དད་པའི་ཀློང་ན་གསང་བའི་ཡང་གསང་ཡོད། །
དད་པའི་ངོགས་ན་བརྒྱུད་ཁྲིའི་ཡང་གསང་ཡོད། །
དད་པའི་མངལ་དུ་རང་བྱུང་ཤེས་རབ་སྦྲུམ། །
དད་པ་འདི་ཉིད་ལེགས་ཚོགས་འབྱུང་གནས་ཡིན། །
སྣང་བའི་ཡིད་ཁམས་སྙིང་དུ་མཛེས་ན་ཡང་། །
ཐག་ཆོད་མེད་ན་སྐད་ཅིག་མི་སྡོད་པའི། །
སྲོག་གི་དྭངས་མ་འཛིན་པའི་དད་སེམས་འདི། །
གཏན་བདེའི་ས་ཆེན་ཟིན་པའི་ལམ་བུ་ཡིན། །
སྙན་བརྒྱུད་མན་ངག་ཇི་ལྟར་ཟབ་ན་ཡང་། །
སྙིང་གི་དད་སེམས་འདི་ལས་ཟབ་ཅིག་མིན། །
འདི་ལ་ཤེས་རབ་དང་ནི་སྙིང་རྗེ་ཡི། །
བསོད་ནམས་དག་གིས་རང་ནས་འཁྱུད་དེ་ཡོད། །
འདི་ཉིད་ཡོད་ན་ངེས་དོན་ངེས་དོན་ཡིན། །
འདི་ཉིད་མེད་ན་ངེས་དོན་ངེས་དོན་མིན། །
འདི་ཉིད་ཡོད་ན་དྲང་དོན་བདེན་མེད་ཡིན། །
འདི་ཉིད་མེད་ན་དྲང་དོན་བདེན་གྲུབ་མིན། །
འདི་ཉིད་ཡོད་ན་འཇིག་རྟེན་གཙང་མ་ཡིན། །
དག་པའི་ཞིང་མཆོག་དེ་ཡང་གཞན་ན་མེད། །
སེམས་དཔའ་སེམས་མ་དག་ཀྱང་མཐོང་ལམ་གྱི། །
གང་ཟག་དག་ལས་གཞན་དུ་མེད་པ་ཡིན། །
འདོད་ཆགས་ཆེན་པོ་དྭངས་ཤིང་གསལ་བ་ཡིན། །
བདེ་བའི་བདེ་ཆེན་དེ་ཡི་གཤིས་ན་ཡོད། །
དེ་ལྟར་གཞན་པའི་ཉོན་མོངས་དག་ལ་ཡང་། །
རྟོགས་ན་ཡོན་ཏན་ཕུན་ཚོགས་གདོད་ནས་གྲུབ། །
ཤེས་ན་རྒྱལ་བ་ཁྱོད་དང་དབྱེར་མེད་ཡིན། །
མ་ཤེས་རྒྱལ་བ་གར་ཡོད་མི་མཁྱེན་པའི། །
ཤེས་དང་མི་ཤེས་གཉིས་ཀྱི་ས་མཚམས་ནས། །
འགྲོ་དང་མི་འགྲོ་དག་གི་མཚན་མ་བྱུང་། །
སྣང་བ་ལམ་དུ་འཁྱེར་ན་མི་ཆོག་ཅེས། །
དབུ་དཀར་རྒན་པོས་འཁར་བ་འཕྱར་དེ་སྨྲ། །
སྡེ་སྣོད་གསུམ་ལས་འདི་འདྲ་མ་བསྟན་ཅེས། །
ལུས་པོ་ལྕུག་ལྕུག་ངང་ནས་ཤེས་ཀྱིས་སྨྲས། །
དེ་ལྟར་གྲུབ་མཐའི་བློ་ཡིས་བསྒྱུར་བ་ཡི། །
གང་ཟག་ཁྱོད་ཉིད་ཁོ་བོར་གཤེ་ན་ཡང་། །
སྙིང་གི་བྱམས་བརྩེའི་ཆུ་རྒྱུན་ཇེ་འབབ་རེད། །
དགེ་ཚོགས་ཡོན་ཏན་ཁྱོད་ལ་བསྔོ་བ་ཡིན། །
གཞུང་བརྒྱའི་ཤོག་མཐའ་བདག་གིས་མ་བསྒྱུར་ཡང་། །
ཕ་རྒོད་རྡོ་རྗེ་འཆང་གི་བྱིན་རླབས་ལས། །
རྟེན་འབྱུང་སྒྱུ་མའི་གར་གྱི་འཕྲུལ་བག་དེས། །
ངོ་བོའི་གནས་ཚུལ་རྟོགས་པའི་དད་པ་རྙེད། །
བྱང་ཆུབ་སེམས་མཆོག་དད་པའི་མངལ་ནས་སྐྱེས། །
ངེས་འབྱུང་རྣམ་དག་དེ་ཡང་དེ་བཞིན་ལགས། །
དེའི་ཕྱིར་བརྗོད་མེད་ཤེས་རབ་དེ་ཀ་ཡང་། །
དད་སེམས་ནོར་བུའི་ཀློང་ནས་མངོན་པར་འགྱུར། །
དོན་དུ་དད་པ་འདི་ཡང་དད་པ་མིན། །
དད་སེམས་རང་མཚན་པ་ལས་འདི་ཉིད་འདས། །
དེའི་ཕྱིར་ཁོ་བོས་བརྗོད་པའི་དད་པ་འདི། །
ཀུན་བཟང་གདོད་མའི་མགོན་པོའི་རང་ཞལ་ཡིན། །
སྣང་བ་དྭངས་དྭངས་བྱོས་དང་སྐྱིད་པོ་ཡིན། །
རིག་པ་གསལ་གསལ་བྱོས་དང་གནད་ཅིག་ཡོད། །
དབེན་པའི་རུ་སུལ་དག་ལ་རྟག་ཏུ་སོང་། །
ཁ་ཏོན་བཟླས་སྦྱོར་དེ་ཡང་ཆགས་མེད་དགོས། །
བརྗོད་མེད་རིག་པའི་གདེང་གི་གླུ་ཆུང་འདི། །
ཡང་དག་རྒྱལ་བའི་ལམ་ལ་མོས་པ་ཡི། །
སྐལ་བཟང་སྐྱེས་བུའི་ཚོགས་ཀྱི་སྤྱན་ལམ་དུ། །
གང་ཤར་རང་གྲོལ་རྩལ་གྱིས་བྲིས་ཏེ་ཕུལ། །
སྙིང་བོ་དོན་གྱི་སྲོག་གི་ཀ་བ་ལ། །
གསར་བྱུང་ཐ་སྙད་འགའ་ཡིས་དཀྲིས་པ་དང་། །
དེང་རབས་རྩོམ་སྟངས་ཤིག་ཀྱང་བསྣན་ཡོད་པའི། །
དཔལ་ལྡན་སྲོལ་རྒྱུན་རྒན་པོར་བཤགས་པར་བགྱི། །