སྐྱབས་གསུམ་བླ་མ་ཀུན་དང་དབྱེར་མེད་པའི།།

གསང་གསུམ་རྣམ་དཀར་འཕྲིན་ལས་དགེ་བའི་ཚོགས།།

སྡུད་མཁས་གདུལ་བྱ་རྒྱ་མཚོའི་མགོན་ལ་འདུད།།

རིན་ཆེན་བྱང་ཆུབ་སེམས་ཀྱི་འཁྲི་ཤིང་གི།

ཕྱིན་དྲུག་བྱ་བའི་ཡལ་ག་རབ་རྒྱས་ཤིང༌།།

དོན་གཉིས་ཕུན་ཚོགས་འབྲས་བུ་ཡོངས་སྨིན་པའི།།

གཞན་དོན་འབའ་ཞིག་སྒྲུབ་ལ་སྙིང་ནས་གུས།།

སེར་སྐྱ་མང་བོའི་སྤྱོད་ཚུལ་ལ་བརྟག་ནས།།

དགེ་དང་མི་དགེ་གང་ལ་འཇུག་ཚུལ་དང༌།།

རྣམ་སྨིན་རྒྱུ་མཐུན་བདག་འབྲས་གྲུབ་ཚུལ་སོགས།།

སོ་སོར་གསལ་བར་བྱེད་པ་སྙིང་ནས་དྲན།།

བྱམས་བརྩེ་ཆུ་འཛིན་འཁྲིགས་པའི་བ་གམ་ལས།།

གསང་གསུམ་བདུད་རྩིའི་གྲུ་ཆར་འབེབས་མཁས་པའི།།

ཐུགས་རྗེ་ཆར་གྱིས་འགྲོ་བ་ཡོངས་སྨིན་པའི།།

མཚུངས་མེད་རྗེ་བཙུན་བླ་མ་སྙིང་ནས་དྲན།།

རླབས་ཆེན་རྒྱལ་སྲས་སྤྱོད་པའི་ཁུར་བསྣམས་ནས།།

ཤིན་ཏུ་བྱ་དཀའི་སྤྱོད་པ་དུ་མ་ཡིས།།

ལུས་ངག་ཡིད་གསུམ་ལོངས་སྤྱོད་དགེ་ཚོགས་བཅས།།

སྦྱིན་པའི་ཕར་ཕྱིན་རྫོགས་པར་སྙིང་ནས་དྲན།།

ཤིན་ཏུ་རྟོགས་དཀའ་རྒྱལ་ཡུམ་བང་མཛོད་ལས།།

བྱང་ཆུབ་སེམས་ཀྱི་བདུད་རྩིའི་སྨན་བླངས་ནས།།

དུག་གསུམ་ནད་ཀྱིས་མནར་བའི་འགྲོ་བ་རྣམས།།

བདེ་མཆོག་མི་གནས་མྱ་ངན་འདས་ལ་བཀོད།།

མདོ་སྨད་ཁྲོ་ཁོའི་ས་ཡི་ཐིག་ལེ་རུ།།

དབང་བསྐུར་མན་ངག་ཟབ་མོ་གནང་བའི་ཚེ།།

མཁའ་དབྱིངས་ཉི་མའི་གུར་ཁྱིམ་འཇའ་ཡིས་གང༌།།

རྣམ་དཀར་དགེ་མཚན་དུ་མའི་རྟགས་མཚན་བྱུང༌།།

སྐུ་རྟེན་བྱང་ཆུབ་མཆོད་རྟེན་ལེགས་གྲུབ་ནས།།

དགའ་སྟོན་རབ་གནས་མཛད་སྒོ་སྤེལ་བའི་ཚེ།།

གློ་བུར་མཁའ་ལས་སྐར་ཆེན་བབས་པ་སོགས།།

ངོ་མཚར་ལྟས་བཟང་མང་བོས་བསུ་བ་བྱེད།།

དགའ་ལྡན་བཤད་སྒྲུབ་བཀྲ་ཤིས་འབྱུང་གླིང་སོགས།།

ལྷག་པར་འབྲལ་མེད་བརྩེ་བས་རྗེས་བཟུང་སྟེ།།

ཆོས་སྲིད་ཟུང་འབྲེལ་གང་ལ་གང་འཚམས་ཀྱིས།།

གདུལ་བའི་ཐབས་མཁས་མཛད་པ་སྙིང་ནས་དྲན།།

གཞོན་ནུའི་དུས་ནས་ཐོས་པ་མང་དུ་བཙལ།།

བར་དུ་སྔ་མའི་མངོན་སྦྱངས་བག་ཆགས་སད།།

ཐ་མར་ཉམས་སུ་བླངས་པའི་གདམས་པ་མཆོག།

ཐམས་ཅད་བསྟན་པ་རྒྱས་པའི་རྒྱུ་རུ་བསྔོ།།

ཞིང་འདིའི་གདུལ་བྱ་ཡོངས་སུ་རྫོགས་པ་ན།།

རྟག་འཛིན་ཅན་རྣམས་ཆོས་ལ་བསྐུལ་བའི་ཕྱིར།།

རེ་ཞིག་སྐུ་ཡི་བཀོད་པ་ཆོས་དབྱིངས་སུ།།

སྨོན་པའི་དོན་རྣམས་འགྲུབ་པའི་བཀྲ་ཤིས་ཤོག།

རིས་མེད་འགྲོ་བའི་མགོན་པོ་ཡིད་བཞིན་ནོར།།

རེ་ཞིག་གཟུགས་སྐུའི་བཀོད་པ་ཉེར་བསྡུས་ཀྱང༌།།

དག་པའི་ཞིང་ཁམས་གང་ན་བཞུགས་ཀྱང་རུང༌།།

ཡང་སྤྲུལ་ཉི་མ་གཞོན་ནུ་མྱུར་བྱོན་ཤོག།

ཁྱེད་ལ་བསྟོད་ཅིང་གསོལ་བ་བཏབ་པའི་མཐུས།།

བདག་སོགས་དེང་ནས་ཚེ་རབས་ཐམས་ཅད་དུ།།

ཇི་སྲིད་བྱང་ཆུབ་མཆོག་ལ་མ་རེག་པར།།

འབྲལ་མེད་དགྱེས་བཞིན་རྗེས་སུ་འཛིན་པར་ཤོག།