| དུག་ཞགས།
ཕྱེ་ལེབ་དམར་པོའི་གཤོག་པ་འཇམ་པོ
བདག་གི་ལག་ཟུང་འདི་གཉིས་ཀྱིས་རེག་སྐབས
མཚོན་མོའི་རྨི་ལམ་ཀྱང་ཁྱོད་ཕྱོགས་སུ་འཁོར་ནས
མཆོད་མེ་དེ་ལ་ཡང་དང་བསྐྱར་དུ་མར་ཁུ་ལྡུད
རང་བྱུང་ཁམས་ཆེན་མོ
ང་ཚོར་ཡང་དགོངས་པ་རེ་གནང་རོགས
ང་ཚོར་མིག་ཆུ་ཕྱི་སྤྱད་ཀྱི་མེ་ཏོག་ཅིག་འཁྲུངས་རོགས
ང་ཚོར་སྐྱོ་སྡུག་སེལ་བྱེད་ཀྱི་ཉི་མ་ཞིག་འཆར་རོགས
ཡུལ་ཤུལ་ལགས
སེམས་པའི་དྲོད་ཁོལ་ན་ཁྱོད་རང་ཡོད་ལ
མིག་གི་ལྟ་ཕྱོགས་ན་ཁྱོད་རང་ཡལ་གྱིན་མེད
ད་ལྟ་ཁྱོད་ནི་བདག་གི་གཅེས་པའི་པང་ཁུག་ན
ས་ཆེན་པོ
ངག་འདར་འདར་གྱིས་ཁྱོད་ལ་ད་དུང་སྨྲ་བ་ནི
ཁྱོད་རང་འགུལ་ཐེངས་དེ་ཡི་གསེབ་དུ་ཚེ་སྲོག་ག་ཚོད་བཞུད་པ
ངའི་མིག་ཆུ་ལ་འདྲེས་ནས་བགྲང་དགོས་སམ
ངས་སྦྲ་ནག་དྲན་དོན་ནི་ཁྱོད་ཀྱི་ཚེ་སྲོག་དེར
གཅེས་པའི་བདག་སྐྱོང་བྱས་པ་ཡིན་ལ
ངས་ཕྱེ་ལེབ་གླེང་བ་ནི་དྭངས་གཙང་གི་སེམས་པ་དེས
མྱ་ངན་ལ་འབུལ་བའི་ཁ་བཏགས་དཀར་པོ
སྤྱི་ལོ༢༠༡༠ལོའི་ཟླ༤བའི་ཚེས༢༡ཉིན་རྨ་ཆུ་ནས།
| 