང་འཁྱམ་པོ་ཞིག་གི་པིར་རྩེ་ནས་འཕྱོ་བའི་སྙན་ངག་དྭངས་མ།

གངས་རི་དཀར་པོའི་དབུ་གཙུག་ན་འཚེར་བའི་འོད་ཀྱི་མུ་ཏིག

ས་ཆེན་ཟླུམ་པོའི་ཐོད་དུ་བཅིངས་པའི་བྱུར་དམར་འཁྲི་ཤིང་།


ལི་ཐང། 

སྒང་དྲུག་རི་བོའི་གཏོས་སུ།

ཁྱེད་ནི་སྲིད་པའི་གངས་རྒན་དང་ལྷན་དུ།

སྒོམ་ཚུགས་ཀྱིས་འགྲེང་ཞིང་།

ཡར་ཀླུང་གཞུང་གི་གསས་མཁར་ན།

དུད་དྲེག་གིས་སྦགས་པའི་གླེགས་བམ་ཁྲོད་དུ་ཁྱེད་རང་གླེང་མཁན་བྱུང་འདུག་སྐད།


ཁྱེད་ཀྱི་བྲང་རུམ་ནས། 

སྒང་པ་ཚང་གི་སྙིང་གསོན་པོའི་འཕར་ལྡིང་གི་ཐག་སྒྲ་ཉན་ཆོག་ལ།

ཉི་ཟླ་དང་ཆེས་ཉེ་ས་ནས་དྭངས་གསལ་གྱི་མཁའ་དབྱིངས་ལ་ལག་བྱུག་བྱེད་ཆོག།


ལི་ཐང་ནི།

ཕ་མེས་ཚོའི་རུས་རྐང་ན་འཁྱིལ་བའི་རིགས་ཀྱི་དབྱངས་རྟ་འཇམ་པོ་དེ་ཡིན་ལ།

རྒྱང་རིང་གི་ངང་སྒུག་དང་དྲན་པའི་ཀློང་ནས་སྦྲུམ་པའི་འཛུམ་མདངས་མངར་མོ་དེ་ཡིན། 


ལི་ཐང་ནི། 

འབྲོང་དར་མའི་ངུར་སྒྲས་མཆེད་པའི་ས་མཐོའི་ཡུལ་གྲུ་དེ་ཡིན་ཞིང་།

རྟ་འདོ་བའི་བང་རྩལ་གྱིས་བསྒྲུན་པའི་གདོད་མའི་ཕ་གཞིས་ཀྱང་ཡིན་ནོ།།


མགར་ཐར། ཞེ་ལ་ཐོགས་པའི་ཕ་ཡུལ།


ཕ་ས་སྨུག་པོ་འདི་སེམས་ལ་སྒོམ་དུས།

དྲོད་ཁོལ་དང་བརྩེ་བ་འཇམ་པོ་ཞིག་གིས་སྦྲུམ་པའི།

རྒྱང་རིང་རྒྱང་རིང་གི་ཕ་ཡུལ་ཏེ།

ང་དང་ཡུལ་གྱིས་བསྐལ་བའི་གཞིས་ཁྱིམ་དྲོན་མོ་དེ་སླར་ཡང་ཡིད་ལ་འཁོར་བྱུང་།


ལོ་ཟླ་མང་པོ་མང་པོ་ཞིག་ལ།

ཕ་ཡུལ་གྱི་པང་དུ་འཚོ་མ་ཐུབ་རུང་།

བྱམས་བརྩེས་འཚོ་བའི་ཡུལ་མི་ཚོའི་བཞིན་རས་དང་།

ད་དུང་།  རི་ཆུ་ནགས་གསུམ་སོགས།

ཕ་ཡུལ་གྱི་རང་བྱུང་གི་བཀོད་པ་རྣམས་སེམས་ལ་དྲན་ཐེངས་རེ་རེར།

སེམས་ཀྱི་སྨེང་བའམ་ཡང་ན་ན་ཟུག་དྲག་པོ་ཞིག །

གློ་མཆིན་སྙིང་གསུམ་བར་ནས་དལ་གྱིས་ལྡིང་ཡོང་།


མགར་ཐར།

ཆུ་བཞི་སྒང་དྲུག་གི་འཕྲེད་གཞུང་ན།

ཕྲ་རྒྱན་བཏབ་པའི་གསེར་གྱི་ཚོམ་བུ་ཇི་བཞིན།

མི་རིགས་འདིའི་དབུ་འཕངས་ས་ཆེན་གྱི་གཙུག་ན་འཕགས་དུས།

བཙན་པོའི་ཕ་མཁར་ནང་དུ། 

