| ཧོར་གཙང་བསོད་ནམས། （རྨ་ལྷོ）
བློ་བར་འཛུམ་པའི་ཐ་སྙད་རྣོན་པོས།
སྲ་བརྟན་གངས་རིའི་ཕྱི་ནང་བསློགས་ནས།།
སེམས་ཀྱི་ཟབ་སར་ཐོལ་གྱིས་གཙག་དུས།།
མིག་ཆུ་བསྐམས་པའི་ཉིན་ཐོ་བཞུར་ཡོང༌།།
སྙན་ངག་འཁྲུལ་བའི་གོ་བ་རྣལ་མས།།
ས་ཆེན་སྡུག་གི་ལྭ་བ་གྱོན་ནས།།
བརྩེ་བ་སྣུམ་པོའི་རྒྱ་ཁྱོན་འཇལ་དུས།།
ཉེས་པས་བསད་པའི་རྣམ་ཤེས་སྙིང་རྗེ།།
ཁྲིམས་ཆད་བསྣན་པའི་རྨ་ཁ་གསོན་པོས།།
སྐྱོ་བའི་ལོ་ཟླ་ཕྲག་ལ་ཁུར་ནས།།
མུན་ནག་མུན་པའི་རི་གྲོང་འགྲིམས་དུས།།
དོན་ལྔ་སྣོད་དྲུག་རང་སོར་མ་གནས།།
བསམ་བློའི་རུ་ཁག་དམག་ལ་གཤར་ཡང༌།།
རྒོལ་བའི་སྨྱུག་རྩེ་གཏད་སོ་བོར་ཞིང༌།།
འཇིགས་སུ་རུང་བའི་གཡུལ་འགྱེལ་ཤུལ་ན།།
གྱོང་གུད་ཐེབས་པའི་རྣམ་ཐར་བརྩིགས་འདུག།
ན་ཟུག་རྣག་པའི་ལོ་རྒྱུས་རྩུབ་མོས།།
སྙོམས་པའི་རྩ་ཕྲན་བསྟུད་མར་བཅད་ནས།།
དུར་ཁྲོད་བྱ་ཡི་ཁ་རུ་ལྷུང་དུས།།
འགྱོད་པའི་ཁྲག་ཡིག་ཁ་ནས་བསྐྱུགས་ཚར།།
ཚོར་བའི་དུས་བཞིའི་མཐའ་ནས་འགྲེང་སྟེ།།
མྱ་ངན་ཐང་ཆེན་ཞིབ་ཏུ་ཀློག་དུས།།
ཁྱེད་དང་འདྲ་བའི་གངས་ལྷ་མེ་ཏོག།
འཕྲང་ལམ་དེ་ན་རི་བོང་རྭ་རེད།།
དུག་ཁ་འཕེལ་བའི་བསྐལ་བ་ཐ་མས།།
ཞི་བདེའི་སྨན་གྱི་སྦྱོར་བ་བསྣོགས་ནས།།
དམུ་རྒོད་བཞིན་དུ་སྟོབས་ཀྱིས་མཆོང་དུས།།
མི་ཚེའི་རིན་ཐང་རྩ་ནས་བོར་འགྲོ།
པོ་ཏིའི་ཚེ་སྲོག་གཅིག་བུས་སྤྱད་ནས།།
འོད་ཀྱི་ལམ་ལ་བདེ་བར་ཆས་དུས།།
ཐ་སྙད་ནག་པོའི་མཚོན་ཆ་སྒྲིག་པ།།
ལན་ཆགས་བརྩེགས་མའི་ཁ་སྣོན་ཡིན་སོང༌།།
ལྷ་ཡི་གཅེར་གཟུགས་ཚོར་བས་བསུས་ཀྱང༌།།
གོ་བའི་མི་ལ་སྐྱིད་སྣང་མ་འཆར།།
མི་རྟག་དྲན་མགུར་སྙན་ལ་བཞུར་ན།།
ངེས་འབྱུང་རྫུན་མའི་བཟི་ཁ་བཙན་གི།།
གསེར་གྱི་ས་བོན་རུལ་བའི་བདེན་པ།།
ཚད་མའི་ཞིང་ན་སྨྱོན་པས་ལབ་འདུག།
གར་དང་གླུ་ཡི་རྒྱ་མཚོའི་ནང་ནས།།
རྫོགས་གསར་དུས་ལ་རེ་བ་ཆད་ཀི།
རྗེས་དྲན་གསོལ་བའི་མིང་བྱངཤི་བོ།།
སྙིང་རྗེ་ཆེན་མོའི་སྒོ་ལ་བཏགས་ནས།།
ལྟ་བ་ཟབ་མོའི་མགྲོན་ལ་བཅར་དུས།
ཉམ་ཆུང་རིགས་ལ་བསུ་མ་ཨེ་ཡོད།།
ཉི་ཟླའི་སྲས་ལ་མུན་པ་འཁྲུངས་ན།།
ཆུ་མིག་ཤ་ལ་གྱོང་གུད་ཐེབས་སྲིད།།
གནམ་སའི་མངལ་ནས་མགོན་དུ་བྱོན་ན།།
སྲིན་པོའི་མཆེ་བར་ཡང་ཡང་ལྷུང་སྐད།།
བདག་མེད་སེམས་ཀྱིས་བློ་རིག་སྒྲིམ་ནས།།
ཡན་ལག་ཞ་བོས་རང་ཚུགས་བཟུང་ནས།།
སྨྱུག་ཤོག་འཚོ་བ་དང་དུ་ལེན་དུས།།
རླབས་ཆེན་མཁས་མང་ལྷག་ཏུ་དྲན་ཀི། ༢༠༡༠ལོའི་ཟླ༡༠པའི་ཚེས༢༨ཉིན་སློབ་གླིང་དུ།
| 