ས་མཐའི་བླ་མའི་གསེར་ཞལ་རིང་དུ་བསྐལ།།
ས་ཡི་འཇིག་རྟེན་ཆུང་ཆུང་སྙིང་རེ་རྗེ།།
ཨ་ཕའི་གསེར་ཞལ་དྲོན་མོ་མ་མཇལ་གོང༌།།
ཨ་མའི་དངུལ་གྱི་འཛུམ་ཆུང་མ་གྲོལ་སྔོན།།
ཕ་ཁྱིམ་སྨུག་པོར་སྣུམ་མདངས་མ་རྒྱས་གོང༌།།
ཕུ་ནུའི་རང་སྲོག་ཤོར་བ་ཡིད་རེ་ཕངས།།
བཅོས་མའི་སེམས་པ་དམར་བོའི་དམག་གིས་བསླུས།།
རྩ་ཆེའི་རྒྱུ་ནོར་འབྱུང་སའི་ཀློང་ན་འཐིམས།།
མཛའ་བོའི་གཉེན་བཤེས་འཇིག་རྟེན་ཁ་ཁར་བྲལ།།
ཀྱེ་མ་མི་རྟག་འཇིག་པའི་ཆོས་སུ་གྲུབ།།
ན་ནིང་རྔུལ་ཆུས་བསྐྲུན་པའི་ཁང་བརྩེགས་དེ།།
ད་ལོ་གློ་བུར་ཐལ་དང་རྡུལ་གྱིས་བརླགས།།
ད་སྔོན་ནོར་གྱིས་ཕྱུག་པོའི་ཚོང་དཔོན་དེ།།
ད་ལྟ་དབུལ་བོའི་གྲྭལ་ནས་གཅེར་བུར་རྒྱུག།
ཁ་ཚང་སྒེག་ཉམས་ལྡན་པའི་ན་ཆུང་མ།།
དེ་རིང་ཐལ་རྡུལ་ཁྲོད་ན་བེམ་རོར་གྱུར།།
མདང་དགུང་ཕ་མའི་རྩིབ་ཀྱི་གཅེས་ཕྲུག་དེ།།
ད་ནངས་གྱང་རལ་བར་ན་ཁེར་རྐྱང་ལུས།།
ཕ་མའི་བུ་ཚ་བསྐྱུར་ནས་གང་དུ་ཡིབ།།
བུ་ཚའི་ཕ་མ་བཞག་སྟེ་གང་དུ་བཞུད།།
འདི་ལྟར་ཚང་མ་གཅིག་སེམས་གཅིག་ཆགས་ནས།།
ཕྱི་མིག་ཤུལ་ལ་འཁྲེང་བཞིན་གང་དུ་ཆས།།
ངུ་འབོད་ཆོ་ངེ་འདོན་པའི་རི་ལུང་ན།།
སྐྱིད་སྡུག་མཉམ་དུ་བཤིབས་པའི་སྤུན་ཟླ་ཉུང༌།།
རྒྱུ་ནོར་ཤུལ་དུ་ལུས་པའི་ར་བར་ན།།
རང་བླ་ཕྱི་ལ་བཙོང་བའི་བོད་པ་མང༌།།
རླངས་འཁོར་འཚང་ཁ་ཤིག་པའི་བར་གསེང་ན།།
ཉམ་ཐག་དམངས་ལ་ཕན་པའི་རོགས་སྐྱོར་ཉུང༌།།
གཉེན་ཉེ་གཤིན་ཡུལ་འགྲིམ་པའི་མཚེར་ཤུལ་ན།།
བན་དང་བོད་པ་བརྫུས་པའི་རྐུན་མ་མང༌།།
རྒྱ་བོད་སོག་གསུམ་སྦྲེལ་བའི་མཛའ་མཐུན་ཁྲོད།།
གནས་ལུགས་ཇི་བཞིན་འགོད་པའི་འགོ་བ་ཉུང༌།།
གནམ་ས་བླ་འོག་བརྗེ་བའི་ད་ལོ་འདིར།།
གོ་སྐབས་དམ་འཛིན་བྱེད་ནས་གཡོ་འཁྲུལ་མང༌།།
རྫུན་པའི་མི་ལ་བདེན་པའི་ཆོ་ལོ་འཐོབ།།
བདེན་པའི་བུ་ལ་རྫུན་པའི་ཞྭ་མོ་འགེབས།།
བདེན་རྫུན་མགོ་རྟིང་ལོག་པའི་དེང་དུས་འདིར།།
རང་དབང་འཆམས་མཐུན་ཟེར་ཡང་མིང་སྟོང་ཙམ།།
བཀྲེས་པའི་བུ་ཆུང་ཕྱུག་པོའི་ཟས་ཀྱིས་ཁྲིད།།
འཁྱམ་པོའི་མི་རྐྱང་མཛའ་མོའི་མིག་གིས་དྲངས།།
རིགས་བཟང་ལྷ་ཕྲུག་བདུད་མོའི་པང་དུ་བླངས།།
བཙན་པོ་བོད་ཀྱི་མིང་བྱང་འདི་ལྟར་བསུབ།།
ས་སྟེང་ཀུན་ན་རང་གིས་འབག་བཙོག་བསླད།།
ས་ཞིང་གཏེར་ཁ་གཞན་གྱིས་སྔོག་འདོན་བྱས།།
ས་ཡི་བུ་མོའི་མ་བཟོད་འཕག་འཚག་གིས།།
ས་མཐོའི་བུ་ལོའི་སྲོག་གི་གཤེད་དུ་འབབས།།
༢༠༡༠ལོའི་རིག་གནས་ཡར་སྤེལ་ལས།
|