དགེ་ཆོས།
རྒྱ་ཆེ་བའི་རྩྭ་ཐང་འདི་ཉིད ཁོད་ཡངས་པའི་ནམ་མཁའ་འདི་ཉིད
འུ་ཚང་གི་མལ་གདན་དང་མགོ་སྦྲ་བྱས་ནས་ཡུན་རིང་འགོར
མེ་ཏོག་གི་དབུ་རྒྱན་དཀྲིས་པའི་བུ་མོ་ཚོ
ཁེང་ཆར་གྱི་ལྭ་བ་མནབས་པའི་སྟག་ཤར་ཚོ
འདི་ལྟར་ཡུན་རིང་འགོར་པའི་དེ་རིང
ན་ནིང་གི་ཝུན་ཁྲོན་དང་འདྲ་བར་ཁྱུར་མིད་བཏང་སོང
ས་རུབ་ཁའི་བདེ་བ་རུམ་ནས ནམ་ལངས་ཁའི་བརྩེ་བ་བསམ་ནས
ཁྱེད་ཚོའི་ལྷིང་འཇགས་ཀྱི་མ་ཎི་ལྷ་ཁང་དང་འབིས་རྣམ་པར་སྣང་མཛད
ཚོད་ཚོད་ལ་གཡོ་འགུལ་ཐེབས་ཤིང་ཚོད་ཚོད་ལ་ཞིག་པར་རྩོམ
དཔེ་ཀློག་གི་དབྱངས་རྟ་ལས་མེག་ཆར་འབབ་པའི་བྱིས་པ་ཚོ
རྨི་ལམ་ལས་ག་ལེར་བཞེངས་སྐབས
སྤུས་ཞན་པའི་སྡོད་ཁང་གིས ལྕི་དྲགས་པའི་རྡོ་ཆར་གྱིས
ཁྱོད་ཚོ་ག་ལེར་བསུབ་སོང ག་ལེར་ལམ་འཇུག་བྱས་སོང
བྲག་རི་གཏོར་ཞིང་ཆུ་བོ་རྙོག་པ་འུ་ཚོས་མཐོང་མྱོང
ཕོ་བྲང་བཤིགས་ཤིང་རི་རབ་བསྔོགས་པའང་འུ་ཚོས་མཐོང་མྱོང
འདི་ལྟ་བུའི་འཁྱོམ་འགུལ་ཞིག འདི་ལྟ་བུའི་གཡོ་སྐྱོམ་ཞིག
གང་ནས་འོང་ཞིང་འདི་ནས་འདུག་ངེས་པ་སུ་ལ་གསལ
ས་ཆེན་ཁྲོས་པའི་སྒྱོགས་རྡོ་འདི་བསམ་ཐེངས་རེ་རེར
ཁང་སྟོང་དང་བདག་མེད་ཀྱི་ནོར་ལུག་དག་ག་རེ་བྱེད་དགོས
ཡ་ང་བའི་དྭ་ཕྲུག་དག་དང་ཉམ་ང་བའི་རྒས་འཁོགས་དག
ད་དུང་ཡུགས་ཕོའམ་ཡུགས་མོའི་གནམ་ས་རལ་བའི་ངུ་རྒྱངས་དེ་དག
འུ་ཚོས་ག་རེ་བྱེད་དགོས ག་རེ་བྱེད་དགོས
སྡུག་པོ་འདི་ཁྱེད་ཚོ་ཁེར་པོའི་སྡུག་བསྔལ་མ་རེད
འུ་ཚང་གཅིག་པུའི་སྡུག་བསྔལ་ཡང་མ་རེད
ཚེ་སྲོག་གཙབ་རལ་དུ་བཏང་བའི་འདས་པོ་དག་འདི་ལྟར་སོང་མྱོང
ཚེ་སྲོག་གཙབ་ངེས་པའི་མིའི་རིགས་ཀྱང་འདི་ལྟར་འགྲོ་དགོས
ཅིས་ཀྱང འུ་ཚོ་འདི་ལྟར་འགྲོ་དགོས
བཙོན་དོང་དང་མེ་དཔུང དྲག་ཆར་དང་ཚེར་གསེང་ནས་གཤེགས་པའི་མེས་པོ་ཚོ
བཀྲེས་རྔབ་དང་བཙན་གཡེམ རྟ་ལྕག་དང་འདམ་མྱགས་ལས་གཤེགས་པའི་མེས་མོ་ཚོ
འདི་ལས་ལྕི་བའི་སྡུག་བསྔལ་ཁུར་ནས་གཤེགས་སོང
འདི་ལས་ཐུ་བའི་སེམས་ངལ་བཞག་ནས་བུད་སོང
སྙིང་རྗེ་བའི་ཡུལ་ཤུལ་མི་དམངས་དང་སྙིང་ཉེ་བའི་སློབ་གྲོགས་རྣམ་པ
༢༠༡༠.༤.༡༤.ཉིན་ཁམས་ཀྱི་ཡུལ་ཤུལ་ས་ཁུལ་དུ་ཚད་རིམ༧.༡ཅན་གྱི་ས་འགུལ་བྱུང་བའི་གནས་ཚུལ་ཐོས་རྗེས་རྔ་བ་རྫོང་གི་རྨེའུ་རུ་མའི་སློབ་ཆུང་དུ་བྲིས།
|