ཁྲག་སྙུག
འབྲོག་པའི་སྒྲོལ་མ།
གཡའ་དག་པའི་ཞོགས་རླུང་བསིལ་མོས།
གནག་སྣུམ་གྱི་སྐྲ་ལོ་བསྒུལ་ཞིང༌།
དགོ་དགོ་འབྲུ་མོའི་དབྱངས་རྟ་ཁོ་ནས།
མྱི་ཚེ་ལ་བདེན་དོན་བཅོས་མ་ཞིག་བསྩལ།
ལྕི་དྲི་བྲོ་བའི་བདེན་དོན་བཅོས་མ་ཞིག་བསྩལ།
རྨིག་རྗེས་ནས་འབུས་པའི་སྙུ་གུ་ཆུང་ཆུང༌།
གྲང་རླུང་གི་གཙེས་པའི་ངོ་གདོང་སྐྱ་བོ་དེ།
ཁྱེད་ཀྱི་གཏམ་རྒྱུད་ལ་འཐིམས་པའི་ལས་སྐལ་རེད།
སློབ་རའི་སྒྲོལ་མ།
རང་ཉིད་བཙལ་སའི་སློབ་ཁང་དེ་ན།
མིག་ཟུང་ལྟ་བུའི་དཔེ་དེབ་དེ་ཐང་ལ་བཞག་ནས།
བརྩེ་དུང་རྫུན་མ་ཞིག་ལ་ལག་སྙོབ་བྱེད་བཞིན།
རང་ཉིད་དངོས་མ་ཞིག་གཏན་ནས་མ་རྙེད།
རྒྱ་མཚོའི་ནང་གི་ཁབ་སྐུད་བཞིན་གཏན་ནས་མ་རྙེད།
ཕ་མ་ཚོའི་རྔུལ་ཁྲག་འཇིབ་དུས་འདྲེ་མོ་ཞིག
འདྲེ་མོ་ཁྲག་འཐུང་ཞིག
གྲོང་རའི་སྒྲོལ་མ།
མེ་ཏོག་གི་ཁ་དོག་མ་ཡལ་བའི་ལང་ཚོར།
ཤོག་སྒོར་འགའི་མཆིལ་ཞགས་དང་རྡོག་བརྫིས་བྱས།
རང་ཉིད་ཀྱི་མྱི་གཞི་ལ་དམའ་འབེབ་བྱེད་པ་ཐལ་དྲགས་སོང་བས།
ཁྱེད་ནི་ནམ་ཡང་བསམ་བློ་མེད་པའི་བྲན་གཡོག་ཅིག
མཚོན་མདངས་བྱུགས་པའི་སྐྲ་ལོ་ནག་པོ་དེས།
ཁྱེད་ཀྱི་ངོ་གདོང་འགེབ་བཞིན་ཡོད།
ལང་ཚོ་གཅེར་བུ་དེ་འགེབ་བཞིན་ཡོད།
| 