ཁོང་ནི་མདོ་སྨད་རེབ་གོང་ཞོ་འཕང་ཞེས་བྱ་བ་ཡབ་སྔགས་འཆང་རྡོ་རྗེའི་མཚན་ཅན་ནམ་ཨ་ལགས་རྒྱལ་པོ་ཞེས་བྱ་བ་དང་ཡུམ་པད་མ་སྐྱིད་ཀྱི་སྲས་སུ་ཙོང་ཁ་སྐྱེས་རིར་རབ་
བྱུང་བཅོ་ལྔ་ཆུ་མོ་ཡོས（༡༩༠༣）ལོའི་ཧོར་ཟླ་བརྒྱད་པའི་ནང་རིགས་རུས་མགར་གྱི་གདུང་རྒྱུད་དུ་སྐུ་བལྟམས། དགུང་ལོ༥༡ལས་མ་བཞུགས། དགུང་ལོ་བདུན་ཕེབས་སྐབས་ཡབ་གཤེགས་རྗེས་ཡ་མ་བཀྲ་ཤིས་འཁྱིལ་དུ་ཁོང་ཡུམ་སྲས་གསུམ་བཞུགས། དགུང་ལོ་བརྒྱད་ཕེབས་པར་ཡི་གེ་བསླབས་ནས་ལོ་བཅུའི་ཐོག་གྲྭ་གྲས་སུ་ཞུགས། དགེ་བཤེས་ཨ་ཁུ་ཚུལ་ཁྲིམས་ཀྱི་དྲུང་ནས་སུམ་རྟགས་དང་སྙན་ངག་སོགས་གསན། དགུང་ལོ་བཅུ་གཉིས་སྟེང་གཙོས་གཏེར་དགོན་གྱི་མདུན་ནས་རྩ་རླུང་འཁྲིད། དགུང་ལོ་བཅོ་ལྔ་སྟེང་རྡི་ཚ་དགོན་དུ་རིག་ལམ་གྱི་སྐོར་སོགས་སློབ་གཉེར་མཛད། དགུང་གྲངས་བཅུ་བདུན་ལ་ཕེབས་སྐབས་བླ་བྲང་བཀྲ་ཤིས་འཁྱིལ་དུ་བཞུགས་ཏེ་བསྡུས་གྲྭ་ནས་བརྩམས་ཏེ་མཚན་ཉིད་རིག་པ་སྦྱངས། དགུང་གྲངས་ཉེར་ལྔའི་སྟེང་ལྷ་སར་ཕེབས། དེ་ནས་འབྲས་སྤུངས་སུ་དགེ་བཤེས་ཤེས་རབ་རྒྱ་མཚོ་སོགས་མཁས་པ་དུ་མ་བསྟེན་ནས་ལོ་བདུན་ཙམ་བཞུགས། དགུང་ལོ་སུམ་ཅུ་སོ་གཉིས་ཕེབས་པ་ཤིང་ཁྱི（༡༩༣༤）ལོར་འཕན་ཡུལ་དང་། རྭྭ་སྒྲེང་། གཙང་ཁུལ་སོགས་ལ་གནས་གཟིགས་དང་སྦྲགས་བལ་ཡུལ་བརྒྱུད་རྒྱ་གར་དུ་ཕེབས། སཾསྐྲྀ་ཏའི་སྐད་ལ་སྦྱངས་མཐར་གནས་བརྟན་སྡེ་བའི་མདོ༼ཆོས་ཀྱི་ཚིགས་སུ་བཅད་པ༽ལ་སོགས་པ་ཐོགས་མེད་དུ་བསྒྱུར་བར་མཛད། དེ་ནས་རབ་བྱུང་བཅུ་དྲུག་པའི་ས་སྟག（༡༩༣༨）ལོར་ཧུ་ལ་དང་རྒྱ་གར་རི་མོ་བ་གཅིག དཔར་
འདེབས་མཁན་གཅིག་བཅས་ལྷན་དུ་བོད་དུ་ཕེབས་ནས་དཔལ་ལྡན་ས་སྐྱའི་དགོན་པ་སོགས་
དབུས་གཙང་གི་གནས་དགོན་རྙིང་པ་ཁག་ལ་རྒྱ་དཔེ་ཇི་ཙམ་བཞུགས་པ་གཟིགས་ཞིབ་ཐོག་
དཔེ་ཐོ་དཀར་ཆག་ཞིབ་ཚགས་བཀོད་པར་མཛད་དེ་སླར་རྒྱ་གར་དུ་ཕྱིར་ཕེབས་གནང་། སྐབས་
དེར་དབྱིན་ཡིག་སློབ་སྦྱོང་རྒྱུན་དུ་མཛད་མུས་ནས་ཨུ་རུ་སུ་རོག་རིས་ཞེས་པ་
