བླ་དཀོན། (ཞལ་ཤུལ)
ཚུལ་ཁྲིམས་རྣམ་པར་དག་པའི་ཞིང་ས་རུ།།
རླབས་ཆེན་རྒྱལ་སྲས་སྤྱོད་པའི་ཁུར་འདེགས་པ།།
སྙིགས་དུས་འགྲོ་བ་ཡོངས་ཀྱི་གཉེན་གཅིག་པུ།།
བློ་བཟང་ཚུལ་ཁྲིམས་རྒྱ་མཚོར་སྙིང་ནས་འདུད།།
ངེས་དོན་ཕན་བདེའི་གཏེར་ཆེན་མགོན་ཁྱོད་ཀྱི།།
ཞལ་ཁྱིམ་ཉི་མའི་དཀྱིལ་འཁོར་རྒྱས་པའི་དུས།།
སྐལ་ལྡན་གདུལ་བྱའི་པད་ཚལ་ལེགས་མཛེས་ཤིང༌།།
ཞིང་འདིའི་བདེ་སྐྱིད་རྫོགས་ལྡན་དཔལ་ལ་འགྲན།།
འོན་ཀྱང་སྙིགས་དུས་བསོད་ནམས་མཐུ་དམན་པའི།།
མ་དག་འགྲོ་བའི་ཆུ་བུར་མིག་ལམ་ནས།།
མགོན་ཁྱོད་གློ་བུར་ཞིང་གཞན་ཕེབས་པའི་ཚུལ།།
མཐོང་བའི་མོད་ལ་མྱ་ངན་ཤུགས་ཀྱིས་མནར།།
དད་ལྡན་སློབ་བུའི་བདེ་སྐྱིད་མེ་ཏོག་ཚལ།།
གྱེས་བྲལ་ཆར་རླུང་དྲག་པོས་བཅོམ་དང་ལྷན།།
ངུ་འབོད་མྱ་ངན་སྟོང་གི་ཀློང་ཡངས་ནས།།
ཞིང་འདིར་སླར་ཡང་འབྱོར་ལ་རེ་ཞིང་སྒུག།
མགོན་ཁྱོད་ཞི་བའི་དབྱིངས་སུ་གཤེགས་ཤུལ་ན།།
རང་རིགས་རང་ལ་རྒོལ་བའི་གདུག་རྩུབ་སོགས།།
མི་འདོད་སྡུག་བསྔལ་རྐྱེན་གྱིས་གཙེས་པ་མང༌།།
སྡུག་བསྔལ་གཡང་ལས་སྐྱོབས་ཤིག་དྲིན་ཅན་རྗེ།།
འགྲོས་ལྡན་རྟ་ཕོ་སྲབ་ཀྱིས་བསྒྱུར་མཁས་པ།།
ཀླད་མེད་སྐྱེ་བོ་འགའ་ཡིས་ཀི་སྒྲ་ལྷང༌།།
དད་ལྡན་ཁྲི་མ་འབུམ་གྱི་སེམས་ལ་གཟན།།
ཀྱེ་མ་མགོན་པོ་ཁྱེད་སྐུ་སྙིང་ནས་དྲན།།
བློ་བཟང་རྒྱལ་བསྟན་འཛིན་པའི་ཆོས་སྡེ་འདིར།།
ལམ་བཟང་བསླབ་པ་གསུམ་གྱི་ཉམས་ལེན་དང༌།།
ལུང་ཆོས་སྡེ་སྣོད་གསུམ་གྱི་འཆད་ཉན་སོགས།།
མདོ་སྔགས་བསྟན་པ་དར་བ་ཁྱེད་ཀྱི་དྲིན།།
ཁྱད་པར་མཁྱེན་བརྩེ་ཆུ་འཛིན་འཁྲིགས་པ་ལས།།
དབང་ལུང་གདམས་ངག་དངོས་གྲུབ་ནོར་བུའི་ཆར།།
ཅི་འདོད་སྩོལ་བའི་བཀའ་དྲིན་སྐྱོངས་པའི་ཚུལ།།
དྲན་ཚེ་དགེ་བའི་བཤེས་ཁྱོད་ལྷག་ཏུ་དྲན།།
མགོན་ཁྱོད་རིང་ནས་ས་བཅུའི་མཐར་སོན་ཅིང༌།།
བདག་འདྲའི་རྟག་འཛིན་ཅན་རྣམས་སྒྲོལ་སླད་དུ།།
རེ་ཞིག་གཟུགས་སྐུ་བསྡུས་པའི་ཚུལ་བསྟན་ཡང༌།།
བདག་ཅག་ཚེ་རབས་ཀུན་ཏུ་རྗེས་འཛིན་མཛོད།།
༢༠༡༠ལོའི་རིག་གནས་ཡར་སྤེལ་ལས།
|