| རྩེ་སྲས་ཨ་རྡོ། རྩེ་ཁོག
མིའི་རིགས་ཀྱི་འདོད་སྲེད་ལ་བསྲེས་པའི
མུན་པ་དངརོལ་དབྱངས་འདྲེས་རྗེས་ཀྱི་མཚན་མོ
བདག་གིས་སྟོང་ཉིད་ཀྱི་རི་མོ་ཞིག་བྲི་སའི
ཁེར་རྐྱང་གི་ཆང་ཁང་དེ་ཡིན་ནམ
ཤི་གསོན་གྱི་ཐོད་ནས་འཕྱུར་ཞིང
ཤ་ཁྲག་གི་རླངས་བ་རུམ་པའི་ཡིག་འབྲུ་ཁྲི་ཚོ་འདི
ད་ནི་ཁྱོད་ཀྱི་བརྩེ་བའི་ལག་མལ་ལས་ཤོར་བའི
མེས་པོ་དང་རྡོ་རིང་གི་འགབ་ཏུ་ཡུན་རིང་བསྟར་བའི
འོད་ཀྱི་མུ་ཏིག་དང་རུས་པའི་གསེར་འོད་རེ་རེ་ཡིན
དོ་ནུབ་ངས་རང་དང་ཉེ་རུ་སྡོད་པའི་ཇག་པ་དག་དྲན་ཡོང
མིག་ཀོང་དུ་ཉི་ཟླ་རུམ་པའི ཇག་པ་རྟ་ཉོན་དག་དྲན་ཡོང
དེ་དུས ངས་དྲན་ཚོད་དུ
རང་ཉིད་ལའང་མེ་མདའ་ཞིག་དང་རྩྭ་ཐང་ཞིག་དབང་ན་སྙམ
བྱ་ཆེན་གྱི་མངལ་ནས་བྲག་རི་དང་གཙང་བོ་འཁྲུགས་པའི་དོ་ནུབ
དགོང་ཁ་རེ་རེར་ཁེར་རྐྱང་ལ་ཁ་དོག་དང་རྩ་དོན་དབབ་པའི་དོ་ནུབ
ང་ཚོས་ཁྱོད་ཀྱི་འཆི་བ་ཁོ་ན་བསམ་ཞོར
སྒྱུ་རྩལ་གྱི་ལྕགས་མཁར་བརྡུང་མྱོང་བའི་དོ་ནུབ
ཁྱོད་ནི་སྒལ་རུས་ལས་བྱང་ཐང་གི་ཉམ་ང་བཟོ་བའི
མི་ཕོ་ཁེར་ཧྲེང་དེ་ཡིན
ཁྱོད་ནི་རང་གི་བླ་སྲོག་དེ
ནམ་མཁའ་དང་བྲག་རིར་འཁྲུལ་མཁན་གྱི་བོད་པ་དཔུང་རྗེན་དེ་ཡིན
ཤེས་རབ་དང་གྱེན་ལོག་ལས་ལྷུང་བའི
རྡོ་བའི་ཟུངས་ཁྲག་མངར་མོ་འདི
ཁྱོས་རང་གི་མེས་པོ་ཟེར་བའི་གཙང་ཆེན་ཞིག་ལ་ངོས་འཛིན་དུས
ངས་ད་བཟོད་ཁྱོད་ལ་རང་གི་ལྷ་ས་གླེང་ཆོག
དེ་བས
མི་ལོ་ག་ཚོད་ཅིག་ལ་ང་ཚོས་རང་ཉིད་རང་གིས་རྨས་རྗེས
གཞི་ནས་རྒས་ཉམས་མ་ཤོར་བའི་སྒྱུ་འཕྲུལ་གྱི་ནམ་མཁའ་དེ་མཐོང་ཐུབ་ཨང
༢༠༡༢ལོའི་ཟླ༡ཚེས༣༡ཉིན་བྲིས།
| 