ཚུལ་ཁྲིམས། (ཞལ་ཤུལ)
སྐྱེ་རྒ་ན་འཆིའི་གཡུལ་ངོ་འདི་ནས་ཕ་རོལ་སོན་པ་བཅོམ་ལྡན་འདས།།
གདུལ་བྱའི་རྟག་འཛིན་རི་བོ་གཏོར་ཕྱིར་སྐུ་ཡི་བཀོད་པ་བསྡུས་ལེགས་ཏེ།།
ཐུབ་པའི་རྣམ་ཐར་བདག་གིར་བཞེས་པའི་ཀུན་སྤངས་རྣལ་འབྱོར་དབང་ཕྱུག་ཁྱོད།།
ཞིང་གཞན་གཤེགས་པའི་ངང་ཚུལ་བསམ་ན་དྲན་པའི་གདུང་བ་སྙིང་ལ་ལྕི།།
སྐྱབས་གཅིག་བླ་མའི་སྐུ་ཡི་མཛད་པ་ཐ་མལ་སྟོན་པའི་དུས་ཉིད་དུ།།
ཐོས་བསམ་ལས་ལ་གཅིག་ཏུ་གཞོལ་ཞེས་བཀའ་གསུང་བསྩལ་བའི་བཀའ་དྲིན་དང༌།།
དམ་ཚིག་སྡོམ་པ་ཚུལ་བཞིན་བསྲུངས་ནས་དགེ་འདུན་ཐུགས་མཐུན་བྱེད་དགོས་ཞེས།།
བསླབ་བྱ་བདུད་རྩིའི་བགོ་སྐལ་གནང་བའི་མཚུངས་མེད་བླ་མ་སྙིང་ནས་དྲན།།
དད་གཤིན་ནོར་རྫས་མཛོད་དུ་སྤུངས་པའི་སྤྲུལ་སྐུ་ཕྱུག་པོའི་གོ་གནས་སྤངས།།
ཟས་གོས་གང་བཟང་ལོངས་སུ་སྤྱོད་པའི་སློབ་གཉེར་བ་ཡི་མཐུན་རྐྱེན་སྤངས།།
ལྟོ་སྐྱ་གོས་ཧྲུལ་གྲོགས་སུ་བསྟེན་མཁན་སྙིགས་དུས་འདི་ན་ཁྱེད་ལས་སུ།།
ཉེར་གཅིག་དུས་སུ་མི་ལ་རས་པའི་རྣམ་ཐར་སྐྱོང་མཛད་བླ་མ་དྲན།།
གངས་དཀར་ཤེལ་གྱི་མཆོད་རྟེན་དྭངས་མ་གཡོ་སྒྱུ་དུ་བ་ནག་པོའི་སྒྲིབ།།
རང་རིགས་གངས་སེང་དཀར་མོའི་འོ་མ་ཝ་སྤྱང་ཁ་ཆུའི་སྦགས་དུས་སུ།།
ལུས་སེམས་དྲི་མ་འཁྲུད་པར་བྱེད་པ་དམ་པ་གང་གི་ཞལ་གསུང་ཏེ།།
འདི་ལྟར་བསམ་ན་བྱམས་བརྩེའི་བདག་ཉིད་དྲན་པའི་ན་ཟུག་བཟོད་པར་དཀའ།།
༢༠༡༠ལོའི་རིག་གནས་ཡར་སྤེལ་ལས།
|