ཧོར་གཙང་བཀྲ་རྒྱམ་ཆུང་བ།(བླ་བྲང༌།)
ཆོས་ཟབ་མོ་ཕ་རོལ་ཕྱིན་དྲུག་ལ་བསླབས་ནས།།
དོན་འབྲས་བུ་ངེས་འབྱུང་བྱང་སེམས་ཤིག་འཁྲུངས་ཏེ།།
གནས་རི་ཁྲོད་འགྲིམ་ནས་ཏིང་འཛིན་ལ་གཞོལ་བའི།།
རྗེ་ཚུལ་ཁྲིམས་རྒྱ་མཚོར་སྒོ་གསུམ་གྱིས་འདུད་དོ།།
ཐུགས་གཡོ་བ་མེད་པའི་བྱམས་བརྩེ་ཡི་ཞགས་པ།།
ཐག་ཉེ་རིང་མེད་པའི་འགྲོ་རྣམས་ལ་སྩོལ་བའི།།
སྣོད་གཙང་མའི་སློབ་མ་འབུམ་ཕྲག་གི་བཤེས་གཉེན།།
ཡིད་དྲན་ནས་གདོང་བ་མིག་ཆུ་ཡིས་བརླན་སོང༌།།
རྗེ་ཡབ་སྲས་ལ་སོགས་པཎ་གྲུབ་ཀྱི་གཞུང་ལ།།
བྱང་ཆུབ་པའི་ལུང་རིགས་གཉིས་འཛོམས་ཀྱི་སྐྱེས་བུ།།
བློ་གཟུར་གནས་སྐྱེན་པོས་བརྟགས་དཔྱད་ཀྱིས་ཆོས་རྣམས།།
མི་སྐལ་ལྡན་རྣམས་ལ་སྨྲ་མཁས་ཀྱི་སློབ་དཔོན།།
སྤང་གཡུ་ལོའི་ལྗོངས་ན་འཕུར་ལྡིང་གིས་རྩེན་པའི།།
འབུ་རྐང་དྲུག་སྦྲང་མའི་སྙིང་ཁུང་གི་མེ་ཏོག།
དགྲ་ནག་པོ་དགུན་ཁའི་བཙག་རླུང་གིས་བཅོམས་དུས།།
ལུས་ཁེངས་ནས་གཤོག་སྒྲ་སྒྲོག་ཐབས་རང་མི་འདུག།
དངུལ་དཀར་གྱི་ཀོང་བུ་ཁྲ་ལྡན་ན་སྦར་བའི།།
ལྷ་ཡབ་ཡུམ་དགྱེས་པའི་འབྲི་མར་གྱི་འོད་མཆོད།།
ཡུན་མི་རིང་སྐད་ཅིག་ཐེངས་གཅིག་ལ་གཟིམས་ཚེ།།
གནས་གཞལ་ཡས་ཁང་དེ་མུན་ནག་གིས་བསྒྲིབས་སོང༌།།
རྗེ་བླ་མ་སྐྱབས་གསུམ་ཀུན་འདུས་ཀྱི་བདག་ཉིད།།
གནས་འདི་དང་གྱེས་ནས་ཞིང་གཞན་དུ་གཤེགས་ཀྱང༌།།
མགོན་མེད་པའི་དྭ་བུའི་སྨྲེ་ངག་ལ་གསན་ཚེ།།
བསམ་བཞིན་དུ་ཞིང་འདིར་མྱུར་མོ་རུ་འབྱོན་ཅིག།
༢༠༡༠ལོའི་རིགས་གནས་ཡར་སྤེལ་ལས་བཤུས།
|