དེའི་སར་བཞུགས་ཏེ་དེབ་ཐེར་སྔོན་པོ་དབྱིན་ཡིག་ཏུ་བསྒྱུར་བའི་རོགས་མཛད་དེ་ཀུ་
ལུར་ལོ་གསུམ་ཙམ་བཞུགས། བོད་ཤིང་བྱ（༡༩༤༥）ལོ་ནང་རྐྱེན་སྣ་ཚོགས་ཀྱིས་བོད་ལྗོངས་ལྷ་སར་ཞལ་ཕྱོགས་ཏེ། སྟོད་ལ་དྭགས་ག་ཤའི་རྒྱུད་དང་། དེ་ནས་རིམ་བཞིན་མོན་རྟ་དབང་བརྒྱུད་ལྷ་སར་ཕེབས།ལྷ་
སར་བོད་ཀྱི་ལོ་རྒྱུས་དང་རིག་གནས་ཀྱི་ཞིབ་འཇུག་མཛད་དེ་ལྗགས་རྩོམ་མཛད་བཞིན་
པའི་མུར་དབྱིན་ཇི་བཙན་རྒྱལ་པས་དེ་སྔའི་བོད་ཀྱི་སྲིད་གཞུང་ལ་ངན་སྐུལ་བྱས་ནས་
མ་ཉེས་ཁ་གཡོགས་ཀྱིས་བོད་མེ་ཁྱི（༡༩༤༦）ལོའི་ཧོར་ཟླ་བཞི་བའི་ནང་ཙམ་ལ་གློ་བུར་འཛིན་བཟུང་གིས་ཁྲིམས་གཅོད་བྱས་ཐོག་ལོ་གསུམ་རིང་བཙོན་ཁང་དུ་བཞུགས་དགོས་བྱུང་ཞིང（༡༩༤༩）ལོར་བཙོན་གྲོལ་ཐོབ།ཁོང་གི་རྩོམ་པར་མཛད་པའི་བསྟན་བཅོས་ལ། ༼རྒྱལ་ཁམས་རིག་པས་བསྐོར་བའི་གཏམ་རྒྱུད་གསེར་གྱི་ཐང་མ༽ ༼བོད་ཆེན་པོའི་སྲིད་ལུགས་དང་འབྲེལ་བའི་རྒྱལ་རབས་དེབ་ཐེར་དཀར་པོ༽ ༼སིང་ག་ལའི་ལམ་ཡིག༽ ༼རྒྱལ་པོ་ར་མ་ཎའི་རྟོགས་བརྗོད༽ ༼བྱ་ལེན་མའི་རྟོགས་བརྗོད༽ནག་མོ་ཁོལ་གྱིས་མཛད་པ་རྒྱ་གར་སྐད་ནས་བོད་སྐད་དུ་བསྒྱུར་བ༼སྒྲའི་ཟིན་བྲིས༽ ༼གངས་རིའི་སྐོར༽ ༼ཞང་དགའ་བའི་བློ་གྲོས་ལ་བྲིས་ལན༽ ༼རྟུལ་ཆུང་དཔྱད་པའི་སྐོར༽ ༼དབུ་ཚད་དཀའ་བའི་གནད༽ ༼ལུ་བྱེད་མཐའ་དཔྱད༽ ༼འདོད་པའི་བསྟན་བཅོས༽ ༼རྡི་ཚ་སྐམ་པོས་ཕུལ་བའི་ཞུ་ཡིག༽ ༼རྒྱ་གར་གྱི་གནས་ཆེན་བརྒྱད་ཀྱི་ལམ་ཡིགསྔ་རྗེས་གཉིས༽ ༼ཀེ་ཏ་ཀ་སོགས་ཀྱི་བཤད་པ༽ ༼ཞབས་བརྟན་འཆི་མེད་དབྱངས་སྙན༽ ༼ལེགས་ལྡན་ནག་པོའི་གླུ༽ ༼རང་བཞིན་གསུམ་ངེས་པ༽ ༼གཏམ་གྱི་ཚོགས་ཉིན་མཚན་བདུན་པ༽ ༼སིང་ག་ལའི་གནས་བརྟན་སྡེ་བའི་མདོ་དྷརྨ་པ་དཱ་ཞེས་བྱ་བ༽ཆོས་ཀྱི་ཚིགས་སུ་བཅད་པ་རྒྱ་གར་སྐད་ནས་བོད་སྐད་དུ་བསྒྱུར་བ།༼ལེགས་སྦྱར་བང་མཛོད༽སུམ་རྟགས་ཀྱི་སྐོར་ཕྲན་བུ། སྙན་ངག་གི་དཀའ་གནད་ཕྲན་བུ་རྣམས་སོ། དགུང་གྲངས་ཞེ་དགུར་ཕེབས་པ་བོད་རབ་བྱུང་བཅུ་དྲུག་པའི་ལྕགས་ཡོས（༡༩༥༡）ལོའི་ཧོར་ཟླ་བརྒྱད་པའི་ཚེས༡༤དགོང་དྲོའི་ཆུ་ཚོད་བཞི་པ་ཙམ་ལ་ལྷ་ས་དགའ་རུ་ཤར་དུ་སྐུ་གཤེགས།