མགར་སྟོང་བཙན་ཞེས་དཔའ་མཛངས་འཕྲུལ་ཅན་གྱི་དགུང་བློན་འདི་ཉིད།

ཁྱེད་ཀྱི་བྲང་རུམ་ནས་བསྙོལ་བའི་རིགས་རུས་ཤིག་གི་བུ་ཚ་ཡིན་སྐད།


ཟླ་བདུན་པའི་ལང་ཚོའི་ཁྲོད་དུ།

ཕ་ཡུལ་གྱི་པང་ཁུག་ནས་སེམས་པ་བརླན་ལ་སྦྱར་དུས།

ལྗང་མདོག་གིས་སྤུད་པའི་རི་ཀླུང་ཐང་གསུམ།

ན་ཆུང་མའི་འཛུམ་བག་ཇི་བཞིན།

ཕ་ཡུལ་གྱི་བཞིན་རས་འདི་ཇི་འདྲའི་སྙིང་དུ་སྡུག་ཨང་།


མགར་ཐར། ཞེ་ལ་ཐོགས་པའི་ཕ་ཡུལ།

༢༠༢༡ལོའི་ཟླ་༨པའི་ཚེས་༨ཉིན་གྱི་མཚན་མོར་བཅོས།


དོ་ནུབ། ཡང་གཉིད་ཁུག་མ་སོང་།


དོ་ནུབ།

ཡང་གཉིད་ཁུག་མ་སོང་། 

བསམ་གཞིགས་སྣ་མང་ཞིག།

དྲན་པའི་ཡོལ་རས་སུ་སྤུངས་ཤིང་།

ཕྱིར་དྲན་དང་དགའ་སྐྱོའི་ཀློང་ནས།

སེམས་ཀྱི་རྟོག་འགྱུ་འདི།

ཧ་ཅང་རྒོད།


གོ་ཐོས་ལ།

ཕ་ཡུལ་ན་ཁ་བ་བབས་འདུག་ཟེར།

དཀར་བོང་བོང་གི་ཕ་ཡུལ།

རུ་སྡེ་ཁྲ་མོ་འདི་ཡི་ངོ་གདོང་།

ནག་ནོག་གི་དྲི་མས་དབེན་ཞིང་།

དག་ཅིང་གཙང་།


རྨི་ལམ་ལ་གཤོག་པ་ཐོགས་པའི་ལོ་ཟླ།

ས་ཆེན་ལ་གསེར་མདོག་བྱུག་པའི་དུས་ཚིགས།

ཕ་ཡུལ།

སེམས་ཀྱི་ཞིང་ས་ན།

མངོན་ཆུང་གིས་འཛུམ།

༢༠༢༡ལོའི་ཟླ༡༡པའི་ཚེས༡༡ཉིན་གྱི་མཚན་གུང་ལ་བྲིས།


གཙོ་སྐྱོང་བ་དང་དོ་དམ་པ། ཁཱ་ཤེས་རབ་རྒྱ་མཚོ།
རྩོམ་སྒྲིག་པ། མགར་ཚེ་རིང་བཀྲ་ཤིས།

འདྲེན་བཀོལ:
61.4K

  དཔྱད་གཏམ ( 0 )ཡོད།
དཔྱད་གཏམ་སྤེལ་ས།
སྤེལ་མཁན།
བཤེར་གྲངས།
41s7 བཤེར་གྲངས་ཁ་སྐོང་བྱོས། ཡིག་འབྲི་བཞི་ལས་མང་མི་རུང་། ཡིག་འབྲི་བཞི་ལས་ཉུང་མི་རུང་།
ནང་དོན་བྲི་རོགས། ཡིག་འབྲི་གསུམ་ལས་ཉུང་བ་སྤེལ་མི་རུང་། ཡིག་འབྲི་སུམ་སྟོང་ལས་མང་བ་སྤེལ་མི་རུང་།
ནང་དོན་ཡིག་འབྲི་སུམ་སྟོང་ལས་བརྒལ་མི་རུང་། བྲིས་ཟིན་ཡིག་འབྲི།    
མིག་སྔར་འདི་རུ་དཔྱད་གཏམ་སྤེལ་མཁན་མ་བྱུང་།
ལྟ་ཀློག་གྲངས་ཀ
27159614
དྲ་ཚིགས་བཟོ་སྐྲུན།
 
འབྲེལ་གཏུག་བྱ་ཡུལ།   ཁ་པར།  15283703999    E-mail:tbmgar@163.com
པར་དབང་བཙན་པོའི་མགར་གྱི་དྲ་བ་ལས་གཞན་ལ་མེད།
蜀ICP备13002975号-1