|
གཏམ་དང་སྐད་ཆའི་ཁུངས་ཡོད། །
དྲང་སྐྱེས་བདེན་སྒུར་སྲོལ་ཡོད། །
རྒྱ་གར་སྐད་ཀྱི་དབུ་བཞག་ཡོད། །
ཨ་ར་པ་ཙའི་སྔགས་བརྗོད་ཡོད། །
ཆོས་ལུང་གི་གདམ་པ་ཡིན། །
གཏམ་སྐད་ཆའི་མདོ་རྩ་ཡིན། །
མྱི་བསླུ་བྱེད་གཏམ་གི་རྫིག་མིན། །
རྟ་བསླུ་བྱེད་ཆས་ཀྱི་རྙི་མིན། །
སྐད་ཆ་ཁྲ་བཤད་བྱས་མེད། །
དོན་ལ་ཉིས་སྙོམས་བྱས་མེད། །
ཚིག་བརྒྱ་བརྒྱ་བཤད་ཀི་གནད་རྩ་ཡིན། །
སྒ་ལྷུ་བཞི་འཛེར་གི་རྒྱུན་ཐག་ཡིན། །
བརྒྱ་བཤད་ཚིག་གི་རྩ་བ་ཡིན། །
སྟོང་དཀྲུགས་འོ་མའི་མར་ལོ་ཡིན། །
མདའ་ཕར་འཕང་བྲག་དམར་གྱི་དཀྱིལ་ཡིན། །
གཏམ་ཕར་བཤད་ཉན་མཁན་གྱི་རྣར་ཡིན། །
གཏམ་བཤད་པའི་མགོ་མཇུག་ཚང་མོ་ཡིན། །
གོས་བཟོས་པའི་སྲུབས་ཁ་དོམ་པོ་ཡིན། །
གཏམ་དྲང་བདེན་གཉིས་ཀྱི་ཁུངས་ཡོད། །
ལས་རྒྱུ་འབྲས་བརྩིས་པའི་མནའ་ཡོད། །
མགོ་ཟུར་རྣ་བས་ཉན་ཡག་གྱིས། །
གངས་དཀར་སེམས་ལ་འཛིན་ཡག་གྱིས། །
གཏམ་སྐད་ཆ་ཨ་བཤད་ཡང་བཤད་ཡིན། །
དོན་གལ་ཆེན་ཨ་ནན་ཡང་ནན་ཡིན། །
ཨ་བཤད་དང་ཡང་བཤད་ཡིན། །
ཨ་ལུང་ལ་དགུ་སྐོར་ཡིན། །
གོ་གོའི་རྣ་རྩ་ཡིན། །
རིག་རིག་གི་མིག་རྩ་ཡིན། །
གོ་བ་རྣ་ཡིན། །
ཀོ་ལོང་སྐེ་ཡིན། །
བུ་གོ་བ་ཅན་ལ་ཚིག་གཅིག་གིས་ཆོག།
རྟ་གོམ་འགྲོས་ཅན་ལ་ལྕག་གཅིག་གིས་ཆོག།
གོ་བའི་བུ་ལ་བརྡ་ཡིན། །
རི་སྤྱང་སྔོན་པོར་ཐོ་ཡིན། །
སྐད་ཆ་མང་ན་ཉོག་འགྲོ། །
སྐུད་པ་རིང་ན་ཆད་འགྲོ། །
རིན་ཆེན་རིལ་བུ་འདྲ་བའི་ཟོས་བཞག་ན་གྲོལ་འགྲོ་སྤྱད། །
ཞ་མདའ་ཞོ་བཞི་འདྲ་བའི་བརྒྱབས་བཞག་ན་ལོག་འགྲོ་སྤྱད། །
སྨན་ཉུང་ཉུང་གཅོང་ཆེན་སྡེ་བཞི་འཇོམས་འགྲོ་སྤྱད། །
གཏམ་ཉུང་ཉུང་མགོ་མཇུག་བར་གསུམ་རྟོགས་འགྲོ་སྤྱད། །
བོད་ཚིག་ཐོག་ཡིན། །
རྒྱ་ཡིག་ཐོག་ཡིན། །
ཚིག་རྟིང་ནག་པོ་མནའ་ཡིས་མནན། །
ཡིག་སྟེང་དམར་པོ་ཐེལ་གྱིས་མནན། །
བཤད་པའི་སྐད་ཆ་འདྲ་འདྲ་ཡིན་རུང་། །
རྒྱ་བོད་ལུགས་སྲོལ་སོ་སོ་ཡིན། །
བཤད་བཤད་ཀི་བྱ་ར་ཁྲ་ལི་མ། །
གོན་ཟེར་ན་གོང་བ་ཡུལ་ན་མེད། །
བཤད་ཚར། །
ཉན་འབབ། །
མགོ་ནག་མྱིས་གཅིག་གིས་བཤད་ན་ཀུན་གྱིས་ཉན། །
ནག་པོ་ཁྱི་གཅིག་ཟུག་ན་ཐམས་ཅད་ཟུག །
གཏམ་ལ་བཤད་རིས་ཉན་རིས། །
མཚོན་ལ་གཡུག་རིས་འགོག་རིས། །
གཏམ་བཤད་ན་མགོ་རྔ་མི་གོ །
མདའ་འཕང་ན་ཤར་ནུབ་མི་གོ །
རྣ་གཡས་འོན་པ། །
མིག་གཡོན་ཞར་བ། །
གཏམ་ཚིག་གསུམ་ལྕེ་ཡིས་མི་ཤོད། །
ལམ་གོམ་གསུམ་རྡོག་པས་མི་ནོན། །
ཚིག་གསུམ་བཤད་ན་སྐད་འདར། །
གོམ་གསུམ་སྤོས་ན་ཉྭ་འདར། །
རྒྱ་སྐད་བོད་སྐད་ཁ་ཁ། །
དཔེ་དང་ལུགས་སྲོལ་སོ་སོ། །
མྱི་ཐུབ་སྤྱད་ཀྱི་ཚིག་ཨེ་ཡོད། །
འབྲོང་ནོན་སྤྱད་ཀྱི་ཤེད་ཨེ་ཡོད། །
སྨིན་དབུས་པོའི་པོད་ཕྲན་ལས་བཤུས།
|