དེ་ཡང་རུས་ཆེན་སྒོ་ལས་རུ་ཚོ་བཅོ་བརྒྱད་ཀྱི་ནང་ཚན་མགར་གྱི་གདུང་རྒྱུད་རིན་པོ་ཆེ་ལས།
བློན་ཆེན་མགར་དམ་པ་སྟོང་བཙན་ཡུལ་སྲུང་གི་གདུང་རྒྱུད་ཟམ་མ་ཆད་པ་མགར་ཆེན་ཨ་མྱེས་དགེ་བ་དཔལ་ནས་བརྩིས་པའི་གདུང་རབས་ཉེར་བརྒྱད་པ།
མགར་སྟོན་དམ་པ་ཆོས་སྡིངས་ཀྱི་སྲས་གསུམ་གྱི་རྒྱུད་པ་མགར་རྩེ་ཁ་གསུམ་གྱི་ནང་ཚན་གྱ་ས་མགར་རྩེ་ལས།
ཨ་བར་ལྷ་སྡེ་དཀར་པོའི་བརྒྱ་དཔོན་བེ་ཧུ་སྒར་བ་ཚང་གི་ཁྱིམ་ཚང་ཞིག
མགར་རྩེ་ཨ་བར་གྱི་གནས་ཡུལ་རང་ནས་ནུབ་བྱང་སུ་སྤྱི་ལེ་༢༠ཡོད་པའི་སར་བསེ་ཁྱུང་སྦྲ་ཡི་རྒྱུད་པ་ཞོ་ར་མཐུ་སྟོབས་དབང་བོའི་རུས་རྒྱུད་ཞོ་འོང་གཡང་སྡེ་ཕྱུག་མོའི་སྡེ་གྲལ་དུ་ཞུགས་ནས་ཞོ་འོང་བླ་མ་ཚང་ལ་མགོ་བཏགས་ཏེ་ཞིང་ལས་གཉེར།
དེ་ལས་ཁྱིམ་ཚང་འགའ་རུ་གྱེས་པ་ལས།
ཡབ་བླ་མ་ཨ་ལགས་རྒྱལ་བོ་དང་ཡུམ་པདྨ་སྐྱིད་གཉིས་ཀྱི་སྲས་སུ་འཛམ་གླིང་རིག་པའི་དཔའ་བོ་མཁས་དབང་དགེ་འདུན་ཆོས་འཕེལ་འཁྲུངས།
ཁོང་འཁྲུངས་པའི་ཁྱིམ་རྒྱུད་དེ་མགར་རྩེ་སྒར་བ་ཚང་གི་ཁྱིམ་རྒྱུད་ཡིན་པས་ད་ལྟའང་སྒར་བ་ཚང་ཟེར་ལ། ཚོ་བ་དེར་ད་སྐབས་ཁྱིམ་ཚང་ཉི་ཤུ་ལྷག་ཡོད།
ཁྱིམ་ཚང་དེ་དག་མགར་གྱི་རུས་རྒྱུད་ཡིན་པ་ས་གནས་དེར་རླུང་ལྟར་གྲགས་ཤིང་ཀུན་
གྱིས་ཁས་ལེན།
ཁྱིམ་ཚང་དེ་དག་གིས་ད་ལྟའང་སྲུང་མ་མགར་རྩེ་ལྷ་མོ་བརྟེན་མཆོད་བྱེད་བཞིན་ཡོད་ལ།
བསྐང་འདོན་ཨ་མཆོད་ཀྱང་ད་བར་དུ་མགར་རྩེ་སྒར་བ་ཚང་གི་དགེ་སློང་རེ་གདན་འདྲེན་ཞུ་བའི་སྲོལ་ཡོད།
དེས་ན་མཁས་དབང་དགེ་ཆོས་མཆོག་ནི་མགར་གྱི་རུས་རྒྱུད་དྲི་མ་མེད་པ་ཡིན་སྟབས།
སྐུའི་ཚ་བོ་སྐུ་ཞབས་གཡུང་དྲུང་རྒྱལ་ཡང་གངས་ཅན་བཙན་པོའི་མགར་གྱི་ཕུ་ནུའི་
གྲས་སུ་ཞུགས་ནས། རང་རིགས་འཕེལ་རྒྱས་དང་། རིག་གནས་ཡར་སྐུལ་ཕྱོགས་ལ་འབད་པ་བྱེད་བཞིན་ཡོད་དོ།།
ཞེས་མགར་ཨ་བར་ཚེ་རིང་དོན་འགྲུབ་ནས།
༢༠༡༣ལོའི་ཟླ་༥བའི་ཚེས་༤་ལ་འཚམས་སྦྱར་བའོ།
