འཚོ་བའི་ཁྲོད་ནས་རྒྱུན་དུ་འཛེམ་དགོས་པ་ཞིག

བོད་མིར་བཟའ་བཏུང་ཐད་འཛེམ་དགོས་པའི་ཆ་མང་བོ་ཡོད།  དང་ཐོག་མི་དང་།  གླང་བོ་ཆེ།  ཁྱི།  བྱ་རྒོད།  རྟ་དང་བཅས་པའི་ཤ་ཆེན་ལྔ་ནི་གཏན་ནས་བཟའ་མི་རུང་བ་ཞིག་རེད།  དེ་ནས་མས་སོ་ལས་ཡས་སོ་མེད་པ།  རྨིག་པ་ཁ་ཧྲལ་ཅན་གྱི་སེམས་ཅན་འབྲི་གཡག་བ་གླང་དང་།   ར་ལུག་རྣ་གཡག་སོགས་ཀྱི་ཤ་བཟའ་ཆོག་རུང་།   ཡས་སོ་མས་སོ་གཉིས་ཀ་ཡོད་ལ།  རྨིག་པ་ཁ་ཟླུམ་ཅན་གྱི་སྒོ་ཕྱུགས།   དཔེར་ན་རྟ་དྲེལ་བོང་བུ་ལྟ་བུ་དང་།  གཅན་གཟན་སྡེར་མོ་ཅན་དཔེར་ན།   སྟག་གཟིག་དོམ་དྲེད་སྦྱང་ཀི་ལ་སོགས་པའི་ཤ་རྣམས་གཏན་ནས་བཟའ་སྲོལ་མེད།   འདབ་ཆགས་ཀྱི་རིགས་ལས་ངང་བ་དང་ཁྲུང་ཁྲུང་དེ་བཞིན་ཁྱིམ་བྱ་ལ་སོགས་ཀྱི་རིགས་རེ་གཉིས་ཙམ་ལས་བྱེའུ་དང་ཕུག་རོན་ལ་སོགས་པའི་འདབ་ཆགས་གཞན་པ་རྣམས་ཀྱི་ཤ་དང་།  བྱི་ལ་ལ་སོགས་སྡེར་མོ་ཅན་གྱི་སེམས་ཅན་སྣ་ཚོགས་ཀྱི་ཤ་རིགས་བཟའ་བའི་སྲོལ་མེད།    ད་དུང་གཤེར་གནས་སྲོག་ཆགས་ཀྱི་ནང་ནས་ཉ་ཤ་ཙམ་ལས།   སྦལ་བ་དང་།   རུས་སྦལ།  སྡིག་སྲིན་སོགས་ཀྱི་ཤ་བཟའ་བའི་སྲོལ་མེད།   འབྲི་གཡག་ར་ལུག་སོགས་ཀྱི་ཤ་བཟའ་སྲོལ་ཡོད་ནའང་གསོད་པའི་ཉིན་དེར་གང་གི་ཤ་སྤྱོད་སྲོལ་མེད།  དམ་ཆོས་ལ་དད་སེམས་ཆེ་བའི་མི་མང་ཆེ་བས།   ཚེས་བཟང་དུས་བཟང་གི་སྐབས་སུ་༼ དཀར་སྐྱོང་༽ཅེས་ཤ་རུས་ཚིལ་ཁྲག་སོགས་མ་འདྲེས་པའི་བཟའ་བཏུང་གཙང་མ་ཁོ་ན་ལོངས་སུ་སྤྱོད་སྲོལ་ཡོད།  གཞན་ཡང་དུས་ཆེན་དང་།  རྟེན་འབྲེལ་གྱི་མཛད་སྒོ།  སྐུ་མགྲོན་བཅར་བའི་དུས་བཅས་སུ་དཀར་ཡོལ་ཁ་ཆག་དང་སེར་ཁ་གས་པའི་རིགས་བེད་སྤྱོད་བཏང་ན།   དེ་ནི་རྟེན་འབྲེལ་མི་ལེགས་པར་བརྩི་སྲོལ་ཡོད།